ନୂଆଦିଲ୍ଲୀ,୨୩ା୫: ସୁପ୍ରିମକୋର୍ଟ ବିଚାରପତି ନିଯୁକ୍ତି ନେଇ ପୁଣି ୪ ଜଣଙ୍କ ନାମକୁ ସରକାର ବୁଧବାର ମୋହର ମାରିଛନ୍ତି। ଏହି ନିଯୁକ୍ତି ପରେ ସୁପ୍ରିମକୋର୍ଟରେ ମୋଟ ବିଚାରପତିଙ୍କ ସଂଖ୍ୟା ୩୧ରେ ପହଞ୍ଚିବ। ଏବେ ୨୭ ବିଚାରପତି ସର୍ବୋଚ୍ଚ ଅଦାଲତରେ କାର୍ଯ୍ୟରତ ଅଛନ୍ତି। ଯେଉଁ ୪ ଜଣ ବିଚାରପତିଙ୍କ ନାମକୁ ମୋହର ମରାଯାଇଛି, ସେମାନେ ହେଲେ ବିଚାରପତି ଅନିରୁଦ୍ଧ ବୋଷ, ଏ.ଏସ୍. ବୋପାନ୍ନା, ବି.ଆର୍. ଗଭାଇ ଓ ସୂର୍ଯ୍ୟକାନ୍ତ। ବିଚାରପତି ବୋଷ୍ ଓ ବୋପାନ୍ନାଙ୍କ ନାମକୁ ସରକାର ପୂର୍ବରୁ ସୁପ୍ରିମକୋର୍ଟ କଲେଜିୟମ୍କୁ ଫେରାଇ ଦେଇଥିଲେ। ପରେ କଲେଜିୟମ୍ ସେମାନଙ୍କ ନାମରେ ପୁନଃ ମୋହର ମାରିଥିଲେ। ଏଥିସହ ବିଚାରପତି ବି.ଆର୍. ଗଭାଇ ଓ ସୂର୍ଯ୍ୟକାନ୍ତଙ୍କ ନାମକୁ ମଧ୍ୟ କଲେଜିୟମ୍ ସ୍ବୀକୃତି ପ୍ରଦାନ କରିଥିଲେ। ରାଷ୍ଟ୍ରପତିଙ୍କ ମୋହର ପରେ ଏନେଇ ବିଜ୍ଞପ୍ତି ପ୍ରକାଶ ପାଇବ ବୋଲି ଜଣାପଡ଼ିଛି। ବିଚାରପତି ବୋଷ ଏବେ ଝାଡ଼ଖଣ୍ଡ ହାଇକୋର୍ଟର ମୁଖ୍ୟ ବିଚାରପତି ଥିବାବେଳେ ବିଚାରପତି ବୋପାନ୍ନା ଗୁଆହାଟୀ ହାଇକୋର୍ଟର ମୁଖ୍ୟ ବିଚାରପତି ଅଛନ୍ତି। ବିଚାରପତି ଗଭାଇ ବମ୍ବେ ହାଇକୋର୍ଟର ବିଚାରପତି ଥିବାବେଳେ ବିଚାରପତି ସୂର୍ଯ୍ୟକାନ୍ତ ହିମାଚଳ ପ୍ରଦେଶର ମୁଖ୍ୟ ବିଚାରପତିଭାବେ କାର୍ଯ୍ୟ କରୁଛନ୍ତି।
