କାଳିଆପାଣି,୨୦।୪(ଡିଏନଏ): ଯାଜପୁର ଜିଲା ସୁକିନ୍ଦା ଖଣି ଅଞ୍ଚଳରେ କାର୍ଯ୍ୟ କରୁଥିବା ସାରୁଆବିଲ ଖଣିରୁ କ୍ରୋମାଇଟ ପରିବହନକୁ ଶ୍ରମିକମାନେ ବିରୋଧ କରି ବନ୍ଦ କରିଦେଇଛନ୍ତି। ମିଶ୍ରିଲାଲ ଖଣିର ଲିଜ ଅବଧି ୩୧ମାର୍ଚ୍ଚ ୨୦୨୦ରୁ ସରିଥିବାବେଳେ ଏବେ ଅନ୍ୟ ଏକ କମ୍ପାନୀ ହାତକୁ ମାଲିକାନାସତ୍ୱ ଚାଲିଯାଇଛି। ଏପରିସ୍ଥଳେ ଦୀର୍ଘ ବର୍ଷ ହେବ ଖଣିରେ କାର୍ଯ୍ୟ କରୁଥିବା ଶ୍ରମିକଙ୍କ ସମସ୍ତ ପ୍ରାପ୍ୟ ନ ଦେଇ ଖଣି କର୍ତ୍ତୃପକ୍ଷ ପୂର୍ବରୁ ଗଚ୍ଛିତ ରହିଥିବା କ୍ରୋମାଇଟ ପରିବହନ କରିବାକୁ ସୋମବାର ଉଦ୍ୟମ କରିଥିଲେ। ଶ୍ରମିକମାନେ ଏହା ଜାଣିବା ପରେ ପରିବହନକୁ ବନ୍ଦ କରିଥିଲେ। ଗୋଟିଏ ପଟେ ଶ୍ରମିକମାନେ ଚାକିରି ହରାଇଥିବାବେଳେ ଅନ୍ୟପଟେ ପାଇବାକୁ ଥିବା ପ୍ରାପ୍ୟ ହରାଉଥିବାରୁ ପରିବାର ପ୍ରତିପୋଷଣ କିପରି କରିବେ ତାହା ସେମାନଙ୍କୁ ଚିନ୍ତାରେ ପକାଇ ଦେଇଛି। ଖଣି କର୍ତ୍ତୃପକ୍ଷଙ୍କ ଏପରି ଶ୍ରମିକମାରଣା ନୀତି ଯୋଗୁ ଶ୍ରମିକ ମହଲରେ ଅଶାନ୍ତି ବଢିବାରେ ଲାଗିଛି। ସୁକିନ୍ଦା ୱାର୍କର୍ସ ୟୁନିୟନର ଖଣି ସମ୍ପାଦକ ଶଙ୍କର ସିଦ୍ଧୁ, ସହସମ୍ପାଦକ ରମାକାନ୍ତ ମହାନ୍ତ, କାର୍ଯ୍ୟକାରୀ କମିଟି ସଭ୍ୟ ସନାତନ ଦାସ, ସୁବାସ ଦାସ, ପଦନ ସିଂ ପ୍ରମୁଖ ସୋମବାର କମ୍ପାନୀକୁ ଏ ସମ୍ପର୍କରେ ଦାବି ଜଣାଇବା ସହ ଯେଉଁ ପର୍ଯ୍ୟନ୍ତ ସମସ୍ତ ଦାବି ପୂରଣ ନ ହୋଇଛି ପରିବହନ କରିବାକୁ ଦିଆଯିବ ନାହିଁ ବୋଲି ପ୍ରକାଶ କରିଛନ୍ତି। ଏ ସମ୍ପର୍କରେ ମତାମତ ପାଇଁ ଖଣି ନିର୍ଦ୍ଦେଶକ ସିଦ୍ଧାର୍ଥ ଜୈନଙ୍କୁ ଯୋଗାଯୋଗ କରାଯାଇଥିଲେ ହେଁ ସେ ଫୋନ ଉଠାଇ ନ ଥିଲେ।
