ଢେଙ୍କାନାଳ ଅଫିସ, ୭।୧
ପଡ଼ୋଶୀ ଜିଲାରୁ ଢେଙ୍କାନାଳକୁ ଚାଲିଆସିଥିବା ହାତୀପଲ ବାହୁଡ଼ିବା ଆରମ୍ଭ କରିଛନ୍ତି। ଗତ ଅଗଷ୍ଟରୁ ଚଳିତ ୫ ତାରିଖ ସୁଦ୍ଧା ୧୧୦ ହାତୀ ଅନ୍ୟ ଜିଲାକୁ ପଳାଇଛନ୍ତି। ପୂର୍ବ ବାସସ୍ଥାନକୁ ହାତୀ ଫେରିବା ପରେ ଜିଲା ବନ ବିଭାଗ ସାମାନ୍ୟ ଆଶ୍ୱସ୍ତି ହୋଇଛି। ୨୦୧୯ ବର୍ଷରେ ହାତୀପଲ ପରଜଙ୍ଗ ବ୍ଲକରେ ସର୍ବାଧିକ କ୍ଷତି କରିଥିବା ଜିଲା ବନଖଣ୍ଡ ଅଧିକାରୀ ବିମଳ ପ୍ରସନ୍ନ ଆଚାର୍ଯ୍ୟ ସୂଚନା ଦେଇଛନ୍ତି।
ସରକାରୀ ଭାବେ ଢେଙ୍କାନାଳରେ ୧୬୬ ହାତୀ ଥିବା ଗଣନାରୁ ଜଣାପଡ଼ିଛି। ହେଲେ ଏଠାକାର ଥଣ୍ଡା ଜଳବାୟୁ, ସଂରକ୍ଷିତ ଜଙ୍ଗଲରେ ଖାଦ୍ୟ ଲୋଭରେ ଜିଲା ବାହାରୁ ଶତାଧିକ ହାତୀ ପଳାଇ ଆସିଥିଲେ। ଫଳରେ ହାତୀସଂଖ୍ୟା ୨୫୦ ଟପି ଯାଇଥିଲା। ଅନ୍ୟପଟେ ହାତୀଙ୍କ ଦ୍ୱାରା ବ୍ୟାପକ ଫସଲ ହାନି, ସେମାନଙ୍କୁ ଘଉଡ଼ାଇବାକୁ ଯାଇ ବନ ବିଭାଗ ନାକେଦମ ହେବା ଗତବର୍ଷ ମୁଖ୍ୟ ସମସ୍ୟା ପାଲଟିଥିଲା। ଏଣିକି ବନ ବିଭାଗ ପକ୍ଷରୁ ଜିଲାର ସମସ୍ତ ୮ ରେଞ୍ଜ୍ରେ ପ୍ରତିଦିନ ହାତୀଙ୍କ ଗତିବିଧି ଉପରେ ନଜର ରଖାଯାଉଛି। ସେମାନଙ୍କ ସଂଖ୍ୟା ଆକଳନ କରାଯାଇ ରାଜ୍ୟ ଉଚ୍ଚ କର୍ତ୍ତୃପକ୍ଷଙ୍କ ନିକଟକୁ ପଠାଯାଉଥିବା ବନ ବିଭାଗ ପକ୍ଷରୁ କୁହାଯାଇଛି।
ମିଳିଥିବା ସୂଚନା ଅନୁଯାୟୀ, ଗତ ଅଗଷ୍ଟରେ ଜିଲାରେ ମୋଟ ହାତୀସଂଖ୍ୟା ୨୬୧ ଥିଲା। ଜାନୁୟାରୀ ୫ ସୁଦ୍ଧା ୧୧୦ ହାତୀ ପଡ଼ୋଶୀ ଜିଲାକୁ ପଳାଇଛନ୍ତି। ତନ୍ମଧ୍ୟରେ ୫୦ଟି ଢେଙ୍କାନାଳ ସୀମାନ୍ତ ଆଠଗଡ଼ ବନାଞ୍ଚଳରେ ଅଛନ୍ତି। ଅନ୍ୟ ୬୦ଟି ଅନୁଗୋଳ ଏବଂ କେନ୍ଦୁଝର ଜିଲାକୁ ପଳାଇଛନ୍ତି। ଢେଙ୍କାନାଳ ଜିଲାର ବିଭିନ୍ନ ସ୍ଥାନରେ ଏବେ ୧୫୦ ହାତୀ ଚଳପ୍ରଚଳ କରୁଛନ୍ତି। ଗତବର୍ଷ ହାତୀ ଉପଦ୍ରବରେ ସର୍ବାଧିକ ପ୍ରଭାବିତ ହୋଇଥିଲା ପରଜଙ୍ଗ ବ୍ଲକ। ୨୦୧୯ରେ ବ୍ଲକର ବିଭିନ୍ନ ଅଞ୍ଚଳରେ ୧୦ରୁ ଊର୍ଦ୍ଧ୍ୱ ବ୍ୟକ୍ତି ହାତୀ ଆକ୍ରମଣର ଶିକାର ହୋଇ ପ୍ରାଣ ହରାଇଥିବାବେଳେ ୪୦ଜଣ ଗୁରୁତର ହୋଇଛନ୍ତି। ହାତୀପଲ ୧୦୦ରୁ ଅଧିକ ଘର ମଧ୍ୟ ଭାଙ୍ଗିଛନ୍ତି। ବ୍ୟାପକ ଫସଲ ଉଜାଡ଼ି ଦେଇଥିବାରୁ ଏହାର ପ୍ରଭାବ ଚାଷୀଙ୍କ ଆର୍ଥିକ ବ୍ୟବସ୍ଥା ଉପରେ ପଡ଼ିଛି।
ଏ ନେଇ ଜିଲା ବନଖଣ୍ଡ ଅଧିକାରୀ କୁହନ୍ତି, ଏଣିକି ଦୈନିକ ହାତୀଙ୍କ ଗତିବିଧି ଏବଂ ସେମାନଙ୍କ ସଂଖ୍ୟାକୁ ନେଇ ସମୀକ୍ଷା କରାଯାଉଛି। ଅଗଷ୍ଟରେ ସେ ଦାୟିତ୍ୱ ଗ୍ରହଣ କରିବା ବେଳେ ଜିଲାରେ ୨୬୧ ହାତୀ ଥିଲେ। ସେଥିରୁ ୧୧୦ ହାତୀ ବାହାର ଜିଲାକୁ ପଳାଇଛନ୍ତି। ଫଳରେ ଉପଦ୍ରବ କିଛି ପରିମାଣରେ କମିଛି। ଫସଲ ଅମଳ ସରିଥିବାରୁ ହାତୀପଲ ଅନ୍ୟ ଜିଲା ମୁହଁା ହୋଇଥିବା ଅନୁମାନ କରାଯାଉଛି।
