ନୂଆଦିଲ୍ଲୀ,୯।୨: ନିର୍ଭୟା ଗଣବଳାତ୍କାର ମାମଲାର ୪ ଦୋଷୀଙ୍କୁ ଆସନ୍ତା ମାର୍ଚ୍ଚ ୩ ସକାଳ ୬ଟାରେ ଫାଶୀ ଦେବାକୁ ନେଇ ତୃତୀୟ ଥର ଲାଗି ଡେଥ୍ ଓ୍ବାରେଣ୍ଟ ଜାରି କରାଯାଇଛି। ହେଲେ ଏଥିରୁ ବଞ୍ଚିବାକୁ ଏମାନେ ପୁଣି ଉଦ୍ୟମ କରିଛନ୍ତି। ଏହି ମାମଲାର ଅନ୍ୟତମ ଦୋଷୀ ଅକ୍ଷୟ କୁମାର ସିଂଙ୍କ ଆଇନର ସମସ୍ତ ବିକଳ୍ପ ଶେଷ ହୋଇଥିବା ବେଳେ ଶନିବାର ସେ ଦ୍ୱିତୀୟ ଥର ଲାଗି କ୍ଷମା ଆବେଦନ କରିଛନ୍ତି। ପ୍ରଥମେ ଅକ୍ଷୟଙ୍କ କ୍ଷମା ଆବେଦନକୁ ରାଷ୍ଟ୍ରପତି ରାମନାଥ କୋବିନ୍ଦ ଖାରଜ କରିଦେଇଥିଲେ। ଏବେ ଅକ୍ଷୟଙ୍କ ଓକିଲ ଦର୍ଶାଇଛନ୍ତି ଯେ ପ୍ରଥମ କ୍ଷମା ଆବେଦନ ଅକ୍ଷୟଙ୍କ ମାତାପିତା ଦାଖଲ କରିଥିଲେ। ଯେଉଁଥିରେ ସମସ୍ତ ତଥ୍ୟ ଦିଆଯାଇ ନ ଥିଲା। ତେଣୁ ଅକ୍ଷୟଙ୍କ ଓକିଲ ଏପି ସିଂ କହିଛନ୍ତି ରାଷ୍ଟ୍ରପତି ମାମଲାର ସମ୍ପୂର୍ଣ୍ଣ ଦିଗ ଦେଖି ନ ଥିବାରୁ ଅକ୍ଷୟ ପୁଣିଥରେ କ୍ଷମା ଆବେଦନ କରିଛନ୍ତି। ଏବେ ଏହାକୁ ନେଇ ଆଲୋଚନା ହେଉଛି କି ମାର୍ଚ୍ଚ ୩ରେ ଥିବା ଫାଶୀ ଦଣ୍ଡକୁ ଘୁଞ୍ଚାଇବାକୁ ଦୋଷୀଙ୍କର ଏହା ଏକ ନୂଆ ଉଦ୍ୟମ।
