ତାଳଚେର,୧୭ା୫(ନି.ପ୍ର.)- ଶିଳ୍ପ ନଗରୀ ତାଳଚେରରେ ପାନୀୟ ଜଳ ସମସ୍ୟା ଧୀରେ ଧୀରେ ଉତ୍କଟ ହେବାରେ ଲାଗିଛି। ବର୍ଷ ସାରା ଜଳାଭାବ ରହୁଥିଲେ ବି ଖରାଦିନେ ତାହା ଢେରଗୁଣ ବଢ଼ିଯାଉଛି। ବାରମ୍ବାର ପ୍ରଶାସନ ନିକଟରେ ଅଭିଯୋଗ ହେଉଥିଲେ ମଧ୍ୟ ସ୍ଥାୟୀ ସମାଧାନ ବ୍ୟବସ୍ଥା କରାଯାଉ ନ ଥିବାରୁ ଲୋକେ ପିଇବା ପାଣି ପାଇଁ ବଡ଼ ଦହଗଞ୍ଜ ହେଉଛନ୍ତି। ପ୍ରଶାସନ ଓ ଶିଳ୍ପସଂସ୍ଥା ଯୋଗାଉଥିବା ଜଳ ପିଇବା ଉପଯୋଗୀ ହେଉ ନ ଥିବାରୁ କିଏ ଦୀର୍ଘ ପଥ ଚାଲି ପାଣି ସଂଗ୍ରହ କରୁଛନ୍ତି ତ ଆଉ କିଏ ଚୁଆ ଜଳରେ ଘରର ଆବଶ୍ୟକତା ମେଣ୍ଟାଇବାକୁ ବାଧ୍ୟ ହେଉଛନ୍ତି।
ଖରା ଆରମ୍ଭରୁ ତାଳଚେରର ତାପମାତ୍ରା ସବୁବେଳେ ୪୦ ଡିଗ୍ରୀ ଉପରେ ରହୁଛି। ଚଳିତବର୍ଷ ଏଠାରେ ସର୍ବୋଚ୍ଚ ତାପମାତ୍ରା ୪୩ ଡିଗ୍ରୀ ଟପିଯାଇଥିବା ବେଳେ ଖଣି ଅଞ୍ଚଳରେ ପାଖାପାଖି ୫୦ ହୋଇଯାଉଛି। ଏପରି ତାତି ଯୋଗୁ ପାନୀୟ ଜଳର ଆବଶ୍ୟକତା ମଧ୍ୟ ବଢ଼ିଯାଉଛି। ବିଶେଷକରି ଖଣି ପାର୍ଶ୍ୱବର୍ତ୍ତୀ ଅଞ୍ଚଳରେ ସମସ୍ୟା ସଙ୍ଗିନ ହୋଇପଡ଼ୁଛି। କିନ୍ତୁ ପ୍ରଶାସନ ଓ ଶିଳ୍ପ ସଂସ୍ଥା ପକ୍ଷରୁ ହେଉଥିବା ଜଳ ଯୋଗାଣ ପର୍ଯ୍ୟାପ୍ତ ହେଉ ନ ଥିବାରୁ ଲୋକେ ଅନ୍ୟ ବିକଳ୍ପ ଭାବେ ଦୂର ଦୂରାନ୍ତକୁ ଯାଇ ପାଣି ସଂଗ୍ରହ କରୁଛନ୍ତି। କୁମୁଣ୍ଡା, ଗୋପାଳପ୍ରସାଦ, ବନବାସପୁର, ରଞ୍ଜାଗୋଳ, ବାଘବାସପୁର ଗ୍ରାମବାସୀ ଏବେ ପାଣି ଟୋପାଏ ପାଇଁ ନାହିଁ ନ ଥିବା ଅସୁବିଧା ଭୋଗ କରୁଛନ୍ତି। ପ୍ରଶାସନ ପକ୍ଷରୁ ଏସବୁ ଗଁାକୁ ଟ୍ୟାଙ୍କର ପଠାଯାଉଛି। କିନ୍ତୁ ତାହା ଦିନେ ଯୋଗାଣ ହେଲେ ୩ ଦିନ ବନ୍ଦ ରହୁଛି। ଏହାଛଡ଼ା ଉକ୍ତ ପାଣି ପିଇବା ଉପଯୋଗୀ ନୁହେଁ ବୋଲି ଗ୍ରାମବାସୀ ଅଭିଯୋଗ କରୁଛନ୍ତି। ତେଣୁ ସେମାନେ ଟ୍ୟାଙ୍କର ପାଣିରେ ଗାଧୋଇବା, ଗୋରୁ ଧୋଇବା ସହ ଅନ୍ୟାନ୍ୟ କାର୍ଯ୍ୟ କରୁଥିବା ବେଳେ ପାନୀୟ ଜଳ ସଂଗ୍ରହ ପାଇଁ ୨/୩ କିମି ଦୂର ସିଙ୍ଗଡା ନାଳ କୂଳକୁ ଯାଇ ଚୁଆ ଖୋଳୁଛନ୍ତି। ସେହି ଚୁଆରେ ଝରୁଥିବା ଜଳକୁ ସେମାନେ ମାଠିଆରେ ଆଣି ପାନୀୟ ଭାବେ ବ୍ୟବହାର କରୁଛନ୍ତି। ସକାଳୁ ଗଁାର ବହୁ ସଂଖ୍ୟକ ମହିଳା ପୁରୁଷ ଉକ୍ତ ଚୁଆରୁ ପାଣି ସଂଗ୍ରହ କରୁଛନ୍ତି। କେହି କେହି ମୁଣ୍ଡରେ ମୁଣ୍ଡାଇ ପାଣି ଘରକୁ ନେଉଥିବା ବେଳେ କେହି ସାଇକେଲରେ ବୋହି ନେଉଛନ୍ତି।
