ନୂଆଦିଲ୍ଲୀ/ଓ୍ବାଶିଂଟନ,୨୬।୩: କରୋନା ସଂକ୍ରମଣ ପୃଥିବୀରେ ଆତଙ୍କ ସୃଷ୍ଟି କରିଛି। ଏଥିରୁ ଦୂରେଇ ରହିବା ପାଇଁ ସାମାଜିକ ଦୂରତା ସୃଷ୍ଟି ଉପରେ ଲୋକଙ୍କୁ ପରାମର୍ଶ ଦିଆଯାଉଛି। ତେବେ ସଂକ୍ରମିତଙ୍କ ମଧ୍ୟରୁ ହାରାହାରି କେତେଜଣଙ୍କ ମୃତ୍ୟୁ ଘଟିଥାଏ ସେ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି। ଚାଇନା, ଇଟାଲି ଏବଂ ଇରାନରେ ଏହା ଉପରେ ଗବେଷଣା କରୁଥିବା କିଛି ଗବେଷକଙ୍କ ଅନୁସାରେ କରୋନା ସଂକ୍ରମିତଙ୍କ ମଧ୍ୟରୁ ପ୍ରତି ହଜାରେ ଲାକଙ୍କ ମଧ୍ୟରୁ ପ୍ରାୟ ୯ ଜଣଙ୍କର ମୃତ୍ୟୁ ଘଟିଥାଏ। ଏହା ସମ୍ପୂର୍ଣ୍ଣ ଭାବେ ସମ୍ପୃକ୍ତ ବ୍ୟକ୍ତିଙ୍କ ରୋଗ ପ୍ରତିରୋଧକ ଶକ୍ତି ଉପରେ ହିଁ ନିର୍ଭର କରିଥାଏ। ଯଦି ସଂକ୍ରମିତଙ୍କଠାରେ ଅନ୍ୟ କୌଣସି ଶାରୀରିକ ସମସ୍ୟା ଥିଲେ ହୁଏତ କିଛି ଜଟିଳ ସ୍ଥିତି ଉତ୍ପନ୍ନ ହୋଇଥାଏ। ସଂକ୍ରମିତଙ୍କ ଚିକିତ୍ସା କ୍ଷେତ୍ରରେ ବୟସ, ଲିଙ୍ଗ, ସ୍ବାସ୍ଥ୍ୟାବସ୍ଥା ଏବଂ ସେ ବାସ କରୁଥିବା ଦେଶର ଚିକିତ୍ସା ସେବା ଆଦ ଗୁରୁତ୍ୱପୂର୍ଣ୍ଣ ବୋଲି ଗବେଷକ କହିଛନ୍ତି। ଏନେଇ ଲଣ୍ଡନର ଇମ୍ପାରିୟାଲ କଲେଜର ଗବେଷକ କହିଛନ୍ତି ଯେ, ବିଭିନ୍ନ ଦେଶ ତଥା ଭୌଗୋଳିକ ସ୍ଥିତିରେ କରୋନା ମୃତ୍ୟୁ ହାରରେ ଭିନ୍ନତା ପରିଲକ୍ଷିତ ହେବା ନିଶ୍ଚିତ। ଉପଲବ୍ଧ ସ୍ବାସ୍ଥ୍ୟ ସେବା ଏକ୍ଷେତ୍ରରେ ବିଶେଷ ଗୁରୁତ୍ୱ ବହନ କରିଥାଏ। ଏହି ସଂକ୍ରମଣରୁ ଦୂରେଇ ରହିବା ଲାଗି ବିଶ୍ୱ ସ୍ବାସ୍ଥ୍ୟ ସଂଗଠନ ଦ୍ୱାରା ଜାରି ହୋଇଥିବା ମାର୍ଗଦର୍ଶିକାର ପାଳନ ସର୍ବୋତ୍ତମ ବୋଲି ଗବେଷକ କହିଛନ୍ତି।
