ବଅଁରପାଳ,୧ା୬(ଡି.ଏନ.ଏ.) ପ୍ରତି ଘରେ ପହଞ୍ଚିବ ପାଇପ୍ ପାଣି। ଲୋକଙ୍କୁ ସ୍ବଚ୍ଛ ପାନୀୟ ଜଳ ଯୋଗାଇବାକୁ ବର୍ଷ ବର୍ଷ ଧରି ଏପରି ଆଶ୍ୱାସନା ଦେଉଛନ୍ତି ସରକାର। ହେଲେ ଘର ତ ଦୂରର କଥା ସମସ୍ତ ଗାଁରେ ମଧ୍ୟ ଏଯାଏ ପହଞ୍ଚିନି ସରକାରଙ୍କ ପାନୀୟ ଜଳ ପ୍ରକଳ୍ପ ଯୋଜନା। ଫଳରେ କେଉଁଠି ଖୋଲାକୂଅ ତ ଅନ୍ୟକେଉଁଠି ନଦୀ, ନାଳ ନଚେତ ଚୁଆ ପାଣି ପିଇବାକୁ ପଡ଼ୁଛି ଲୋକଙ୍କୁ। ଅନୁଗୋଳ ଜିଲା ବଅଁରପାଳ ବ୍ଲକ କୁକୁଡାଙ୍ଗ ପଞ୍ଚାୟତର ରଙ୍କାସିଂହା ଗ୍ରାମବାସୀ ବି ଏପରି ସମସ୍ୟାର ସମ୍ମୁଖୀନ ହେଉଛନ୍ତି। ପଡ଼ୋଶୀ ଗାଁରେ ଜଳ ପ୍ରକଳ୍ପ ଥିଲେ ମଧ୍ୟ ରଙ୍କାସିଂହାକୁ ପାଇପ୍ ସଂଯୋଗ ହୋଇପାରି ନାହିଁ। ଫଳରେ ନଳକୂଅ ପାଣି ପର୍ଯ୍ୟାପ୍ତ ହେଉ ନ ଥିବାରୁ ଖରାଦିନେ ଏଠାକାର ଲୋକେ ନିକଟସ୍ଥ ନନ୍ଦିରା ଉପରେ ନିର୍ଭର କରୁଛନ୍ତି।
ରଙ୍କାସିଂହା ଗ୍ରାମରେ ପ୍ରାୟ ୮୦ ପରିବାର ରୁହନ୍ତି। ପାନୀୟ ଜଳ ପାଇଁ ଏଠାରେ ୭ ନଳକୂଅ ଓ ଗୋଟିଏ ଖୋଲା କୂଅ ବ୍ୟବସ୍ଥା ଅଛି। ହେଲେ ସେଥିରୁ ୪ଟି ନଳକୂଅ ଅଚଳ ହୋଇପଡିଛି। ବାକି ୩ ନଳକୂଅ ଭୂତଳ ଜଳ ହ୍ରାସ କାରଣରୁ ଆବଶ୍ୟକ ପରିମାଣର ପାଣି ଯୋଗାଇ ପାରୁନାହିଁ। ତେଣୁ ବହୁ ସମୟରେ ଲୋକେ ଗ୍ରାମ ନିକଟ ନନ୍ଦିରାନାଳର ଅପରିଷ୍କାର ପାଣି ବ୍ୟବହାର କରୁଛନ୍ତି। ଗ୍ରାମର ଜଲି ରାଣୀ ଦାସ, ସୁଭଦ୍ରା ଦାସ, ରଶ୍ମି ଦାସ, ଶିଶିର ଦାସ ପ୍ରମୁଖ କହିଛନ୍ତି, ପଡୋଶୀ ଗ୍ରାମକୁ ପାଇପ୍ ଯୋଗେ ପାନୀୟ ଜଳ ଯୋଗାଣ ହୋଇଥିଲେ ହେଁ ରଙ୍କାସିଂହା ସେଥିରୁ ବଞ୍ଚିତ ରହିଛି। ଏ ନେଇ ପ୍ରଶାସନ ନିକଟରେ ବାରମ୍ବାର ଅଭିଯୋଗ କରାଯାଇଛି। ହେଲେ ଏଯାଏ କୌଣସି ପଦକ୍ଷେପ ନିଆଯାଉ ନ ଥିବାରୁ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଅଚଳ ନଳକୂଅଗୁଡ଼ିକୁ ମଧ୍ୟ ମରାମତି କରାଯାଉ ନାହିଁ। ତେଣୁ ପାନୀୟ ଜଳର ଅଭାବ ମେଣ୍ଟାଇବାକୁ ବାଧ୍ୟ ହୋଇ ନନ୍ଦିରା ପାଣି ଘରକୁ ନେବାକୁ ପଡ଼ିୁଛି ବୋଲି ଗ୍ରାମବାସୀ ପ୍ରକାଶ କରିଛନ୍ତି। ସରପଞ୍ଚ ପ୍ରତାପ ସେନାପତି କହିଛନ୍ତି, ରଙ୍କାସିଂହାକୁ ପାଇପ୍ ପାଣି ପହଞ୍ଚି ନ ଥିବାରୁ ସେଠାରେ ଜଳ ସଙ୍କଟ ରହିଛି। ଯେତେଶୀଘ୍ର ସମ୍ଭବ ପାଇପ୍ ପାଣି ବ୍ୟବସ୍ଥା କରିବାକୁ ପ୍ରଶାସନକୁ ପ୍ରସ୍ତାବ ଦିଆଯାଇଛି। ବଅଁରପାଳ ବିଡିଓ ଏଲିଜା ମିଶ୍ର କହିଛନ୍ତି, ଯଦି ଉକ୍ତ ଗ୍ରାମରେ ଜଳ ସଙ୍କଟ ଥାଏ ତାହାର ଅନୁଧ୍ୟାନ କରାଯାଇ ପଦକ୍ଷେପ ଗ୍ରହଣ କରାଯିବ।
