ବିରିଡ଼ି,୨୦।୬(ଡି.ଏନ.ଏ.): ବାଲିକୁଦା-ଏରସମା ବିଧାୟକ ରଘୁନନ୍ଦନ ଦାସଙ୍କୁ ଜଳସମ୍ପଦ ବିଭାଗ ମନ୍ତ୍ରୀ ପଦ ମିଳିବା ପରେ ଜଗତସିଂହପୁର ଜିଲାରେ ଏହି ବିଭାଗର କାର୍ଯ୍ୟ ତ୍ୱରାନ୍ବିତ ହୋଇଛି। ବିଭାଗୀୟ ମୁଖ୍ୟଯନ୍ତ୍ରୀଙ୍କଠାରୁ ଆରମ୍ଭ କରି ଅଧିକ୍ଷଣ ଯନ୍ତ୍ରୀଙ୍କ ପର୍ଯ୍ୟନ୍ତ ସମସ୍ତେ ଜିଲା ପରିଦର୍ଶନରେ ଆସି ବିଭିନ୍ନ କାର୍ଯ୍ୟ ତଦାରଖ କରୁଛନ୍ତି। ଏହି କ୍ରମରେ ବନ୍ୟା ମୁକାବିଲା ପାଇଁ ବୁଧବାର ମୁଖ୍ୟଯନ୍ତ୍ରୀ ବନ୍ଧ ନିରାପତ୍ତା ବିଭାଗ ସୁନିଲ ନାୟକ, ଇଷ୍ଟର୍ନ ସର୍କଲର ଅଧିକ୍ଷଣ ଯନ୍ତ୍ରୀ ବାଲେଶ୍ୱରନାଥ ସାହୁ, ଜଗତ୍ସିଂହପୁର ନିର୍ବାହୀଯନ୍ତ୍ରୀ ଉମାକାନ୍ତ ମହାନ୍ତି, ବାଲିଆ ସହକାରୀ ନିର୍ବାହୀ ଯନ୍ତ୍ରୀ ଦଳପତି ମଣ୍ଡଳ ଓ ଦଳେଇଘାଇ ସହାକାରୀ ଯନ୍ତ୍ରୀ ସୁବୋଧ ମହାପାତ୍ର ପ୍ରମୁଖ ଦଳେଇଘାଇ ନଦୀବନ୍ଧ ପରିଦର୍ଶନ କରିଛନ୍ତି। ଏହି ଅବସରରେ ତୁରନ୍ତ ଦଳେଇଘାଇ ସେକ୍ସନରେ ୨୭୫ ଘନମିଟର ବାଲି, ୧୫ ହଜାର ଖାଲି ଗନି ବ୍ୟାଗ, ଶଙ୍ଖାରୀସାହି ସେକ୍ସନରେ ୪ ଶହ ଘନମିଟର ବାଲି ଓ ୩୦ ହଜାର ଖାଲି ଗନି ବ୍ୟାଗ, ବାଲିଆ ସେକ୍ସନରେ ୪ ଶହ ଘନମିଟର ବାଲି ସହ ୧୫ ହଜାର ଖାଲି ଗନି ବ୍ୟାଗ ମହଜୁଦ ରଖିବାକୁ ମୁଖ୍ୟଯନ୍ତ୍ରୀ ନାୟକ ଜଗତ୍ସିଂହପୁର ନିର୍ବାହୀ ଯନ୍ତ୍ରୀ ଓ ବାଲିଆ ସହକାରୀ ନିର୍ବାହୀ ଯନ୍ତ୍ରୀଙ୍କୁ ନିର୍ଦ୍ଦେଶ ଦେଇଛନ୍ତି। ବିଶେଷକରି ପ୍ରତ୍ୟେକ ସେକ୍ସନରେ କନିଷ୍ଠ ଯନ୍ତ୍ରୀମାନେ ସବୁଦିନ ଉପସ୍ଥିତ ରହିବାକୁ ନିର୍ଦ୍ଦେଶ ଦେଇଛନ୍ତି। ଯିଏ ଅଫିସ ନ ଆସି କାର୍ଯ୍ୟରେ ଖିଳାପ କରିବେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି। ପରେ ସେ ମାଛଗଁା କନୋଲର ଦୁରାବସ୍ଥା ଦେଖିଥିଲେ। ଯେପରି କୃତ୍ରିମ ବନ୍ୟା ନ ହୁଏ, ସେଥିପ୍ରତି ସଜାଗ ରହିବାକୁ ଯନ୍ତ୍ରୀମାନଙ୍କୁ ପରାମର୍ଶ ଦେଇଛନ୍ତି। ସେହିପରି ଶାଖା, ଉପଶାଖା କେନାଲଗୁଡିକ କିପରି ସଫା କରାଯିବ ସେଥିପାଇଁ ଧ୍ୟାନ ଦେବାକୁ ଅଧୀକ୍ଷଣ ଯନ୍ତ୍ରୀ ସାହୁ ଯନ୍ତ୍ରୀମାନଙ୍କୁ କହିଛନ୍ତି।
