ଅତାବିରା, ୬।୬ (ଡି.ଏନ.ଏ): ବରଗଡ଼ ଜିଲା ପାଇକମାଲ ବ୍ଲକ ଜାମସେଦ ପଁଚେତ୍ ଉରୁଆମୁଣ୍ଡା ଗାଁର ପଦ୍ମିନୀ ଆର କ୍ଷୀରସାଗର ତାଣ୍ଡିକଁର ପୁଓ ଜଗନ୍ନାଥ ତାଣ୍ଡି(୧୧)। ସେ ଜନମୁ ଦିବ୍ୟାଙ୍ଗ ଆଏ, ତାକର ଦୁଇହାତ୍ ଗୋଡ଼ ନାଁଇଁନ। ମା’ବାପ୍ ପୁଓ ଦିବ୍ୟାଙ୍ଗ ବଲି ଦେଖ୍ଭାଲ କେଭେ ହେଲା ନାଇଁକରି। ଜଗନ୍ନାଥକେ ୩ ବଛର ହେଲାରୁ ମା’ବାପ୍ ତାକର ନାଁ ଗାଁର ଅଙ୍ଗନଓ୍ବାଡିରେ ଲେଖାଲେ। ପଛେ ପାଠ୍ପଢ଼ାରେ ତାକର ରୁଚି ଦେଖି ମା’ବାପ୍ ଗାଁର ଉଚ୍ଚ ପ୍ରାଥମିକ ବିଦ୍ୟାଳୟରେ ନାଁ ଲେଖାଲେ। ଏହେଦେ ସେ ୬ଷ୍ଠ ଶ୍ରେଣୀରେ ପାଠ୍ ପଢ଼ୁଛନ୍। ହେଲେ ଜଗନ୍ନାଥ ଚାଲିବୁଲି ନାଇଁ ପାରବାର, ଘରୁ ଯେ ହେଲେ ଝନେ ତାହାକୁ ସ୍କୁଲକେ ନେବାର ଆନବାର କରୁଛନ୍। ମା’ବାପ୍ ନିହାତି ଗରିବ୍ ହେଇଥିଲେ ବି ଜଗନ୍ନାଥର ପାଠ୍ପଢ଼ାରେ ଉନା ନାଇଁ କରବାର। ଇଆଡ଼େ ଜଗନ୍ନାଥକଁର ଉଚ ଶିକ୍ଷା ଲାଗି ବଡ଼ଭାରି ରୁଚି ରହିଛେ। ସେ ପାଠ୍ପଢ଼ି ଝନେ ଭଲ ମୁନୁଷ ହେବାର ସଂଗେ ସରକାରୀ ଚାକରି କରବାର ଲଖିଅ ରଖିଛନ୍। ହେଲେ ଘରେ ଅଭାବ ଅନାଟନ ସବୁବେଲେ ଲାଗି ରହିଛେ, ଏନ୍ତାଥି ମା’ବାପ୍ ଜଗନ୍ନାଥକେ ଆଗ୍କେ ପଢ଼େଇ ପାରବେ କି ନାଇଁ ସେ ଚିନ୍ତାରେ ରହିଛନ୍। ଇଆଡ଼େ ଜଗନ୍ନାଥ ସରକାରୀ ସୁବିଧା ବଏଲେ ଖାଲି ଭିନ୍ନକ୍ଷମ ଭତା ପାଉଛନ୍। ଏହେଦେ ସେ ମାମୁ ଗାଁ ଭେଡ଼େନ ବ୍ଲକ ବୁର୍ଦ୍ଧା ଗାଁକେ ଖରାଛୁଟି ବିତାବାର ଲାଗି ଆସିଛନ୍। ଇ ସମିଆରେ ଥାନୀୟ ଧରିତ୍ରୀ ପରତିନିଧି ଦିବ୍ୟାଙ୍ଗ ଜଗନ୍ନାଥକୁଁ ଭେଟି ତାକର ଲଖିଅ ଆର ସୁବିଧା ଅସବିଧା ବାବ୍ଦେ ପଚାରି ବୁଝିଥିଲେ। ଆମେ ଗରିବ୍ ଲୋକ୍ ଘରେ ସବୁବେଲେ ଅଭାବ ଅନାଟନ ଲାଗି ରହୁଛେ। ମୁଇଁ ଝନେ ଭିନ୍ନକ୍ଷମ ଆଏ, ପାଠ୍ପଢ଼ି ଭଲ ମୁନୁଷ ହେବାର ସଂଗେ ଗୁଟେ ସରକାରୀ ଚାକରି କରବାର ଲଖିଅ ରଖିଛେଁ। ହେଲେ ଅଭାବ ଅନାଟନ ଲାଗି ଆଗ୍କେ କାଣା ହେବା ମୁଇଁ ନାଇଁ କହିପାରେଁ। ହଁ, ଯଦି ପାଠ୍ପଢ଼ାର ଲାଗି ସରକାରୀ ସାହାଯ୍ ମିଲବା ତ ନିହାତି ମୋର ଲଖିଅ ପୂରନ କରମି ବଲି ଜଗନ୍ନାଥ କହିଥିଲେ। ଦିବ୍ୟାଙ୍ଗ ଜଗନ୍ନାଥକୁଁ ପଶ୍ଚିମ ଓଡ଼ିଶା ଟ୍ରାଫିକ ସଚେତନତା ସଂଯୋଜକ ପଦ୍ମଲୋଚନ ଭୋରାସାଗର ଭେଟି କିଛି ଆରଥିକ୍ ସାହାଯ୍ ଦେଇଛନ୍। ଜଗନ୍ନାଥ ଯେନ୍ଥେଇ ସବୁପରକାର ସରକାରୀ ସାହାଯ୍ ପାଇପାରବେ ସେଥିରଲାଗି ପରଶାସନର ଦୁରୁଷ୍ଟି ଆକରଷନ୍ କରବାକେ ପଦ୍ମଲୋଚନ କଥା ଦେଇଛନ୍।
