ବଇଣ୍ଡା,୨୨।୩(ଡି.ଏନ.ଏ.) – କିଶୋରନଗର ବ୍ଲକ ବଇଣ୍ଡା ଚନ୍ଦନ ପୋଖରୀର କିଛି ଅଂଶ ପୋତିବା ପାଇଁ ଏକ ଠିକାସଂସ୍ଥା ବିଷାକ୍ତ ସାମଗ୍ରୀ ମିଶା ମାଟି ମୋରମ ଆଦି ପକାଉଥିବାରୁ ପାଣି ଦୂଷିତ ହେବା ସହ ଶତାଧିକ ମାଛ ମରି ଭାସୁଛନ୍ତି। ଏ ନେଇ ପୋଖରୀ ଠିକାରେ ନେଇ ମାଛ ଚାଷ କରୁଥିବା ଶରଧାମୁଣ୍ଡା ଗ୍ରାମର ସୁରଥ ପ୍ରଧାନ ବଇଣ୍ଡା ଫାଣ୍ଡିରେ ଶନିବାର ଅଭିଯୋଗ କରିଛନ୍ତି।
ଅଭିଯୋଗରୁ ଜଣାପଡ଼ିଛି, ୫୫ ନଂ. ଜାତୀୟ ରାଜପଥ ୪ ଲେନ୍ କରାଯାଉଛି। ବଇଣ୍ଡା ଚନ୍ଦନ ପୋଖରୀ ନିକଟରେ ରାଜପଥ ଯାଇଥିବାରୁ ସମ୍ପ୍ରସାରଣ ପାଇଁ ପୋଖରୀର ୪୦ ପ୍ରତିଶତ ପୋତାଯାଉଛି। ଏଥିପାଇଁ ଏକ ଠିକାସଂସ୍ଥା ପ୍ରକ୍ରିୟା ଆରମ୍ଭ କରିଛି। କିନ୍ତୁ ପକାଯାଉଥିବା ସାମଗ୍ରୀରେ କିଛି ବିଷାକ୍ତ ପଦାର୍ଥ ରହୁଥିବାରୁ ପୋଖରୀ ପାଣି ବିଷାକ୍ତ ହୋଇଯାଉଛି। ସେହିପରି ବଇଣ୍ଡା ଅଞ୍ଚଳରେ କିଛିମାସ ତଳେ କେତେକ ଘର ଭାଙ୍ଗିଥିବାବେଳେ ସେଠାରେ ପଡ଼ିରହିଥିବା ସମସ୍ତ ବିଷାକ୍ତ ସାମଗ୍ରୀ ଚନ୍ଦନ ପୋଖରୀରେ ପକାଯାଉଛି। ଏହାକୁ ଗ୍ରାମବାସୀ ବିରୋଧ କରୁଥିଲେ ମଧ୍ୟ ଠିକାସଂସ୍ଥା ଶୁଣୁ ନ ଥିବା ଅଭିଯୋଗ ହେଉଛି। ଗତ ନଭେମ୍ବର ୨୦୧୯ରେ ଠିକାସଂସ୍ଥା ଏପରି କରୁଥିବା ନେଇ ଥାନାରେ ଅଭିଯୋଗ କରାଯିବାରୁ ସେତେବେଳେ ତାହା ବନ୍ଦ ହୋଇଥିଲା। ତେବେ ପୁନର୍ବାର ଠିକାସଂସ୍ଥା ପକ୍ଷରୁ ବିଷାକ୍ତ ସାମଗ୍ରୀ ପୋଖରୀରେ ପକାଯାଇଛି। ତୁରନ୍ତ ଏଥିପ୍ରତି ଜିଲା ପ୍ରଶାସନ ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି। ଏ ନେଇ ନୁନୁକାପଶି ସରପଞ୍ଚ ଜଳଧର ସାହୁ କହିଛନ୍ତି, ପୋଖରୀରେ ବିଷାକ୍ତ ସାମଗ୍ରୀ ନ ପକାଇବା ପାଇଁ ଠିକାସଂସ୍ଥାକୁ ପଞ୍ଚାୟତ ପକ୍ଷରୁ ନିର୍ଦ୍ଦେଶ ଦିଆଯିବ।
