ନୂଆଦିଲ୍ଲୀ,୧୫ା୬ (ପି.ଟି.)-ଗ୍ୟାରୀ କର୍ଷ୍ଟେନଙ୍କର କୋଚ୍ ହେବାଲାଗି ଆଦୌ ଆଗ୍ରହ ନ ଥିଲା। ଏହି ପଦବୀ ପାଇଁ ସେ କେବେ ଆବେଦନ ମଧ୍ୟ କରି ନ ଥିଲେ। ମାତ୍ର କ୍ରିକେଟ କିମ୍ବଦନ୍ତୀ ସୁନୀଲ ଗାଭାସ୍କରଙ୍କ ଉଦ୍ୟମ ଯୋଗୁ ତାଙ୍କୁ ୭ ମିନିଟ୍ରେ ହାଇପ୍ରୋଫାଇଲ ଭାରତୀୟ କ୍ରିକେଟ ଦଳର କୋଚ ପଦବୀରେ ନିଯୁକ୍ତି ମିଳିଯାଇଥିଲା। ‘କ୍ରିକେଟ କଲେକ୍ଟିଭ୍’ ଶୀର୍ଷକ କାର୍ଯ୍ୟକ୍ରମରେ ଅଂଶଗ୍ରହଣ ପୂର୍ବକ ତାଙ୍କ ଜୀବନର କେତେକ ସ୍ମରଣୀୟ କଥା ଉପସ୍ଥାପନ ବେଳେ କର୍ଷ୍ଟେନ ଏକଥା ପ୍ରକାଶ କରିଛନ୍ତି। ଗାଭାସ୍କର ଥିଲେ କୋଚ୍ ସିଲେକ୍ସନ ପ୍ୟାନେଲର ଅଂଶବିଶେଷ। ସାକ୍ଷାତ୍କାର ପାଇଁ ଇମେଲ ଜରିଆରେ ତାଙ୍କଠାରୁ ଯେତେବେଳେ ଆମନ୍ତ୍ରଣ ପତ୍ର ପାଇଲି ମୁଁ ବିଶ୍ୱାସ କରିପାରିଲି ନାହିଁ। ଭାବିଲି ଏହା ଏକ ପ୍ରକାର ଜୋକ୍। ତେଣୁ ମୁଁ ଜବାବ ଦେଲି ନାହିଁ। ଗାଭାସ୍କର ମୋ ପାଖକୁ ଆଉ ଥରେ ଇ-ମେଲ କରିଥିଲେ। ଆପଣ ସାକ୍ଷାତ୍କାରକୁ ଆସୁଛନ୍ତି କି ନା ବୋଲି ପ୍ରଶ୍ନ କରିଥିଲେ। ଇ-ମେଲଟିକୁ ମୁ ମୋ ସ୍ତ୍ରୀଙ୍କୁ ଦେଖାଇଲି। ସେ କହିଥିଲେ ବୋଧହୁଏ ସେମାନେ ଭୁଲ୍ରେ ତୁମ ନିକଟକୁ ଏହି ଇମେଲ ପଠାଇଦେଇଛନ୍ତି। ସେତେବେଳକୁ ମୋର କୌଣସି କୋଚିଂ ଅଭିଜ୍ଞତା ନ ଥିବାରୁ ମୁଁ ସାକ୍ଷାତ୍କାରକୁ ଯିବି କି ନା ସେ ନେଇ ଦ୍ୱନ୍ଦ୍ୱରେ ପଡ଼ିଯାଇଥିଲି। ତଥାପି ମୁଁ ଭାରତ ଯାଇଥିଲି। ସେଠାରେ ତତ୍କାଳୀନ ଭାରତ ଅଧିନାୟକ ଅନିଲ କୁମ୍ବଲେଙ୍କ ସହିତ ମୋର ଭେଟ ହୋଇଥିଲା। କୁମ୍ବଲେ ମୋତେ ହସି ହସି ପଚାରିଥିଲେ ଆପଣଙ୍କର ଏଠାରେ କି କାମ ଅଛି। ଜବାବରେ ମୁଁ କହିଥିଲି ତୁମ କୋଚ୍ ହେବା ଲାଗି ଏକ ସାକ୍ଷାତ୍କାରରେ ଭାଗ ନେବାଲାଗି ଆସିଛି। ଏହା ଏକ ପ୍ରକାର ଜୋକ୍ ଥିଲା। ଆମେ ଉଭୟେ ହସି ପକାଇଥିଲୁ। ମାତ୍ର ୭ମିନିଟ୍ ସାକ୍ଷାତ୍କାରରେ ମୋତେ କୋଚ୍ ପଦବୀ ମଳିଯାଇଥିଲା। କର୍ଷ୍ଟେନଙ୍କର ଯଦିଓ କୌଣସି କୋଚିଂ ଅଭିଜ୍ଞତା ନ ଥିଲା, ତାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଭାରତ ୨୦୦୯ରେ ଟେଷ୍ଟ ର଼୍ୟାଙ୍କିଙ୍ଗରେ ଶୀର୍ଷ ସ୍ଥାନକୁ ଉଠିବା ସହ ଏହାର ଦୁଇ ବର୍ଷ ପରେ ବିଶ୍ୱକପ୍ ଟାଇଟଲ ହାସଲ କରିଥିଲା।
