କୃଷ୍ଣପ୍ରସାଦ,୨୨ା୫ (ଡି.ଏନ.ଏ.)-ପୁରୀ ଜିଲା କୃଷ୍ଣପ୍ରସାଦ ବ୍ଲକ ଫନୀଜନିତ ବାତ୍ୟା ଯୋଗୁ ପ୍ରବଳ କ୍ଷୟକ୍ଷତି ହୋଇଛି। ତେବେ ଗୃହ ହରାଇଥିବା ବାତ୍ୟା କ୍ଷତିଗ୍ରସ୍ତଙ୍କ ପାଇଁ ପକ୍କା ଛାତଘର ଯୋଗାଇ ଦେବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଘୋଷଣା ପରେ ବହୁ ବିପନ୍ନଙ୍କ ମନରେ ହଜିଯାଇଥିବା ଆଶା ପୁଣି ଉଜ୍ଜୀବିତ ହୋଇଉଠିଛି। ଦୁର୍ବଳ କଚ୍ଚାଘରେ ବସବାସ କରି ରହିଥିବା ଅନେକ ପରିବାର ଏବେ ପକ୍କାଘର ପାଇବା ପାଇଁ ମଙ୍ଗଳବାର ଧାରଣାକୁ ଓହ୍ଲାଇଥିବା ଜଣାପଡ଼ିଛି। ପକ୍କାଘର ଦାବି ନେଇ ସ୍ଥାନୀୟ ଅଞ୍ଚଳର ଟୁନା ସ୍ବାଇଁ, ସୁବାସ ଚନ୍ଦ୍ର ଜେନା, ସୁୁକାନ୍ତ ବିଶ୍ୱାଳଙ୍କ ନେତୃତ୍ୱରେ ଶତାଧିକ ମହିଳା ଓ ପୁରୁଷ କୃଷ୍ଣପ୍ରସାଦ ବ୍ଲକ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଥିଲେ ା କଚ୍ଚାଘରେ ବସବାସ କରୁଥିବା ସମସ୍ତ ଉପକୂଳବାସୀ ପରିବାରକୁ ପକ୍କାଗୃହ ଯୋଗାଇ ଦେବା ଆମର ଦାବି ବୋଲି ଆନ୍ଦୋଳନକାରୀ ସ୍ଲୋଗାନ ଦେଇଥିଲେ। ସୁବାସ ଓ ସୁକାନ୍ତ କହିଥିଲେ ପୁରୀ, ଖୋର୍ଦ୍ଧା ଏବଂ ଗଞ୍ଜାମ ଜିଲାରେ ବସବାସ କରୁଥିବା ଫାଇଲିନ ବାତ୍ୟାରେ କ୍ଷତିଗ୍ରସ୍ତ ପରିବାରଙ୍କ ନିମନ୍ତେ ବିଶ୍ୱବ୍ୟାଙ୍କ ତରଫରୁ ପକ୍କା ଘର ତିଆରି କରିବା ପାଇଁ ଅନୁଦାନ ଆସିଥିଲା ା ତେବେ ଗଞ୍ଜାମ, ଖୋର୍ଦ୍ଧା ଜିଲାର କ୍ଷତିଗ୍ରସ୍ତ ପରିବାରଗୁଡ଼ିକୁ ନୂତନ ପକ୍କାଘର ଯୋଗାଇ ଦିଆଯାଇଛି। ପୁରୀ ଜିଲାରେ ଏହି ଯୋଜନା ଏ ପର୍ଯ୍ୟନ୍ତ କାର୍ଯ୍ୟକାରୀ ହୋଇ ନ ଥିବା ଆନ୍ଦୋଳନକାରୀ ଅଭିଯୋଗ କରିଛନ୍ତି। ଏହି ଅବସରରେ ଏକ ସ୍ବୟଂ ସହାୟକ ଗୋଷ୍ଠୀ ସଭାପତି ବୁଲି ବେହେରା କହିଛନ୍ତି ଯେ, ସରକାରଙ୍କ ସହାୟତା ଧନୀ ଲୋକଙ୍କ ପାଇଁ ହେଉଛି ା ଆମେ ଝାଟିମାଟି କୁଡିଆ ଘରେ ରହୁଛୁ, ହେଲେ ବାତ୍ୟା ହେଲେ ଧନୀ ଲୋକମାନେ ସହାୟତା ପାଉଛନ୍ତି ା ଜଣେ ବାରମ୍ବାର ଯୋଜନା ଦ୍ୱାରା ଘର ପାଉଛନ୍ତିି ା ହେଲେ ଆମକୁ ମିଳୁନି। ଆମେ ଏବେ ରାଜରାସ୍ତାକୁ ଓହ୍ଲାଇଛୁ। ସରକାର ଏହାର ସମାଧାନ ନିମନ୍ତେ ପଦକ୍ଷେପ ଗ୍ରହଣ ନ କଲେ ଆମେ ଆଉ ଘରକୁ ଫେରିବୁ ନାହିଁ। ଆମର ଦାବି ପୂରଣ ନ ହେଲେ ରାଜରାସ୍ତାରେ ଆତ୍ମହତ୍ୟା କରିବୁ ା ଆନ୍ଦୋଳନକାରୀ ଉପରୋକ୍ତ ଦାବି ନେଇ ମୁଖ୍ୟମନ୍ତ୍ରୀ, ମୁଖ୍ୟଶାସନ ସଚିବ, ଜିଲାପାଳଙ୍କ ଉଦ୍ଦେଶ୍ୟରେ ଏକ ଦାବିପତ୍ର ବିଡିଓ ଅଭିମନ୍ୟୁ ମାଝିଙ୍କୁ ପ୍ରଦାନ କରିଛନ୍ତି ା
