ତାଳଚେର,୧ା୮(ନି.ପ୍ର.) – ପ୍ରଶାସନ ଓ ଏମ୍ସିଏଲ୍ର ଅନୁରୋଧ କ୍ରମେ ଭାଜପା ପକ୍ଷରୁ ୫ ଦଫା ଦାବି ନେଇ ଚାଲିଥିବା ଖଣି ବନ୍ଦ ଆନ୍ଦୋଳନ ପ୍ରତ୍ୟାହୃତ ହୋଇଛି ବୋଲି ଭାଜପା ସାଧାରଣ ସମ୍ପାଦକ କାଳନ୍ଦୀ ସାମଲ ବୁଧବାର ଏକ ଖବରଦାତା ସମ୍ମିଳନୀରେ ପ୍ରକାଶ କରିଛନ୍ତି। ଅପରାହ୍ନରେ ସ୍ଥାନୀୟ ହୋଟେଲରେ ଭାଜପା ସାଧାରଣ ସମ୍ପାଦକ କହିଲେ ଯେ, ଭରତପୁର କୋଇଲା ଖଣି ଦୁର୍ଘଟଣା ପରେ ଭାଜପା ପ୍ରତିନିଧି ଦଳ ଘଟଣାସ୍ଥଳ ପରିଦର୍ଶନ କରି ଏଭଳି ଘଟଣାର ପୁନରାବୃତ୍ତି ଯେପରି ନ ହୁଏ ସେଥିପାଇଁ ସୁରକ୍ଷା ବ୍ୟବସ୍ଥା ଯାଞ୍ଚ କରାଯିବାକୁ ଉପଜିଲାପାଳଙ୍କୁ ଅନୁରୋଧ କରାଯାଇଥିଲା। କିନ୍ତୁ ଉପଜିଲାପାଳ ଅକ୍ଷମତା ପ୍ରକାଶ କରିବା ପରେ ୨୫ ତାରିଖ ଅପରାହ୍ନଠାରୁ ଖଣି ବନ୍ଦ ଆନ୍ଦୋଳନ କରାଯାଇଥିଲା। ୬ଦିନ ପରେ ବୁଧବାର ଜିଲାପାଳ ମନୋଜ କୁମାର ମହାନ୍ତିଙ୍କ ଅଧ୍ୟକ୍ଷତାରେ ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ଦଳର ଦାବି ପ୍ରଶାସନ ଓ ଏମ୍ସିଏଲ୍ କର୍ତ୍ତୃପକ୍ଷ ମାନି ନେବା ସହ ଆନ୍ଦୋଳନରୁ ଓହରିଯିବାକୁ ଅନୁରୋଧ କରିଥିଲେ। ଫଳରେ ଭାଜପା ଆନ୍ଦୋଳନରୁ ଓହରି ଯାଇଛି। ସମସ୍ତ ଅନୁଷ୍ଠାନ, ଶ୍ରମିକନେତା ଓ ଅଞ୍ଚଳବାସୀ ଆନ୍ଦୋଳନରେ ସହଯୋଗ କରିଥିବାରୁ ଭାଜପା ସାଧାରଣ ସମ୍ପାଦକ କୃତଜ୍ଞତା ଜଣାଇଥିଲେ। ଏଥିରେ ବ୍ଲକ ଅଧ୍ୟକ୍ଷ ବୃନ୍ଦାବନ ବେହେରା, ଶ୍ରମିକ ନେତା ବିରଞ୍ଚି ସାହୁ, ବରିଷ୍ଠ ଆଇନଜୀବୀ ପେସ୍କାର ଗଡନାୟକ, ରେଳମଣ୍ଡଳ ସଭାପତି ବରୁଣ ସାହୁ, ପ୍ରକାଶ ମହାରଣା, ଭାଜପା ମିଡିଆସେଲର ପର୍ଶୁରାମ ବାରିକ ପ୍ରମୁଖ ଉପସ୍ଥିତ ଥିଲେ।
