ଭୁବନେଶ୍ୱର,୧୧।୧୧(ବ୍ୟୁରୋ) : ଚାକିରି ଦେବା ନଁାରେ ବହୁ ଯୁବକଙ୍କଠାରୁ ୩୦ ଲକ୍ଷରୁ ଊର୍ଦ୍ଧ୍ୱ ଟଙ୍କା ଠକେଇ କରିଥିବା ଜଣେ ଅଭିଯୁକ୍ତଙ୍କୁ ଭୁବନେଶ୍ୱରରୁ ଉଠାଇ ନେଇଛି ନବରଙ୍ଗପୁର ପୋଲିସ। ଅଭିଯୁକ୍ତ ଜଣକ ହେଲେ ଗଞ୍ଜାମ ଜିଲାର ଉମେଶ ମିଶ୍ର। ସେ ଇନ୍ଫୋସିଟି ଥାନା ଅନ୍ତର୍ଗତ ପଟିଆସ୍ଥିତ ଶୁଭମ୍ ଆପାର୍ଟମେଣ୍ଟରେ ପରିବାର ସହ ରହୁଛନ୍ତି। ଠକେଇ କରିବା ପରେ ଏଠାରେ ଲୁଚି ରହିଥିଲେ। ଫୋନ୍ ଟ୍ରାକିଂ କରି ତାଙ୍କୁ ଠାବ କରାଯିବା ପରେ ରବିବାର ସକାଳେ ନବରଙ୍ଗପୁର ପୋଲିସର ଏକ ଟିମ୍ ଉକ୍ତ ଆପର୍ଟମେଣ୍ଟରେ ଚଢାଉ କରି ଉମେଶଙ୍କୁ ଗିରଫ କରିଥିଲା।
ପୋଲିସ ସୂଚନା ଅନୁଯାୟୀ, ଉମେଶ ଲୋକଙ୍କୁ ସରକାରୀ ଚାକରି କରାଇ ଦେବାକୁ କହି ବେକାର ଯୁବକ ଓ ଯୁବତୀଙ୍କଠାରୁ ଟଙ୍କା ନେଇଥିଲେ। ଏପରିକି ନିଯୁକ୍ତି ଓ ଟ୍ରେନିଂ ପାଇଁ ନକଲି ଚିଠି ଧରାଇଥିଲେ। ଚିଠି ଧରାଇବା ପରେ ବି ସେମାନଙ୍କଠାରୁ ବିପୁଳ ଟଙ୍କା ହାତେଇଥିଲେ। ସମୟ ଗଡ଼ିଥିଲେ ମଧ୍ୟ ଚାକିରି ନ ମିଳିବାରୁ ଟଙ୍କା ଦେଇଥିବା ସମ୍ପୃକ୍ତ ଯୁବତୀଯୁବକଙ୍କ ସନ୍ଦେହ ବଢ଼ିଥିଲା। ସେମାନେ ବାରମ୍ବାର ଉମେଶଙ୍କୁ ପଚାରିବା ସହ ଟଙ୍କା ଫେରସ୍ତ କରିବାକୁ କହିଥିଲେ। ଫଳରେ ଉମେଶ ବିଭିନ୍ନ ସ୍ଥାନରେ ଖୋଲିଥିବା ଅଫିସରେ ତାଲା ପକାଇ ଆଉ ଧରାଛୁଆଁ ଦେଇ ନ ଥିଲେ। ଏପରି କି ସେ ତାଙ୍କ ମୋବାଇଲ୍ ଫୋନ୍କୁ ବନ୍ଦ ରଖିଥିଲେ। ଏନେଇ ଠକେଇର ଶିକାର ୧୫ରୁ ଊର୍ଦ୍ଧ୍ୱ ଯୁବତୀଯୁବକ ଅଭିଯାଗ କରିବା ପରେ ପୋଲିସ ମାମଲା ରୁଜୁ କରି ତଦନ୍ତ କରିଥିଲା।
