ନୂଆଦିଲ୍ଲୀ,୨୭।୧୧(ପି.ଟି.)- ଭାରତୀୟ ଦଳର ନିୟମିତ ଓପନର ଶିଖର ଧାଓ୍ବନ
ଓ୍ବଷ୍ଟଇଣ୍ଡିଜ ବିପକ୍ଷରେ ଖେଳାଯିବାକୁ ଥିବା ଟି୨୦ ସିରିଜ୍ରୁ ବାଦ୍ ପଡ଼ିଛନ୍ତି। ଆହତ ସମସ୍ୟା କାରଣରୁ ତାଙ୍କୁ ଏଭଳି ସମସ୍ୟାର ସମ୍ମୁଖୀନ ହେବାକୁ ପଡ଼ିଛି। ମହାରାଷ୍ଟ୍ର ବିପକ୍ଷ ସୟଦ ମୁସ୍ତାକ ଅଲି ଟୁର୍ନାମେଣ୍ଟବେଳେ ଧାଓ୍ବନଙ୍କ ବାମ ଗୋଡ଼ରେ ଗଭିର କଟ୍ ଲାଗିଥିବା ବିସିସିଆଇ ପକ୍ଷରୁ ଏକ ବିବୃତିରେ କୁହାଯାଇଛି। ବିସିସିଆଇର ମେଡିକାଲ ଦଳ ଧାଓ୍ବନଙ୍କ ଆହତ ସମସ୍ୟାର ଯାଞ୍ଚ କରିଥିଲା। ଷ୍ଟିଚ୍ ଖୋଲ ହେବା ପୂର୍ବରୁ ତାଙ୍କୁ ଆହୁରି ବିଶ୍ରାମ ନେବାକୁ ଡାକ୍ତର ପରାମର୍ଶ ଦେଇଥିବା କୁହାଯାଇଛି। ଏଣୁ ଜାତୀୟ ଚୟନ କମିଟି ତାଙ୍କ ବଦଳରେ ଯୁବ ଉଇକେଟକିପର ବ୍ୟାଟ୍ସମ୍ୟାନ ସଞ୍ଜୁ ସମାସନଙ୍କୁ ସୁଯୋଗ ଦେଇଛି। ଗତ ବାଂଲାଦେଶ ବିପକ୍ଷ ସିରିଜ୍ରେ ତାଙ୍କୁ ଦଳରେ ସାମିଲ କରାଯାଇଥିଲା। ହେଲେ ଚୂଡ଼ାନ୍ତ ଏକାଦଶରେ ସ୍ଥାନ ପାଇ ନ ଥିଲେ। ଓ୍ବେଷ୍ଟଇଣ୍ଡିଜ ବିପକ୍ଷ ଟି୨୦ ସିରିଜ୍ର ପ୍ରଥମ ମ୍ୟାଚ୍ ଆସନ୍ତା ୬ ତାରିଖରେ ହାଇଦ୍ରାବାଦଠାରେ ଅନୁଷ୍ଠିତ ହେବ। ପରବର୍ତ୍ତୀ ଦୁଇ ମ୍ୟାଚ୍ ଥିରୁଭାନନ୍ତପୁରମ (ଡିସେମ୍ବର ୮) ଓ ମୁମ୍ବାଇ (ଡିସେମ୍ବର ୧୧)ରେ ଖେଳାଯିବାର ଅଛି। ସାମସନଙ୍କୁ ମ୍ୟାଚ୍ରେ ଖେଳିବାକୁ ସୁଯୋଗ ନ ଦେଇ ଦଳରୁ ବିଦା କରିବା ଲାଗି ଚୟନ କମିଟିକୁ ବହୁ ପୂର୍ବତନ ଖେଳାଳି ସମାଲୋଚନା କରିଥିଲେ। ୩୩ ବର୍ଷୀୟ ଧାଓ୍ବନ ଦିନିକିଆ ସିରିଜ୍ ପୂର୍ବରୁ ଫିଟ୍ ହୋଇଯିବେ ବୋଲି ଆଶା କରାଯାଉଛି। କିନ୍ତୁ ସେ ଏବେ ଖରାପ ଫର୍ମ ଯୋଗୁ ଚାପରେ ଅଛନ୍ତି। ବାଂଲାଦେଶ ବିପକ୍ଷ ୩ ମ୍ୟାଚ୍ ବିଶିଷ୍ଟ ଟି୨୦ ସିରିଜ୍ରେ ସେ ମୋଟ ୯୧ ରନ୍ କରିଥିଲେ। ଚଳିତ ସୟଦ ମୁସ୍ତାକ ଅଲି ପ୍ରତିଯୋଗିତାରେ ମଧ୍ୟ ସେ ଭଲ ପ୍ରଦର୍ଶନ କରିପାରି ନାହାନ୍ତି। ଉଲ୍ଲେଖଥାଉ କି, ଓ୍ବେଷ୍ଟଇଣ୍ଡିଜ ବିପକ୍ଷ ଦିନିକିଆ ସିରିଜ୍ ଡିସେମ୍ବର ୧୫ ତାରିଖରୁ ଆରମ୍ଭ ହେବ। ସିରିଜ୍ର ତୃତୀୟ ତଥା ଅନ୍ତିମ ମ୍ୟାଚ୍ ୨୨ ତାରିଖରେ କଟକର ବାରବାଟୀ ଷ୍ଟାଡିୟମ୍ରେ ଖେଳାଯିବ।
ଭାରତୀୟ ଦଳ: ବିରାଟ କୋହଲି (ଅଧିନାୟକ), ରୋହିତ ଶର୍ମା (ଉପ ଅଧିନାୟକ), ଲୋକେଶ ରାହୁଲ, ଶ୍ରେୟାସ ଆୟାର, ମନୀଷ ପାଣ୍ଡେ, ରିଷଭ ପନ୍ତ(ଉଇକେଟକିପର), ଶିବମ ଦୁବେ, ଓ୍ବଶିଂଟନ ସୁନ୍ଦର, ରବୀନ୍ଦର ଜାଡେଜା, ୟୁଜବେନ୍ଦ୍ର ଚହଲ, କୁଲଦୀପ ଯାଦବ, ଦୀପକ ଚହର, ମହମ୍ମଦ ଶାମି, ଭୁବନେଶ୍ୱର କୁମାର ଓ ସଞ୍ଜୁ ସାମସନ।
