ଦେବଗଡ, ୬ା୧୧(ଡି.ଏନ.ଏ.) : ଜଙ୍ଗଲରୁ ବେଆଇନ ଗଛ କାଟି ଆଣିବା ସହ ବନ କର୍ମଚାରୀଙ୍କୁ ଆକ୍ରମଣ କରି ୨ ଭାଇ ଫେରାର ହୋଇଯାଇଥିବା ବେଳେ ବେଆଇନ କାଠ ରଖିଥିବା ଅଭିଯୋଗରେ ବାପଙ୍କୁ ବନ ବିଭାଗ ଗିରଫ କରିଛି। ଏହା ସହ ଗୋଟିଏ ଶଗଡ ଗାଡି, ୧୪ଖଣ୍ଡ ଶାଳପଟ୍ଟା ଜବତ କରିବା ସହ ଅଭିଯୁକ୍ତ ବାପଙ୍କୁ କୋର୍ଟଚାଲାଣ କରାଯାଇଛି। ଖବର ମୁତାବକ ମଙ୍ଗଳବାର ପୂର୍ବାହ୍ନରେ ରିଆମାଳ ବନାଞ୍ଚଳ ଅଧିନ ପୁରମୁଣ୍ଡା ଗ୍ରାମର ପଞ୍ଚାନନ ବେହେରା ତାଙ୍କ ପୁଅ କେଶବ ବେହେରା (୨୮) ଓ କାଳିଆ ବେହେରା (୨୪) ଏକ ଶଗଡରେ ଜଙ୍ଗଲରୁ କାଠ କାଟି ଆଣୁଥିବା ବେଳେ ବନରକ୍ଷୀ ବବିତା ନାଏକ ସେମାନଙ୍କୁ ଅଟକାଇ ଥିଲେ। କାଳିଆ ଓ କେଶବ ବନରକ୍ଷୀ ବବିତାଙ୍କୁ ଅଶ୍ରବ୍ୟ ଭାଷାରେ ଗାଳିଗୁଳଜ କରିବା ସହ ସେଠାରୁ କାଠ ନେଇ ଚାଲି ଆସିଥିଲେ। ଏ ସମ୍ପର୍କରେ ବବିତା ଫରେଷ୍ଟର ତୁଷାର ରଞ୍ଜନ ପ୍ରଧାନଙ୍କୁ ସୂଚନା ଦେଇଥିଲେ। ଫରେଷ୍ଟର ଘଟଣାସ୍ଥଳରେ ପହଞ୍ଚିବା ପରେ ପଚରାଉଚୁରା ପାଇଁ ଅଭିଯୁକ୍ତଙ୍କ ଘରକୁ ଯାଇଥିଲେ। ଫରେଷ୍ଟରଙ୍କୁ କେଶବ ଓ କାଳିଆ ମଧ୍ୟ ଗାଳି ଗୁଳଜ କରିବା ସହ ମାଡ ମାରିଥିଲେ। ଫରେଷ୍ଟର ଘଟଣା ସମ୍ପର୍କରେ ରିଆମାଳ ଫରେଷ୍ଟ ରେଞ୍ଜ ଅଫିସର ଭବାନି କାନ୍ତ ଦାଶଙ୍କୁ ସୂଚନା ଦେଇଥିଲେ। ବନ ବିଭାଗର ସ୍ବତନ୍ତ୍ର ଦଳ ମାଜିଷ୍ଟ୍ରେଟଙ୍କ ସହ ଅଭିଯୁକ୍ତଙ୍କ ଘରକୁ ଯାଇ ଚଢାଉ କରିଥିଲେ। ଚଢାଉ ସମୟରେ ଆକ୍ରମଣକାରୀ ୨ଭାଇ ଫେରାର ହୋଇଯାଇଥିବା ବେଳେ ସେମାନଙ୍କ ଘରୁ ୧୪ଖଣ୍ଡ ଶାଳପଟ୍ଟା ଓ ଗୋଟିଏ ଶଗଡକୁ ଜବତ କରାଯାଇଥିଲା। ଘର ମାଲିକ ତଥା ଅଭିଯୁକ୍ତ ୨ ଭାଇଙ୍କ ବାପା ପଞ୍ଚାନନଙ୍କୁ ଗିରଫ କରିଥିଲା ବନ ବିଭାଗ। ବିଭିନ୍ନ ଦଫାରେ ମାମଲା ଋୁଜୁ କରି ତାଙ୍କୁ କୋର୍ଟ ଚାଲାଣ କରାଯାିଛି। ସେହିପରି ଆକ୍ରମଣର ଶିକାର ଫରେଷ୍ଟର ତୁଷାର ରଞ୍ଜନଙ୍କ ଅଭିଯୋଗ ଆଧାରରେ ରିଆମାଲ ଥାନା ପୋଲିସ କେଶବ ଓ କାଳିଆଙ୍କ ବିରୋଧରେ ବିଭିନ୍ନ ଦଫାରେ ମାମଲା ଋୁଜୁ କରି ଘଟଣାର ତଦନ୍ତ କରୁଛି।
