ଆଲମୋରା,୭।୧୧: ଆଗାମୀ ଦିନରେ ପୃଥିବୀରେ ଖାଦ୍ୟ ସଙ୍କଟ ଦେଖାଯିବ। ଏପରିସ୍ଥଳେ କୀଟପତଙ୍ଗକୁ ଖାଦ୍ୟ ଭାବେ ବ୍ୟବହାର କରାଗଲେ ଏହି ସମସ୍ୟାର ସହଜରେ ସମାଧାନ ହୋଇପାରିବ। ସମ୍ପ୍ରତି ପୃଥିବୀର ୮୦ ପ୍ରତିଶତ ଲୋକ କୀଟପତଙ୍ଗକୁ ଖାଦ୍ୟ ଭାବେ ଗ୍ରହଣ କରୁଛନ୍ତି। ତେବେ ଅବଶିଷ୍ଟ ୨୦ ପ୍ରତିଶତ ଲୋକ ଏଭଳି କରୁ ନ ଥିବା ଉତ୍ତରାଖଣ୍ଡର ଆଲମୋରା ସ୍ଥିତ ଜି.ବି. ପନ୍ଥ ଜାତୀୟ ହିମାଳୟ ପରିବେଶ ସଂରକ୍ଷଣ ଏବଂ ବିକାଶ ସଂସ୍ଥା ପକ୍ଷରୁ ପ୍ରକାଶିତ ଏକ ଗବେଷଣା ରିପୋର୍ଟରେ ପ୍ରକାଶ ପାଇଛି। ଭାରତର ଉତ୍ତର ପୂର୍ବ ରାଜ୍ୟ ମଧ୍ୟରେ ମଣିପୁର, ଅରୁଣାଚଳ ପ୍ରଦେଶ ଏବଂ ନାଗାଲାଣ୍ଡରେ ବଜାରରେ କୀଟପତଙ୍ଗ ବିକ୍ରି ହୋଇଥାଏ। ଏସବୁରେ ଉଚ୍ଚକୋଟୀର ପୋଷକ ତତ୍ତ୍ୱ ରହିଥାଏ। ସେହିପରି କେରଳ, ତାମିଲନାଡୁ, ଝାଡ଼ଖଣ୍ଡ ଏବଂ ଓଡ଼ିଶାରେ ମଧ୍ୟ କେତେକ କୀଟପତଙ୍ଗକୁ ଖାଦ୍ୟ ଭାବେ ବ୍ୟବହାର କରାଯାଇଥାଏ। ଭାରତରେ ଶହେରୁ ଅଧିକ ପ୍ରଜାତିର କୀଟପତଙ୍ଗକୁ ଲୋକେ ଖାଇଥାନ୍ତି। ଚାଇନା, ଜାପାନ, ଥାଇଲାଣ୍ଡ, ମ୍ୟାନ୍ମାର୍ ଏବଂ ଆମେରିକା ସହିତ ୟୁରୋପ, ଆଫ୍ରିକାରେ ମଧ୍ୟ କୀଟପତଙ୍ଗକୁ ଖାଦ୍ୟ ରୂପେ ବ୍ୟବହୃତ କରାଯାଇଥାଏ। ତେଣୁ କୀଟପତଙ୍ଗ ପ୍ରଜାତି ସଂରକ୍ଷଣ କରିବା ଆବଶ୍ୟକ ବୋଲି ଏହି ରିପୋର୍ଟରେ ପ୍ରକାଶ ପାଇଛି। ଇତିମଧ୍ୟରେ ପୃଥିବୀରୁ ଖାଦ୍ୟ ଯୋଗ୍ୟ ୪୩୯ ପ୍ରଜାତିର କୀଟପତଙ୍ଗ ଲୋପ ପାଇଯାଇଛନ୍ତି। ସାରା ପୃଥିବୀରେ ୧୫ ଶହରୁ ଅଧିକ ପ୍ରଜାତିର କୀଟପତଙ୍ଗକୁ ଲୋକେ ପାରମ୍ପରିକ ଖାଦ୍ୟ ଭାବେ ଗ୍ରହଣ କରୁଥିବା ରିପୋର୍ଟରେ ଦର୍ଶାଯାଇଛି।
