ନିମାପଡ଼ା,୧୧ା୫(ଡି.ଏନ.ଏ): ନିମାପଡ଼ା ଥାନା ଅନ୍ତର୍ଗତ ଶଗଡ଼ା ଗ୍ରାମରେ ଜମିବାଡ଼ି ବିବାଦକୁ ନେଇ ସୋମବାର ଦୁଇ ପରିବାର ମଧ୍ୟରେ ମରଣାନ୍ତକ ଆକ୍ରମଣ ହୋଇଛି। ଏ ନେଇ ଉଭୟ ପରିବାରର ଅଭିଯୋଗକ୍ରମେ ପୋଲିସ ୬ଜଣଙ୍କୁ ଗିରଫ କରି କୋର୍ଟଚାଲାଣ କରିଛି। ସେମାନେ ହେଲେ ଉଭୟ ପରିବାରର ରବି ଦାସ, ଟିକି ଦାସ, ସୁକୁଟା ଦାସ, ସନାତନ ଦାସ, ସଖିନା ଦାସ, ବିଉସୀ ଦାସ। ଏ ଘଟଣାରେ ପୋଲିସ ନଂ.୧୦୨/୨୦ ଓ ୧୦୩/୨୦ରେ ପୃଥକ ଭାବେ ଦୁଇଟି ମାମଲା ରୁଜୁ କରି ତଦନ୍ତ ଚଳାଇଛି। ସୂଚନାଯୋଗ୍ୟ, ଟିକି ଓ ସଖିନାଙ୍କ ମଧ୍ୟରେ ଏକ ଜମିବାଡ଼ିକୁ ନେଇ ସୋମବାର କଥା କଟାକଟି ହୋଇଥିଲା। ଏଥିରେ ଉଭୟ ଉତ୍ତ୍ୟକ୍ତ ହେବାରୁ ସେମାନଙ୍କ ପରିବାର ସଦସ୍ୟ ଆସି ମାରଣାସ୍ତ୍ର ଦ୍ୱାରା ପରସ୍ପର ମଧ୍ୟରେ ଆକ୍ରମଣ କରିଥିଲେ। ଏଥିରେ ଉଭୟ ପରିବାରର ସଖିନା, ମୂଷି, ସନାତନ ଓ ରବି ଗୁରୁତର ହୋଇ ନିମାପଡ଼ା ଡାକ୍ତରଖାନାରେ ଚିକିତ୍ସିତ ହେଉଛନ୍ତି। ପରେ ଉଭୟ ପରିବାର ପକ୍ଷରୁ ଥାନାରେ ଅଭିଯୋଗ ହୋଇଥିଲା।
