କେନ୍ଦ୍ରାପଡ଼ା ଅଫିସ, ୧୨।୮: କେନ୍ଦ୍ରାପଡ଼ା ଜିଲାର ମୁସଲମାନ ବହୁଳ ଅଞ୍ଚଳରେ ଇଦ୍-ଉଲ୍-ଜୁହା ସୋମବାର ଶାନ୍ତି ଶୃଙ୍ଖଳାର ସହ ପାଳିତ ହୋଇଯାଇଛି। ଏଥିପାଇଁ ବିଭିନ୍ନ ଇଦ୍ଗାହଠାରେ ସମୂହ ନମାଜ ପାଠ ପାଇଁ ବ୍ୟବସ୍ଥା ହୋଇଥିଲା। ସଲଫିଆ ଇଦ୍ଗାହ ଓ ପୁରୁଣା ଇଦ୍ଗାହରେ ସକାଳ ୮ଟାରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ସେହିପରି ନୁଆ ଇଦ୍ଗାହରେ ସକାଳ ସାଢ଼େ ୮ଟାରେ ସ୍ବତନ୍ତ୍ର ନମାଜ ପାଠ ଅନୁଷ୍ଠିତ ହୋଇଥିଲା। ଏହି ସମୂହ ନମାଜ ପାଠ କାର୍ଯ୍ୟକ୍ରମରେ ୨୦ ହଜାରରୁ ଊର୍ଦ୍ଧ୍ୱ ମୁସଲମାନ ମହିଳା ଓ ପୁରୁଷ ଭାଗ ନେଇଥିଲେ। ଏଥିନେଇ ବିଭିନ୍ନ ମସ୍ଜିଦ, ଦର୍ଘା ଓ ମୀନାରଗୁଡିକ ସୁନ୍ଦର ଆଲୋକ ମାଳାରେ ସଜ୍ଜିତ କରାଯାଇଛି। ଏହି ପର୍ବ ପାଇଁ ଜିଲା ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଛି। ଏସ୍ପି ନୀତିଶେଖରଙ୍କ ନେତୃତ୍ୱରେ କେନ୍ଦ୍ରାପଡ଼ା ଏସ୍ଡିପିଓ ରାଜୀବଲୋଚନ ପଣ୍ଡା, ୩ ଇନ୍ସପେକ୍ଟର, ୨୯ ଏସ୍ଆଇ ଓ ଏଏସ୍ଆଇ, ୧୬ ସେକ୍ସନ ଓଏସ୍ପି ଓ ଏପିଆର୍ ଫୋର୍ସ ମୁତୟନ ହୋଇଥିଲେ।
