ରାଇରଙ୍ଗପୁର, ୧୦।୪(ଡି.ଏନ୍.ଏ.) : ମୟୂରଭଞ୍ଜ ଜିଲା ରାଇରଙ୍ଗପୁର ସହରାଞ୍ଚଳରେ ପୋଲିସ ସଫେଇ କର୍ମଚାରୀଙ୍କ ଜଣେ ସୁପରଭାଇଜରଙ୍କୁ ମାଡ଼ ମାରିବା ପ୍ରତିବାଦରେ ଗୁରୁବାର ସଫେଇ କର୍ମଚାରୀମାନେ କାର୍ଯ୍ୟବନ୍ଦ ଆନ୍ଦୋଳନ କରିଥିଲେ। ସ୍ଥାନୀୟ ଉପ ଜିଲାପାଳ ଧର୍ମାନନ୍ଦ ବେହେରାଙ୍କ ନିର୍ଦ୍ଦେଶ କ୍ରମେ ଟାଉନଥାନା ଆଇଆଇସି ରେଣୁବାଳା ସାହୁ ଘଟଣାସ୍ଥଳରେ ପହଞ୍ଚି ବୁଝାସୁଝା କରିବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା।
ସୂଚନା ଅନୁଯାୟୀ, ସୁପରଭାଇଜର ବିଶ୍ୱଜିତ ମହାନ୍ତି ବୁଧବାର ବାଇକ ଯୋଗେ ପୌର ପରିଷଦ ଅନ୍ତର୍ଗତ ପୁରଣାଘାଟି ଓ ଗଢ ବସ୍ତି ଅଞ୍ଚଳକୁ ସଫେଇ କାର୍ଯ୍ୟ ଦେଖାଶୁଣା କରିବା ପାଇଁ ଯାଉଥଲେ। ଏହି ସମୟରେ ଗଢ ଛକ ନିକଟରେ ଲକ ଡାଉନ ପାଇଁ ଡ୍ୟୁଟିରେ ଥିବା ପୋଲିସ କର୍ମଚାରୀ ତାଙ୍କୁ ଅଟକାଇ ମାଡ଼ ମାରିଥିଲେ। ସେ ନିଜ ପରିଚୟପତ୍ର ଦେଖାଇ ଥିଲେ ମଧ୍ୟ ପୋଲିସ କର୍ମଚାରୀମାନେ କିଛି ଶୁଣି ନ ଥିବା ସୁପରଭାଇଜର ମହାନ୍ତି ଅଭିଯୋଗ କରିଛନ୍ତି। ସଫେଇ କର୍ମଚାରୀମାନେ ପୌର ପରିଷଦର ନିର୍ବାହୀ ଅଧିକାରୀ ଭାଗବତ ପ୍ରସାଦ ମହାପାତ୍ରଙ୍କୁ ଏ ବିଷୟରେ ଜଣାଇ କାର୍ଯ୍ୟବନ୍ଦ ଆନ୍ଦୋଳନ କରିଥିଲେ।
