ହିିଞ୍ଜିଳିକାଟୁ, ୨୭ା୨(ଡି.ଏନ୍.ଏ): ଘନ କୁହୁଡ଼ି ଯୋଗୁ ଗଞ୍ଜାମ ଜିଲା ୫୯ ନଂ. ଜାତୀୟ ରାଜପଥ ହିଞ୍ଜିଳିକାଟୁ ଥାନା ସୋମପୁର ଛକ ନିକଟରେ ଗୁରୁବାର ଭୋର ସମୟରେ ଏକ ଦୁର୍ଘଟଣା ଘଟିଛି। ଏକ ଅଟୋ ରାସ୍ତାପାର୍ଶ୍ୱ ଗଛକୁ ପିଟି ହେବାରୁ ଏଥିରେ ଯାଉଥିବା ୮ ଯାତ୍ରୀ ଆହତ ହୋଇଛନ୍ତି। ସେମାନେ ହେଲେ ଆସିକା ଥାନା ପଢ଼ାଳ ଜୟପୁର ଗ୍ରାମର ରାକେଶ ଲେଙ୍କା(୨୯), ପ୍ରୀତିପ୍ରଜ୍ଞା ମହାନ୍ତିି (୧୨), ଲକ୍ଷ୍ମୀ ପ୍ରତିମା ଲେଙ୍କା (୧୯), ଜୟନ୍ତୀ ଲେଙ୍କା(୩୭), ସାରଙ୍ଗଧର ମହାନ୍ତି(୪୨), ରୁନୁ ମହାନ୍ତି (୩୭), ଚିଦାନନ୍ଦ ମହାନ୍ତି(୮) ଓ ରାଜା ସ୍ବାଇଁ (୮)। ସମସ୍ତ ଆହତଙ୍କୁ ସ୍ଥାନୀୟ ଲୋକେ ଉଦ୍ଧାର କରି ହିିଞ୍ଜିଳିକାଟୁ ଡାକ୍ତରଖାନାରେ ଭର୍ତ୍ତି କରିଛନ୍ତି। ସେମାନଙ୍କ ମଧ୍ୟରୁ ରାଜେଶ, ପ୍ରୀତିପ୍ରଜ୍ଞା ଓ ଲକ୍ଷ୍ମୀଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାକୁ ପଠାଯାଇଛି। ପୋଲିସ ଦୁର୍ଘଟଣାଗ୍ରସ୍ତ ଅଟୋକୁ ଜବତ କରି ତଦନ୍ତ କରୁଛି। ଅଟୋଚାଳକ ଦୁର୍ଘଟଣା ପରେ ଘଟଣାସ୍ଥଳରୁ ଫେରାର ଥିବା ଜଣାପଡ଼ିଛି।
