ଭୁବନେଶ୍ୱର,୨୬।୬(ବ୍ୟୁରୋ): ଛାତ୍ରୀଛାତ୍ରଙ୍କୁ ବିଭ୍ରାନ୍ତ କରିବା ପାଇଁ ଖବରକାଗଜରେ ଆସୁଛି ଜାଲ୍ ବିଜ୍ଞାପନ। ଉଚ୍ଚଶିକ୍ଷାରେ ନାମ ଲେଖାଇବା ପାଇଁ ଖବରକାଗଜରେ ଭୁଲ ବିଜ୍ଞାପନ ପ୍ରକାଶ ପାଉଛି। ତେଣୁ ଏହିଭଳି ବିଜ୍ଞାପନରୁ ଦୂରେଇ ରହିବାକୁ ସରକାରଙ୍କ ପକ୍ଷରୁ କୁହାଯାଇଛି। ସୂଚନାଯୋଗ୍ୟ, ଗତ ଜୁନ୍ ୨୧ରେ ଏକ ସ୍ଥାନୀୟ ଖବରକାଗଜରେ ଓଜେଇଇ-୨୦୧୯ ନାମରେ ଏକ ବିଜ୍ଞାପନ ପ୍ରକାଶ ପାଇଥିଲା। ସେଥିରେ ବି.ଟେକ୍ କୋର୍ସରେ ଆଡ୍ମିଶନ ସହିତ ଓଜେଇଇ ହେଲ୍ପଲାଇନ୍ ଭାବେ ଦୁଇଟି ମୋବାଇଲ୍ ଫୋନ୍ ନମ୍ବର ଦିଆଯାଇଥିଲା। ଏ ସମ୍ବନ୍ଧରେ ଓଜେଇଇ ପକ୍ଷରୁ ବୁଧବାର ଏକ ସ୍ପଷ୍ଟୀକରଣ ଦିଆଯାଇଛି। ଓଜେଇଇ-୨୦୧୯ ସହିତ ଏହି ବିଜ୍ଞାପନର କୌଣସି ସମ୍ପର୍କ ନାହିଁ। ସେଥିରେ ଲିଖିତ ହେଲ୍ପଲାଇନ୍ ନମ୍ବର ମଧ୍ୟ ଓଜେଇଇର ନୁହେଁ। ତେଣୁ ଉକ୍ତ ବିଜ୍ଞାପନ ସମ୍ପୂର୍ଣ୍ଣ ଜାଲ୍। ଛାତ୍ରୀଛାତ୍ରଙ୍କୁ ବିଭ୍ରାନ୍ତ କରିବା ଉଦ୍ଦେଶ୍ୟରେ ଏହି ଜାଲ୍ ବିଜ୍ଞାପନ ପ୍ରକାଶ କରାଯାଇଛି ବୋଲି ଓଜେଇଇ ପକ୍ଷରୁ ସ୍ପଷ୍ଟୀକରଣରେ କୁହାଯାଇଛି। ଓଜେଇଇ କମିଟି ପକ୍ଷରୁ ସମସ୍ତ ଛାତ୍ରୀଛାତ୍ର ଓ ଅଭିଭାବକଙ୍କୁ ଏ ସମ୍ପର୍କରେ ସତର୍କ କରାଯାଇଛି। ଛାତ୍ରୀଛାତ୍ରମାନେ ଓଜେଇଇର ସରକାରୀ ଓ୍ବେବ୍ସାଇଟ୍ (www.ojee.nic.in/www.odishajee.com)ରେ ଓଜେଇଇ ୨୦୧୯ର କାଉନ୍ସିଲିଂ ଓ ଆଡ୍ମିଶନ ସଂକ୍ରାନ୍ତ ସମସ୍ତ ନିୟମାବଳୀ, ସୂଚନା ଏବଂ ନିର୍ଦ୍ଦେଶନାମାକୁ ଅନୁସରଣ କରିବାକୁ ପରାମର୍ଶ ଦିଆଯାଇଛି। ଏ ସମ୍ପର୍କରେ କୌଣସି ଅସୁବିଧା ବା ସନ୍ଦେହ ହେଲେ ଛାତ୍ରୀଛାତ୍ର ଓ ଅଭିଭାବକ ଗଣ୍ଡମୁଣ୍ଡାସ୍ଥିତ ଓଜେଇଇ କାର୍ଯ୍ୟାଳୟ ସହ ସମ୍ପର୍କ କରିପାରିବେ କିମ୍ବା ୦୬୭୪-୨୩୮୨୧୦୧, ୦୬୭୪-୨୩୮୨୧୦୮ ଫୋନ୍ ନମ୍ବରରେ ଯୋଗାଯୋଗ କରିପାରିବେ ବୋଲି ଓଜେଇଇ ପକ୍ଷରୁ କୁହାଯାଇଛି।
