କେନ୍ଦୁଝର,୧୫।୩(ସ୍ବ.ପ୍ର.): କେନ୍ଦୁଝର କେନ୍ଦ୍ର ସମବାୟ ବ୍ୟାଙ୍କ(କେସିସିବି)ର ସମସ୍ତ ଗ୍ରାହକଙ୍କ ଜମା ଟଙ୍କା ସୁରକ୍ଷିତ ଅଛି। ୟେସ ବ୍ୟାଙ୍କ ସହିତ ଏହି ବ୍ୟାଙ୍କର କୌଣସି ସମ୍ପର୍କ ନାହିଁ। ଏଣୁ ଜମାକାରୀଙ୍କ ଟଙ୍କା/ଚେକ୍ ନେଣଦେଣ ଆଦି ବ୍ୟାଙ୍କ କାରବାରରେ କୌଣସି ଗୁଜବ ନ ଶୁଣିବା ପାଇଁ ଶନିବାର ସ୍ଥାନୀୟ କେସିସିବି କନ୍ଫରେନ୍ସ ହଲରେ ଅନୁଷ୍ଠିତ ଏକ ଖବରଦାତା ସମ୍ମିଳନୀରେ ସଭାପତି କାନନ ବିହାରୀ ପୋହି କହିଛନ୍ତି। ସମ୍ପ୍ରତି ବ୍ୟାଙ୍କର ୧୫ଟି ଶାଖା ଥିବା ବେଳେ ସମସ୍ତ ବ୍ୟାକିଂ ସେବା ଯୋଗାଇ ଦେଇଆସୁଛି। ଏପରିକି ଆଉ ୪ଟି ନୂତନ ଶାଖା ୩୧ ତାରିଖ ସୁଦ୍ଧା ଖୋଲିବା ନେଇ ସ୍ବୀକୃତି ମିଳିଛି। ଚେକ୍ କ୍ଲିୟରିଂ ସେବା ୟେସ ବ୍ୟାଙ୍କର ସମସ୍ୟାକୁ ନେଇ ସାମୟିକ ବାଧାପ୍ରାପ୍ତ ହୋଇଥିଲେ ହେଁ ଖୁବଶୀଘ୍ର ସୁବ୍ୟବସ୍ଥିତ ହେବ ବୋଲି ସେ କହିଛନ୍ତି। ଏଣୁ ରିଜର୍ଭ ବ୍ୟାଙ୍କ ଏହି ବ୍ୟାଙ୍କ ଉପରେ କୌଣସି ପ୍ରତିବନ୍ଧକ ଲଗାଇ ନ ଥିବା କହିଛନ୍ତି। ବ୍ୟାଙ୍କର ଏବେ ୩୪୭୫୦୮ ଜମାକାରୀ ଥିବା ବେଳେ ସମୁଦାୟ ୪୯୭.୬୧ କୋଟି ଜମା ରାଶି ରହିଛି। ୪୬୬କୋଟି ଟଙ୍କା ଋଣ ପ୍ରଦାନ କରାଯାଇଛି। ୨୦୦୩-୦୪ରୁ ନିରବିଛିନ୍ନ ଭାବରେ ବ୍ୟାଙ୍କ ଲାଭ କରିଆସୁଛି। ଏଣୁ ପୂର୍ବ ଭଳି ବ୍ୟାଙ୍କ ଉପରେ ଜମାକାରୀଙ୍କ ବିଶ୍ୱାସ ଓ ଭରସା ଅତୁଟ ରଖି ବ୍ୟାଙ୍କ କାରବାର ଜାରି ରଖିବାକୁ ସଭାପତି ନିବେଦନ କରିଥିଲେ। ଏହି ଖବରାଦାତା ସମ୍ମିଳନୀରେ ବ୍ୟାଙ୍କର କର୍ମଚାରୀ ଅଟଳ ଶତପଥୀ ଉପସ୍ଥିତ ଥିଲେ।
