ଖ୍ରୀଷ୍ଟଚର୍ଚ୍ଚ,୨୯।୨(ପି.ଟି.)- ମାର୍ଚ୍ଚ ୨୧ ଓ ୨୨ ତାରିଖରେ ଢାକାରେ ଖେଳାଯିବାକୁ ଥିବା ବିଶ୍ୱ ଏକାଦଶ ବିପକ୍ଷ ଦୁଇ ମ୍ୟାଚ୍ବିଶିଷ୍ଟ ଟି୨୦ ସିରିଜ ପାଇଁ ଏସିଆ ଏକାଦଶ ଦଳ ଘୋଷଣା ହେବ। ତେବେ ଏସିଆ ଏକାଦଶ ପାଇଁ ନାମ ଦେବା ପୂର୍ବରୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଖେଳାଳିଙ୍କ କାର୍ଯ୍ୟଭାର ନେଇ ମୂଲ୍ୟାଙ୍କନ କରିବ। ଭାରତୀୟ ଅଧିନାୟକ ବିରାଟ କୋହଲି ଅତିକମ୍ରେ ଗୋଟିଏ ମ୍ୟାଚ୍ ଖେଳିବେ ବୋଲି ବାଂଲାଦେଶ କ୍ରିକେଟ ବୋର୍ଡ (ବିସିବି) ଘୋଷଣା କରିବା ପରେ ବିସିସିଆଇ ଏହି କଥା କହିଛି।
ନ୍ୟୁଜିଲାଣ୍ଡ ଗସ୍ତ ସାରି ଭାରତୀୟ ଦଳ ମାର୍ଚ୍ଚ ୬ ତାରିଖରେ ସ୍ବଦେଶ ଫେରିବ। ଏହାପରେ ମାର୍ଚ୍ଚ ୧୨ ତାରିଖରେ ଦକ୍ଷିଣ ଆଫିକା ବିପକ୍ଷ ପ୍ରଥମ ଦିନିକିଆ ଖେଳିବା ପୂର୍ବରୁ ଖେଳାଳିମାନେ ଧର୍ମଶାଳାରେ ୧୦ ତାରିଖରେ ଏକାଠି ହେବେ। ୧୫ ତାରିଖରେ ଲକ୍ଷ୍ନୌରେ ଦ୍ୱିତୀୟ ଦିନିକିଆ ଓ ୧୮ରେ କୋଲକାତାରେ ତୃତୀୟ ତଥା ଅନ୍ତିମ ଦିନିକିଆ ମ୍ୟାଚ୍ ଆୟୋଜନ ହେବ। ପ୍ରଥମ ଦିନିକିଆ ପୂର୍ବରୁ ଦଳର ସବୁ ଖେଳାଳି ବାଧ୍ୟତାମୂଳକ ଭାବେ ମେଡିକାଲ ଟେଷ୍ଟର ସମ୍ମୁଖୀନ ହେବେ। ୨୯ରେ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ଆରମ୍ଭ ହେବାର କାର୍ଯ୍ୟକ୍ରମ ରହିଛି। ୧୦ଜଣ ଖେଳାଳିଙ୍କ ନାମ ବିସିବି ସୁପାରିସ କରିଛି। ସେଥିମଧ୍ୟରୁ ୫ଜଣ ଖେଳାଳିଙ୍କୁ ଆମେ ପଠାଇବୁ। ଅତ୍ୟଧିକ କାର୍ଯ୍ୟଭାର ଥିବାରୁ ଆମେ ଏବେ କୌଣସି ଖେଳାଳିଙ୍କ ନାମ ଘୋଷଣା କରିବୁ ନାହିଁ ବୋଲି ବିସିସିଆଇ ତରଫରୁ କୁହାଯାଇଛି। ଉଲ୍ଲେଖଥାଉ କି, ବାଂଲାଦେଶ ପ୍ରତିଷ୍ଠାତା ଶେଖ ମୁଜିବୁର ରହମାନଙ୍କ ଜନ୍ମ ଶତବାର୍ଷିକୀ ପାଳନ ଅବସରରେ ବିସିବି ଏହି ଟି୨୦ ସିରିଜ ଆୟୋଜନ କରୁଛି।
