ବ୍ରହ୍ମପୁର ଅଫିସ,୧୮ା୫: ଗଞ୍ଜାମ ଜିଲାରେ ସୁରଟ ଫେରନ୍ତା ପ୍ରବାସୀ ଓଡ଼ିଆଙ୍କ ଯୋଗୁ ଦ୍ରୁତ ଗତିରେ ବଢ଼ିଚାଲିଛି କରୋନା ସଂକ୍ରମିତଙ୍କ ସଂଖ୍ୟା। ଗତ ୨୪ ଘଣ୍ଟା ଭିତରେ ଜିଲାରେ ପୁଣି ୧୫ ଜଣ ନୂତନ ଆକ୍ରାନ୍ତ ଚିହ୍ନଟ ହୋଇଛନ୍ତି। ରାଜ୍ୟର ଶୀର୍ଷ ସ୍ଥାନରେ ଥିବା ଏହି ଜିଲାରେ ସଂକ୍ରମିତଙ୍କ ସଂଖ୍ୟା ଏବେସୁଦ୍ଧା ୩୦୭ରେ ପହଞ୍ଚିଛି । ଅନ୍ୟପଟେ ଗତ ୧୫ ଦିନ ଭିତରେ ଜିଲାରେ ୨ ଜଣଙ୍କ ମୃତ୍ୟୁ ଘଟିଥିବା ବେଳେ ଅଦ୍ୟାବଧି ୪୯ ଜଣ ସୁସ୍ଥ ହୋଇସାରିଛନ୍ତି। ଏସବୁକୁ ବାଦ୍ ଦେଲେ ଏବେ ଜିଲାରେ ୨୪୧ ସକ୍ରିୟ କେସ୍ ଥିବା ଜଣାପଡ଼ିଛି। ଅନ୍ୟପଟେ ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ ଟୁଇଟ୍ କରି କହିଛନ୍ତି ଯେ, ଏବେ ଜିଲାର ସମସ୍ତ କରୋନା ସଂକ୍ରମିତ ରୋଗୀଙ୍କ ସ୍ବାସ୍ଥ୍ୟାବସ୍ଥା ସ୍ଥିର ରହିଛି । ଜିଲାରେ ଶନିବାର ସୁଦ୍ଧା ୨୭୭ କରୋନା ପଜିଟିଭ୍ ଚିହ୍ନଟ ହୋଇଥିବା ବେଳେ ରବିବାର ୧୫ ଓ ସୋମବାର ୧୫ ପଜିଟିଭ୍ ଚିହ୍ନଟ ହୋଇଛନ୍ତିି। ବ୍ରହ୍ମପୁର ସହରରେ ଥିବା ଆମ୍ବ ମାର୍କେଟ ପରେ ଶଙ୍କରପୁର ସାହି ଓ ରବିବାର କୁକୁଡ଼ାଖଣ୍ଡି ବ୍ଲକ ଦକ୍ଷିଣପୁର ପଞ୍ଚାୟତ ଗୁଣ୍ଠବନ୍ଧ ଗାଁକୁ ପ୍ରଶାସନ ପକ୍ଷରୁ ସିଲ୍ କରାଯାଇଥିଲା। ସୋମବାର ଡାକ୍ତରୀ ଦଳ ଗୁଣ୍ଠବନ୍ଧ ଗ୍ରାମରେ ପହଞ୍ଚି ସ୍ବାବ୍ ନମୁନା ସଂଗ୍ରହ କରୁଛନ୍ତି। ଉକ୍ତ ଗ୍ରାମର ଜଣେ ବ୍ୟକ୍ତି ଆମ୍ବ ମାର୍କେଟରେ ବ୍ୟବସାୟ କରୁଥିବା ବେଳେ ତାଙ୍କର ପଜିଟିଭ୍ ଆସିବା ପରେ ଗୁଣ୍ଠବନ୍ଧ ଗ୍ରାମକୁ ସିଲ୍ କରାଯାଇଥିଲା। ବ୍ୟବସାୟୀ ଜଣକୁ କୋଭିଡ୍ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ତାଙ୍କ ସଂସ୍ପର୍ଶରେ ଆସିଥିବା ୭୪ ସ୍ବାବ୍ ନମୁନା ସଂଗ୍ରହ କରାଯିବ ବୋଲି କୁକୁଡ଼ାଖଣ୍ଡି ବ୍ଲକ ପ୍ରୋଗ୍ରାମ ମ୍ୟାନେଜର ସୋହାନ ପଟ୍ଟନାୟକ ସୂଚନା ଦେଇଛନ୍ତି।
