ନୂଆଦିଲ୍ଲୀ,୨୫ା୭: କଂଗ୍ରେସ ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀ ଭଦ୍ରା ବୁଧବାର ଦଳର ମଙ୍ଗ ଧରିବା ପାଇଁ ମନାକରିଦେଇଛନ୍ତି। ସେ ଅଧ୍ୟକ୍ଷ ପଦରେ ଆସୀନ ହେବା ପାଇଁ ଦଳର ନେତାମାନଙ୍କ ଅନୁରୋଧକୁ ପ୍ରତ୍ୟାଖ୍ୟାନ କରି ବର୍ତ୍ତମାନର ଭୂମିକାରେ ରହିବାକୁ ପସନ୍ଦ କରିଛନ୍ତି।
ମିଳିଥିବା ସୂଚନାନୁସାରେ କଂଗ୍ରେସ ଅଧ୍ୟକ୍ଷ ପଦ ପାଇଁ ବରିଷ୍ଠ ନେତାମାନେ ବିଭିନ୍ନ ରାଜ୍ୟ ନେତା, ମୁଖ୍ୟମନ୍ତ୍ରୀ ଓ କଂଗ୍ରେସ କାର୍ଯ୍ୟକାରୀ କମିଟି (ସିଡବ୍ଲ୍ୟୁସି) ସଦସ୍ୟଙ୍କୁ ଦିଆଯାଇଥିବା ବନ୍ଦ ଲଫାଫା ଜରିଆରେ ଭୋଟ କରାଇଥିଲେ। ଏଥିରେ ୭ ଜଣଙ୍କ ନାମ ସାମ୍ନାକୁ ଆସିଛି। ସେମାନେ ହେଲେ ମଲ୍ଲିକାର୍ଜୁନ ଖାର୍ଗେ, ସୁଶୀଲ କୁମାର ସିନ୍ଦେ, ଦିଗ୍ବିଜୟ ସିଂ, କୁମାରୀ ସେଲ୍ଜା, ମୁକୁଲ ଓ୍ବାସ୍ନିକ୍, ସଚିନ୍ ପାଇଲଟ୍ ଓ ଜ୍ୟୋତିରାଦିତ୍ୟ ସିନ୍ଧିଆ। ତେବେ କୌଣସି ଗୋଟିଏ ନାମକୁ ନେଇ ସହମତି ପ୍ରକାଶ ପାଇନାହିଁ। ରାହୁଲ ଗାନ୍ଧୀ ଆମେରିକାରୁ ଫେରିବାକୁ ନେଇ ଦଳ ଅପେକ୍ଷା କରିଛି। ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀ ସିଡବ୍ଲୁସି ବୈଠକ ଡାକିଛନ୍ତି, ଯେଉଁଠି ରାହୁଲଙ୍କ ଉତ୍ତରାଧିକାରୀ ଚୟନ କରାଯାଇପାରେ। କଂଗ୍ରେସରେ ପ୍ରଥମେ ଜଣଙ୍କୁ ଅନ୍ତରୀଣ ଅଧ୍ୟକ୍ଷ ବଛାଯାଇ ପରେ ନିର୍ବାଚନ କରାଯାଇପାରେ ବୋଲି କୁହାଯାଉଛି। ସାଧାରଣ ନିର୍ବାଚନରେ କଂଗ୍ରେସର ପରାଜୟ ପରେ ରାହୁଲ ଗାନ୍ଧୀ ଅଧ୍ୟକ୍ଷ ପଦରୁ ଇସ୍ତଫା ଦେଇଥିଲେ। ସେବେଠୁ କାହାକୁ କଂଗ୍ରେସ ଅଧ୍ୟକ୍ଷ କରାଯିବ ସେନେଇ ଦଳ ମଧ୍ୟରେ ବିଚାର ଚାଲିଛି। ଏହି ପରିପ୍ରେକ୍ଷୀରେ ପ୍ରିୟଙ୍କା ଅଧ୍ୟକ୍ଷ ହୁଅନ୍ତୁ ବୋଲି ନେତାମାନେ କହିଥିଲେ। ଏନେଇ ରାହୁଲ କହିଥିଲେ ଏ ସମ୍ପର୍କିତ ନିଷ୍ପତ୍ତି ପ୍ରିୟଙ୍କାଙ୍କ ଉପରେ ଛାଡ଼ିଦିଆଯାଉ। କିନ୍ତୁ ଏହି ପଦ ଗ୍ରହଣ କରିବାକୁ ପ୍ରିୟଙ୍କା ମନା କରିଦେଇଛନ୍ତି।
