କଣିହାଁ,୧୭ା୨(ଡି.ଏନ.ଏ.) ଅନୁଗୋଳ ଜିଲା କଣିହାଁ ବ୍ଲକ କରଡେଇ-ବୁରୁବାହାଳ ଗ୍ରାମ ଏରିଆରେ ଟିକିରା ନଦୀରେ ପୋଲ ନିର୍ମାଣ କାର୍ଯ୍ୟରେ ବିଳମ୍ବ ହେଉଥିବା ନେଇ ଅଭିଯୋଗ ହୋଇଛି। ଧାର୍ଯ୍ୟ ସମୟ ମଧ୍ୟରେ କାମ ସମ୍ପୂର୍ଣ୍ଣ ନ ହେବାକୁ ନେଇ ସାଧାରଣରେ ଅସନ୍ତୋଷ ଦେଖାଦେଇଛି। ଏଥିଯୋଗୁ ଉପକୃତ ହେବାକୁ ଥିବା ଲୋକେ ପୋଲ କାମ ଶେଷ ହେବାକୁ ନେଇ ଅପେକ୍ଷା କରିଥିବାବେଳେ କାମ ନେଇଥିବା ଠିକାସଂସ୍ଥା ନିର୍ମାଣ କାର୍ଯ୍ୟରେ ଅବହେଳା କରୁଥିବା ଲୋକେ ଅଭିଯୋଗ ଆଣିଛନ୍ତି।
ସୂଚନା ମୁତାବକ, ବିଜୁ ସେତୁ ଯୋଜନାରେ ୨୦୧୮ରେ ଗ୍ରାମ୍ୟ ଉନ୍ନୟନ ବିଭାଗ ତରଫରୁ ଭୂମିପୂଜା କରାଯାଇଥିଲା। ଏଥିପାଇଁ ପ୍ରାୟ ୮ କୋଟି ୮୭ ହଜାର ଟଙ୍କା ମଞ୍ଜୁର କରାଯାଇଥିଲା। ୨୦୨୦ ମାର୍ଚ୍ଚ ସୁଦ୍ଧା କାମ ଶେଷ ହେବ ବୋଲି ସମୟ ଧାର୍ଯ୍ୟ ହୋଇଥିଲା। ହେଲେ କାମ ନେଇଥିବା ଠିକାସଂସ୍ଥା ଏପର୍ଯ୍ୟନ୍ତ ଗୋଟିଏ ବି ପୋଲସ୍ତମ୍ଭର ନିର୍ମାଣ ମଧ୍ୟ ସମ୍ପୂର୍ଣ୍ଣ କରିପାରି ନ ଥିବା ଅଭିଯୋଗ ହୋଇଛି। ଫଳରେ ନିର୍ଦ୍ଧାରିତ ସମୟ ମଧ୍ୟରେ କାମ ଶେଷ ହେବାକୁ ନେଇ ଅନିଶ୍ଚିତତା ଦେଖାଦେଇଛି। ଅନ୍ୟପକ୍ଷରେ ସମ୍ପୃକ୍ତ ଠିକାସଂସ୍ଥା ମାଟି ଓ କଂକ୍ରିଟ କାମକୁ ନେଇ ବିଲ୍ ଉଠାଇବାକୁ ଚେଷ୍ଟା କରୁଥିବା ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି। ଏହି ସେତୁ ଦ୍ୱାରା ୧୫ଟି ଗ୍ରାମର ଜନସାଧାରଣ ଉପକୃତ ହେବେ ବୋଲି କୁହାଯାଇଥିଲେ ହେଁ କାମର ମନ୍ଥର ଗତି ସେମାନଙ୍କ ଅସୁବିଧାକୁ ଦୀର୍ଘ କରିଛି। ଏହାକୁ ନେଇ ରବିବାର ତାଳଚେର ବିଧାୟକ ବ୍ରଜକିଶୋର ପ୍ରଧାନ ପୋଲ ନିର୍ମାଣ ସ୍ଥଳ ପରିଦର୍ଶନ କରିଥିଲେ। ଅଞ୍ଚଳବାସୀ ବିଧାୟକଙ୍କୁ ଏ ବାବଦରେ ଦୃଷ୍ଟି ଆକର୍ଷଣ କରିଥିବା ଜଣାଯାଇଛି। ବିଧାୟକଙ୍କୁ ଏ ସଂକ୍ରାନ୍ତରେ ଯୋଗାଯୋଗ ସତ୍ତ୍ୱେ ମତାମତ ମିଳିପାରି ନାହିଁ। ତେବେ ଗ୍ରାମ୍ୟ ଉନ୍ନୟନ ବିଭାଗ ତାଳଚେର ଏସଡିଓ କୁମୁଦଚନ୍ଦ୍ର ଦେହୁରି କହିଛନ୍ତି, ପୋଲ ନିର୍ମାଣ କାର୍ଯ୍ୟ ଚାଲିଛି। ସମଲ ବ୍ୟାରେଜ ଆନିକଟ ଜଳକୁ ନେଇ ପାଣି ଭିତରେ କାର୍ଯ୍ୟ କରିବା ବେଳେ ଟେକ୍ନିକାଲ ସମସ୍ୟାରେ ସୁଧାର ପାଇଁ ଚେଷ୍ଟା ଚାଲିଛି। ଠିକାସଂସ୍ଥା କାମ ସମ୍ପୂର୍ଣ୍ଣ କରିବ। ୨୦୨୧ ସୁଦ୍ଧା ପୋଲ କାର୍ଯ୍ୟ ସରିବ ବୋଲି ଆକଳନ ହୋଇଛି। ନିମ୍ନମାନର କାମ ହେଉ ନାହିଁ ବୋଲି ଏସ୍ଡିଓ ପ୍ରକାଶ କରିଥିଲେ।
