ନୂଆଦିଲ୍ଲୀ,୧୪।୮: ଝିଅଙ୍କ ସର୍ବନିମ୍ନ ବିବାହ ବୟସ ସୀମାକୁ ୧୮ ବଦଳରେ ୨୧ କରିବାକୁ ଦାବି କରାଯାଇଛି। ଏନେଇ ସୁପ୍ରିମ୍କୋର୍ଟରେ ଏକ ଆବେଦନ ଦାଖଲ କରାଯାଇଛି। ଭାଜପା ନେତା ଅଶ୍ୱିନୀ ଉପାଧ୍ୟାୟ ଏଥିପାଇଁ ଏକ ଆବେଦନ କରିଛନ୍ତି। ଏହାଦ୍ୱାରା ଝିଅଙ୍କ ଆତ୍ମନିର୍ଭରଶୀଳ ହେବା ବାଟରେ ବାଧା ସୃଷ୍ଟି ହେଉଥିବା ଆବେଦନରେ ଉଲ୍ଲେଖ କରାଯାଇଛି। ଭାରତୀୟ ସମାଜରେ ପ୍ରଚଳିତ ଏହି ପରମ୍ପରା ଯୋଗୁ ସମ୍ବିଧାନର ଅନୁଚ୍ଛେଦ ୧୪,୧୫ ଏବଂ ୨୧ର ଉଲ୍ଲଂଘନ ହେଉଛି। ପୃଥିବୀର ୧୨୫ରୁ ଅଧିକ ଦେଶରେ ମହିଳା ଏବଂ ପୁରୁଷଙ୍କ ସର୍ବନିମ୍ନ ବିବାହ ବୟସ ସୀମା ସମାନ ରହିଛି ବୋଲି ଉପାଧ୍ୟାୟ ସୂଚନା ଦେଇଛନ୍ତି। ସେ ଆବେଦନରେ ବିଶ୍ୱସ୍ବାସ୍ଥ୍ୟ ସଂଗଠନର କେତେକ ତଥ୍ୟ ମଧ୍ୟ ଉପସ୍ଥାପନ କରିଛନ୍ତି। ସୂଚନାଯୋଗ୍ୟ, ଝିଅ ଏବଂ ପୁଅଙ୍କ ସର୍ବନିମ୍ନ ବିବାହ ବୟସ ସୀମା ସମାନ କରିବା ପାଇଁ ଗତବର୍ଷ ଜାତୀୟ ମାନବିକ ଅଧିକାର କମିଶନ ପକ୍ଷରୁ ଅଗଷ୍ଟ୨୯ ଓ ୩୦ରେ ହୋଇଥିବା ଏକ ସମ୍ମିଳନୀରେ ଦାବି କରାଯାଇଥିଲା।
