ବାରଙ୍ଗ,୨୨ା୭(ଡି.ଏନ୍.ଏ.) : ବାରଙ୍ଗ ଥାନା ଅଞ୍ଚଳରେ ଶନିବାର ରାତିରେ ଡକାୟତି ପାଇଁ ଯୋଜନା ଚାଲିଥିବାବେଳେ ପୋଲିସ ହାବୁଡରେ ୭ଜଣ ଧରାପଡିଛି। ରବିବାର ସେମାନଙ୍କ ବିରୋଧରେ ୧୧୮/୧୯ନଂରେ ଏକ ମାମଲା ରୁଜୁକରି କୋର୍ଟଚାଲାଣ କରିଛି। ଅଭିଯୁକ୍ତମାନେ ହେେଲେ ଏହି ଥାନା ଅଧୀନ ମଧୁପୁର ଗ୍ରାମର ସନ୍ଦିପ ପାଲ ଓ ସୁନୀଲ ମଲ୍ଲିକ, ନିଆଳି ଥାନା ଅଧୀନ କୁଲକୋରକୋର ଗ୍ରାମର ଅଶୋକ ସ୍ବାଇଁ, ଡିଆସିଂପାଟଣା ଗ୍ରାମର ଅଜିତ ସିଂ ଏବଂ ସହରଜପୁର ଗ୍ରାମର ସମ୍ବିତ କୁମାର ଦାସ, କାକଟପୁର ଥାନା ଅଧୀନ ପଥରପକା ଗ୍ରାମର ଲିକୁ ନାୟକ, ନୁଆଗାଁ ଥାନା ଅଧୀନ ଡେରକି ଗ୍ରାମର ମୁକେଶ ସ୍ବାଇଁ। ପୋଲିସ ସେମାନଙ୍କଠାରୁ ଦୁଇଟି ଜୀବନ୍ତ ବୋମା, ଗୋଟିଏ କଟୁରି, ୫ଟି ଲୁହାରଡ, ୬ଟି ମୋବାଇଲଫୋନ, ଟର୍ଚ୍ଚ, ଓଆର୦୨-ୟୁ-୩୯୭୭, ଓଡି୦୫-ଏଏଚ-୮୭୪୮ ଓ ଅନ୍ୟ ଏକ ନମ୍ବରବିହୀନ ଗାଡିକୁ ମିଶାଇ ତିନୋଟି ବାଇକ୍, ଦୁଇ ପ୍ୟାକେଟ ଲଙ୍କାଗୁଣ୍ଡ ଜବତ କରିଛି।
ସୂଚନା ଅନୁଯାୟୀ, ଶନିବାର ରାତିରେ ବାରଙ୍ଗ ପୋଲିସ ପାଟ୍ରୋଲିଂ କରୁଥିବାବେଳେ ମଧୁପୁର ଗ୍ରାମର ଏକ ପଡିଆପାଖରେ ସନ୍ଦିପଙ୍କ ନେତୃତ୍ୱରେ ୬ଜଣ ଯୁବକ ଡକାୟତି ପାଇଁ ଏକାଠି ବସି ଯୋଜନା କରୁଥିବାର କୌଣସିସୂତ୍ରରୁ ଖବରପାଇ ପୋଲିସ ଜାଣିପାରିଥିଲା। ଏ ବିଷୟରେ ପାଟ୍ରୋଲିଂରେ ଥିବା ଅଫିସର ବାରଙ୍ଗ ଥାନା ଅଧିକାରୀ ଶଶିକାନ୍ତ ରାଉତଙ୍କୁ ସୂଚନା ଦିଆଯାଇଥିଲା। ପରେ ଥାନାଧିକାରୀ ସଂଘବଦ୍ଧ ହୋଇ ଉକ୍ତ ପଡିଆ ପାଖରେ ପହଞ୍ଚତ୍ ପ୍ରଥମେ ସନ୍ଦିପକୁ କାବୁ କରିଥିଲେ। ଏହାପରେ ଅନ୍ୟ ୬ଜଣ ଅଭିଯୁକ୍ତଙ୍କୁ ପୋଲିସ ଧରିଥିଲେ। ଘଟଣାସ୍ଥଳରୁ ବହୁ ସାମଗ୍ରୀ ଜବତ କରିଥିଲା। ପରେ ଥାନାକୁ ଆଣି ପଚରାଉଚରା ବେଳେ ସେମାନେ ମଦଦୋକାନ ମାଲିକ ଦେଉଳି ଗ୍ରାମର ହରିହର ସ୍ବାଇଁଙ୍କ ଘରେ ଡକାୟତି ପାଇଁ ଯୋଜନା କରିଥିବାର ପୋଲିସ ଆଗରେ ସ୍ବୀକାର କରିଥିବାର ଥାନାଧିକାରୀ ଶଶିକାନ୍ତ ରାଉତ କହିଛନ୍ତି। ଅଜିତଙ୍କ ନାମରେ ବାରଙ୍ଗ ଓ ନୂଆଗାଁ ଥାନାରେ ୨ଟି ମାମଲା, ସନ୍ଦିପଙ୍କ ନାମରେ ବାରଙ୍ଗ ଥାନାରେ ୩ଟି ମାମଲା, ଅଶୋକଙ୍କ ନାମରେ ବିଭିନ୍ନ ଥାନାରେ ୧୯ଟି ମାମଲା ଥିବାର ପୋଲିସ ପକ୍ଷରୁ ଜଣାପଡ଼ିଛି।
