କଟକ ଅଫିସ୍,୧୫।୫: ସୁପ୍ରିମ୍କୋର୍ଟଙ୍କ ନିର୍ଦ୍ଦେଶ କ୍ରମେ ଜେଲ୍ରୁ କଏଦୀଙ୍କୁ ମୁକୁଳାଇବା ନେଇ ଗଠିତ ଉଚ୍ଚ କ୍ଷମତା ସମ୍ପନ୍ନ କମିଟିର ବୈଠକ ଗୁରୁବାର ଅନୁଷ୍ଠିତ ହୋଇଯାଇଛି। ଏଥିରେ ହାଇକୋର୍ଟ ବିଚାରପତି ତଥା ଓଡ଼ିଶା ଆଇନ୍ସେବା ପ୍ରାଧିକରଣର କାର୍ଯ୍ୟକାରୀ ଅଧ୍ୟକ୍ଷ ଜଷ୍ଟିସ୍ ସଞ୍ଜୁ ପଣ୍ଡା, ରାଜ୍ୟ ଗୃହ ବିଭାଗ ପ୍ରମୁଖ ସଚିବ ସଞ୍ଜୀବ ଚୋପ୍ରା ଏବଂ ଡିଜି (ଜେଲ୍) ସନ୍ତୋଷ କୁମାର ଉପାଧ୍ୟାୟ ଯୋଗଦେଇଥିଲେ। ମାର୍ଚ୍ଚ ୨୦ରୁ ମେ’ ୧୨ ତାରିଖ ମଧ୍ୟରେ ରାଜ୍ୟର ବିଭିନ୍ନ ଜେଲ୍ରୁ ୭୨୫୫ଜଣ କଏଦୀ ମୁକୁଳି ଥିବା ବୈଠକରେ ସୂଚନା ଦିଆଯାଇଛି। ଜେଲ୍ଗୁଡ଼ିକରେ କରୋନା ଭୂତାଣୁ ବ୍ୟାପିବା ଆଶଙ୍କା ଥିବାରୁ କଏଦୀଙ୍କ ସ୍ବାସ୍ଥ୍ୟ ସୁରକ୍ଷା ଦିଗରେ ବିଭିନ୍ନ ପଦକ୍ଷେପ ନିଆଯାଉଛି। ବୈଠକରେ ଡିଜି (ଜେଲ୍) ଉପାଧ୍ୟାୟ ସୂଚନା ଦେଇଥିଲେ ଯେ, ରାଜ୍ୟର ୮୬ଟି ଜେଲ୍ରେ ୧୯ହଜାର ୧୬ଜଣ କଏଦୀଙ୍କୁ ରଖାଯିବା ସୁବିଧା ରହିଛି। ମେ’ ୧୩ ତାରିଖ ସୁଦ୍ଧା ଜେଲ୍ଗୁଡ଼ିକରେ ୧୬ହଜାର ୯୩୧ ଜଣ କଏଦୀ ରହିଛନ୍ତି। ଇତିମଧ୍ୟରେ ମୋଟ ୭ହଜାର ୨୫୫ ଜଣଙ୍କୁ ଜେଲ୍ରୁ ବାହାର କରାଯାଇଛି। ଏମାନଙ୍କ ମଧ୍ୟରୁ ଜାମିନ ଓ ବ୍ୟକ୍ତିଗତ ମୁଚାଲିକାରେ ୬ହଜାର ୮୬୬ ଏବଂ ପାରୋଲ୍ରେ ମୁକୁଳିଥିବା ୩୮୯ ଜଣ କଏଦୀ ରହିଛନ୍ତି। ଜେଲ ଭିତରେ ଉତ୍ତମ ବ୍ୟବହାର ପାଇଁ ୧୯୪ଜଣ କଏଦୀଙ୍କ ଦଣ୍ଡକୁ ହ୍ରାସ କରାଯାଇଛି। ଲକ୍ଡାଉନ୍ ସମୟରେ ୧୧୬୨ଜଣ କଏଦୀଙ୍କୁ ଗୋଟିଏ ଜେଲ୍ରୁ ଅନ୍ୟ ଜେଲ୍କୁ ସ୍ଥାନାନ୍ତର କରାଯାଇଛି। ସେହିପରି ୩୦୯ କଏଦୀ ପାରୋଲ୍ ଶେଷ ହେବା ପରେ ପୁଣି ଜେଲ୍କୁ ଫେରି ଆସିଛନ୍ତି। ଜେଲ୍ ପ୍ରଶାସନ ପକ୍ଷରୁ କଏଦୀଙ୍କୁ କରୋନାମୁକ୍ତ ରଖିବା ପାଇଁ କଏଦୀଙ୍କ ନିୟମିତ ସ୍ବାସ୍ଥ୍ୟ ପରୀକ୍ଷା ସହ ସଚେତନ କରାଯାଉଛି। ସମ୍ପର୍କୀୟଙ୍କ ସହ ଭେଟ ପାଇଁ ଇ-ମୁଲାକାତ୍ ବ୍ୟବସ୍ଥା ହୋଇଛି। ଜେଲଗୁଡ଼ିକ ନିୟମିତ ବିଶୋଧନ କରାଯାଉଛି ବୋଲି ଉପାଧ୍ୟାୟ କହିଛନ୍ତି। ଅନ୍ୟପକ୍ଷେ ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ତରଫରୁ ଉପସ୍ଥାପିତ ରିପୋର୍ଟରେ କୁହାଯାଇଛି ଯେ, ରାଜ୍ୟର ୮ଟି ସ୍ଥାନରେ ବର୍ତ୍ତମାନ କରୋନା ପରୀକ୍ଷା ସୁବିଧା ରହିଛି। ଆଉ କେତେକ ପରୀକ୍ଷା କେନ୍ଦ୍ର ପାଇଁ ରାଜ୍ୟ ସରକାର ପଦକ୍ଷେପ ନେଉଛନ୍ତି।
