କଟକ ଅଫିସ,୨୫।୫-ନାନା ବାଦ ବିବାଦ ଭିତରେ ପ୍ରାୟ ଦୁଇ ମାସ ପରେ କଟକ ଜିଲାରେ ସୋମବାରଠାରୁ ମଦ ବିକ୍ରି ଆରମ୍ଭ ହୋଇଛି। ପ୍ରଥମ ଦିନରେ ପ୍ରାୟ ୧୭୪୨ ଲିଟର ମଦ ବିକାଯାଇଛି। ଜିଲା ଅବକାରୀ ବିଭାଗ ସୂଚନା ଅନୁଯାୟୀ, ଜିଲାରେ ୩୬ଟି ଅନ୍ସପ୍ ରହିଛି। ସେଥିରୁ ୩ଟି ଦୋକାନ ହୋମ୍ ଡେଲିଭରିରେ ସାମିଲ୍ ହୋଇଛନ୍ତି। ଏହି ଦୋକାନଗୁଡ଼ିକ ପ୍ରଥମ ଦିନରେ ୧୧୧ଟି ଅର୍ଡର ପାଇଛନ୍ତି। ସେମାନେ ୨୯.୩୭୫ ଲିଟର ବିଦେଶୀ ମଦ ଏବଂ ୪୨.୨୫୦ ଲିଟର ବିୟର ବିକିଛନ୍ତି। ସେହିପରି ଜିଲାରେ ୧୦୮ଟି ଅଫ୍ସପ୍ ଥିବାବେଳେ ସେଥିରୁ ୧୫ଟି ଦୋକାନ ହୋମ୍ ଡେଲିଭରିରେ ସାମିଲ ହୋଇଥିଲେ। ସେମାନେ ପାଇଥିବା ୭୨୫ଟି ଅର୍ଡରରେ ୧୦୬୮.୭୮୮ ଲିଟର ବିଦେଶୀ ମଦ ଓ ୬୦୨.୧୦୦ ଲିଟର ବିୟର ବିକ୍ରି କରିଛନ୍ତି।
ଭୁବନେଶ୍ୱର ପରି କଟକରେ ମଧ୍ୟ କାଉଣ୍ଟର ଆଗରେ ଗ୍ରାହକଙ୍କ ପ୍ରବଳ ଭିଡ଼ ସହ ମଦ ବିକ୍ରି ହୋଇଛି। ଦୋକାନୀମାନେ କେବଳ ଫୋନ୍ରେ ଅର୍ଡର ନେଇ ଗ୍ରାହକଙ୍କ ଘରେ ମଦ ପହଞ୍ଚାଇବା ପାଇଁ ଯେଉଁ ନିର୍ଦ୍ଦେଶ ରହିଥିଲା, ତାହାକୁ ଦୋକାନୀ କିମ୍ବା ଗ୍ରାହକ କେହି ମାନିନାହାନ୍ତି। ସକାଳ ୭ ପୂର୍ବରୁ ଦୋକାନ ସମ୍ମୁଖରେ ଅସମ୍ଭାଳ ଭିଡ଼ ଲାଗିଥିଲା। ଭିଡ଼କୁ ନିୟନ୍ତ୍ରଣ କରିବାରେ ପୋଲିସ ମଧ୍ୟ ନାକେଦମ୍ ହେଲା। ଗ୍ରାହକମାନେ ଅନ୍ଲାଇନ୍ରେ ମଗେଇବା ପରିବର୍ତ୍ତେ ସିଧାସଳଖ କାଉଣ୍ଟରରୁ ମଦ କିଣିଥିଲେ। ଯେଉଁ ଦୋକାନୀମାନେ ମନା କଲେ, ସେଠାରେ କର୍ମଚାରୀଙ୍କୁ ଧମକ ଦିଆଗଲା। ସାମାଜିକ ଦୂରତାକୁ କେହି ମାନିଲେନି। ଆଉ କେତେକ ଜାଗାରେ ଗ୍ରାହକମାନେ ଦୋକାନ ସମ୍ମୁଖକୁ ଯାଇ ଫୋନ୍ରେ ଅର୍ଡର ଦେଉଥିଲେ। ଦୋକାନ ପାଖରେ ଅପେକ୍ଷା କରି କର୍ମଚାରୀଙ୍କଠାରୁ ମଦ ସଂଗ୍ରହ କରୁଥିଲେ। ବାଦାମବାଡ଼ି ଅଞ୍ଚଳର ଏକ ଦୋକାନରେ ଏଭଳି ବେଆଇନ୍ ଭାବେ ମଦ ବିକ୍ରି ହେଉଥିବା ଖବର ଡିସିପିଙ୍କ ପାଖରେ ପହଞ୍ଚତ୍ଥିଲା। ଘଟଣାର ତଦନ୍ତ ପାଇଁ ବାଦାମବାଡ଼ି ଥାନାକୁ ନିର୍ଦ୍ଦେଶ ଦିଆଯାଇଛି।
