କରୋନା ମୁକାବିଲାରେ ବଲିଉଡ୍ ତାରକାମାନେ ସହାୟତାର ହାତ ବଢାଇଛନ୍ତି। ଏବେ ଏଥିରେ ନିଜକୁ ସାମିଲ କରିଛନ୍ତି ବଲିଉଡ ଅଭିନେତା ସୋନୁ ସୁଦ। ସେ ମୁମ୍ବାଇରେ ଫଶି ରହିଥିବା ପ୍ରବାସୀ ଶ୍ରମିକମାନଙ୍କ ପାଇଁ ଯାନବାହନର ବନ୍ଦୋବସ୍ତ କରି ଏବେ ଚାରିଆଡେ ଚର୍ଚ୍ଚା ପାଲଟିଛନ୍ତି। ସୋନୁ ଶ୍ରମିକଙ୍କୁ ଘରକୁ ପଠାଉଥିବାବେଳେ ସେଠାରେ ଜଣେ ମହିଳା ଏକ ଶିଶୁ ପୁତ୍ର ଜନ୍ମ ଦେଇଛନ୍ତି। ଯାହାର ନାମ ସେ ରଖିଛନ୍ତି ସୋନୁ ସୁଦ। ଏକଥା ଜାଣିବା ପରେ ସୋନୁ ଭାବପ୍ରବଣ ହୋଇପଡିଛନ୍ତି। ମେ ୧୨ରେ ଶ୍ରମିକଙ୍କ ଏକ ଗ୍ରୁପ୍ ମୁମ୍ଭାଇରୁ ବିହାରର ଦରଭଙ୍ଗା ପଠାଯାଇଥିଲା। ଏହି ଗ୍ରୁପ୍ରେ ଦୁଇ ଜଣ ମହିଳା ଗର୍ଭବତୀ ଥିଲେ। ସେଥିମଧ୍ୟରୁ ଜଣେ ମହିଳା ନିଜ ଘରେ ଏକ ପୁତ୍ର ସନ୍ତାନ ଜନ୍ମ ଦେଇଥିଲେ। ଯାହାର ନାମ ସେ ସୋନୁ ସୁଦ ଶ୍ରୀବାସ୍ତବ ରଖିଥିଲେ।
ମୁମ୍ବାଇରେ ଫଶି ରହିଥିବା ୭୦୦ ଜଣ ପ୍ରବାସୀ ଶ୍ରମିକଙ୍କୁ ଉତ୍ତରପ୍ରଦେଶ ଓ ବିହାରକୁ ଯିବା ପାଇଁ ୧୪ଟା ବସ୍ର ବନ୍ଦୋବସ୍ତ କରି କରିଥିଲେ ସୋନୁ। ବ୍ୟବସାୟୀ ନୀତି ଗୋଏଲଙ୍କ ‘ଘର ଭେଜୋ’ ଅଭିଯାନରେ ସାମିଲ ହୋଇ ସୋନୁ ଶ୍ରମିକମାନଙ୍କୁ ଏପରି ଭାବେ ସହାୟତାର ହାତ ବଢାଇଛନ୍ତି। ପୂର୍ବରୁ ମଧ୍ୟ ସୋନୁ ଏପରି ମହତ୍ କାର୍ଯ୍ୟ କରି ଚର୍ଚ୍ଚାରେ ରହି ସାରିଛନ୍ତି। ସେ ଗୁଲବାରା, କର୍ଣ୍ଣାଟକ ଓ ମହାରାଷ୍ଟ୍ରରେ ଫଶିଥିବା ଶ୍ରମିକଙ୍କ ପାଇଁ ଗାଡି ଯୋଗାଡ କରିଦେବା ସହ ସେମାନଙ୍କୁ ଘରକୁ ପଠାଇଥିଲେ।
