ନୂଆଦିଲ୍ଲୀ,୮।୬: କରୋନା ଜନିତ ଲକ୍ଡାଉନ ଲାଗି ଦେଶର ଅଣୁ, କ୍ଷୁଦ୍ର ମଧ୍ୟମ ଉଦ୍ୟୋଗ(ଏମ୍ଏସ୍ଏମ୍ଇ)ଗୁଡିକ ଗଭୀର ଭାବେ କ୍ଷତିଗ୍ରସ୍ତ ହୋଇଛନ୍ତି। ଏହି ଶିଳ୍ପଗୁଡିକୁ ୩ ଲକ୍ଷ କୋଟି ଟଙ୍କାର ପାଣ୍ଠି ଯୋଗାଣ ଲାଗି ସରକାର ଏମର୍ଜେନ୍ସି କ୍ରେଡିଟ ଲାଇନ ଗ୍ୟାରେଣ୍ଟି ସ୍କିମ (ଇସିଏଲ୍ଜିଏସ୍) ଘୋଷଣା କରିଥିଲେ। ବର୍ତ୍ତମାନ ସୁଦ୍ଧା ଉକ୍ତ ଯୋଜନାରେ ଏମ୍ଏସ୍ଏମ୍ଇ ୮,୩୨୦ କୋଟି ଟଙ୍କାର ଋଣ ଲାଭ କରିଥିବା ଜଣାପଡିଛି। ରାଷ୍ଟ୍ରାୟତ୍ତ ବ୍ୟାଙ୍କଗୁଡିକ ଜୁନ ୫ ସୁଦ୍ଧା ଏହି ଋଣ ପ୍ରଦାନ କରିଛନ୍ତି ବୋଲି କେନ୍ଦ୍ର ଅର୍ଥ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି।
ଜୁନ ପହିଲାରେ ୧୦୦% ଇସିଏଲ୍ଜିଏସ୍ ଲାଗି ବ୍ୟାଙ୍କଗୁଡିକ ୧୭,୭୦୫ କୋଟି ଟଙ୍କା ଋଣ ଯୋଗାଣ ଲାଗି ମଞ୍ଜୁରୀ ଦେଇଛନ୍ତି। ଆତ୍ମ ନିର୍ଭର ଭାରତ ଯୋଜନାରେ ଅର୍ଥମନ୍ତ୍ରୀ ନିର୍ମଳା ସୀତାରାମନ ଏମ୍ଏସ୍ଏମ୍ଇଗୁଡିକୁ ସହାୟତା କରିବା ଲାଗି ଏଭଳି ଯୋଜନା ସମ୍ପର୍କରେ ଘୋଷଣା କରିଥିଲେ। ବ୍ୟାଙ୍କଗୁଡିକର ଋଣ ପ୍ରଦାନ ସମ୍ପର୍କରେ ସୀତାରାମନ ରବିବାର ଟୁଇଟ ଯୋଗେ ସୂଚନା ଦେଇଛନ୍ତି। ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆ(ଏସ୍ବିଆଇ) ୧୧,୭୦୧ କୋଟି ଟଙ୍କା ଋଣ ପ୍ରଦାନ ଲାଗି ମଞ୍ଜୁରୀ ଦେଇଥିବା ବେଳେ ଜୁନ ୫ ସୁଦ୍ଧା ୬୦୮୪ କୋଟି ଟଙ୍କା ଋଣ ଦେଇ ସାରିଛି। ସେହିଭଳି ପଞ୍ଜାବ ନ୍ୟାଶନାଲ ବ୍ୟାଙ୍କ ୧୯୯୫ କୋଟି ଟଙ୍କା ଋଣ ଦେବାକୁ ମଞ୍ଜୁରୀ ଦେଇଛି। ଏହା ମଧ୍ୟରୁ ୨୪୨.୯୨ କୋଟି ଟଙ୍କାର ଋଣ ଏହି ବ୍ୟାଙ୍କ ଯୋଗାଇ ଦେଇଛି।
ଏମ୍ଏସ୍ଏମ୍ଇ କ୍ଷେତ୍ରକୁ ଇସିଏଲ୍ଜିଏସ୍ ଯୋଜନାରେ ୯.୨୫% ହାରରେ ୩ ଲକ୍ଷ କୋଟି ଟଙ୍କାର ପୁଞ୍ଜି ବ୍ୟବସ୍ଥା କରିବା ପ୍ରସ୍ତାବକୁ ମେ ୨୧ରେ କ୍ୟାବିନେଟ ଅନୁମୋଦନ ଦେଇଥିଲା। କୋଭିଡ୍ ୧୯ ଦ୍ୱାରା କ୍ଷତିଗ୍ରସ୍ତ ହୋଇଥିବା ଶିଳ୍ପଗୁଡିକୁ ସହାୟତା ଯୋଗାଇ ଦେବା ଲାଗି ଏଭଳି ବ୍ୟବସ୍ଥା ହୋଇଛି। ଏହି ଋଣର ୧୦୦% ଗ୍ୟାରେଣ୍ଟି ସରକାର ନେବେ ବୋଲି ଜଣାପଡିଛି।
