କଟକ ଅଫିସ,୩।୫: ବାହାର ରାଜ୍ୟରେ କାମ କରୁଥିବା ପ୍ରବାସୀ ଶ୍ରମିକଙ୍କ ଓଡ଼ିଶା ଫେରିବା ଆରମ୍ଭ ହୋଇଗଲାଣି। ସ୍ବତନ୍ତ୍ର ଟ୍ରେନ୍ ଏବଂ ବସ୍ରେ ସେମାନେ ଓଡ଼ିଶା ଫେରୁଛନ୍ତି। ଏହାକୁ ନେଇ ରଣନୀତି ପ୍ରସ୍ତୁତ କରିଛି ରାଜ୍ୟ ପୋଲିସ। ଶନିବାର ରାଜ୍ୟର ବରିଷ୍ଠ ପୋଲିସ ଅଧିକାରୀ ଯଥା ଆଇଜି, ଡିଆଇଜି ଏବଂ ଏସ୍ପିମାନଙ୍କ ସହ ଭିଡିଓ କନ୍ଫରନ୍ସିଂରେ ଏନେଇ ଆଲୋଚନା କରିଛନ୍ତି ଡିଜିପି ଅଭୟ। ସୀମାରେ କଡ଼ାକଡ଼ି ଯାଞ୍ଚକୁ ଗୁରୁତ୍ୱ ଦିଆଯାଇଛି।
ଆନ୍ତଃ ରାଜ୍ୟ ତନଖି ଫାଟକଗୁଡ଼ିକର ଠିକ୍ ପରିଚାଳନା ଉପରେ ଡିଜିପି ଅଭୟ ଆଲୋଚନା କରିଥିଲେ। ପ୍ରବାସୀ ଶ୍ରମିକମାନେ ରାଜ୍ୟ ଭିତରେ ପ୍ରବେଶ କରିବା ପରେ କିଭଳି ଭାବେ ଗନ୍ତବ୍ୟ ସ୍ଥଳରେ ସୁରକ୍ଷିତ ଭାବେ ପହଞ୍ଚିପାରିବେ ସେ ସମ୍ପର୍କରେ ଡିଜିପି ଗୁରୁତ୍ୱ ଦେଇଥିଲେ। ଟ୍ରେନ୍ରେ ପହଞ୍ଚିବା ସ୍ଥଳରେ ପର୍ଯ୍ୟାପ୍ତ ପୋଲିସ ମୁତୟନ କରାଯିବ ଓ ସେମାନଙ୍କ ରହଣି ସ୍ଥାନରେ କଡ଼ା ପୋଲିସ ପହରା ଦିଆଯିବ। ବିଶେଷକରି ଗ୍ରାମାଞ୍ଚଳରେ ପ୍ରସ୍ତୁତ କରାଯାଇଥିବା ସଙ୍ଗରୋଧ କେନ୍ଦ୍ରଗୁଡିକର ସୁରକ୍ଷା ଦିଗରେ ଆବଶ୍ୟକ ପଦକ୍ଷେପ ନେବାକୁ ଡିଜିପି ବରିଷ୍ଠ ପୋଲିସ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ।
ଅନ୍ୟପକ୍ଷରେ ଅତ୍ୟଧିକ ଦୁର୍ବଳ କିମ୍ବା ଅସୁସ୍ଥ ପୋଲିସ କର୍ମଚାରୀଙ୍କୁ କଷ୍ଟଦାୟକ କାର୍ଯ୍ୟରେ ନିୟୋଜିତ ନ କରିବା ପାଇଁ ପୂର୍ବରୁ ଦିଆଯାଇଥିବା ନିର୍ଦ୍ଦେଶକୁ ପାଳନ କରିବାକୁ କୁହାଯାଇଛି। ମୁଖ୍ୟମନ୍ତ୍ରୀଙ୍କ ରିଲିଫ୍ ଫଣ୍ଡ ଅର୍ଥକୁ ଠିକ୍ ଭାବେ ବିନିଯୋଗ କରିବା, ଲକ୍ଡାଉନ୍ ଓ ଆନୁଷଙ୍ଗିକ କାର୍ଯ୍ୟରେ ସ୍ବତନ୍ତ୍ର ସୁରକ୍ଷା ବାଟାଲିୟନ୍କୁ ମୁତୟନ, ବିଭିନ୍ନ ସାମଗ୍ରୀର ନିଲାମ୍, ପୋଲିସ କର୍ମଚାରୀଙ୍କ କଲ୍ୟାଣ ଏବଂ ଲକ୍ଡାଉନ୍ ନିୟମର କାର୍ଯ୍ୟକାରିତା ବିଷୟରେ ଆଲୋଚନା ହୋଇଥିଲା। ଏହି ଆଲୋଚନାରେ ପୋଲିସ ମୁଖ୍ୟାଳୟର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।
