ନୂଆଦିଲ୍ଲୀ,୯-୧: ନୀଳାଚଳ ଇସ୍ପାତ ନିଗମ ଲିମିଟେଡ(ଏନ୍ଆଇଏନ୍ଏଲ୍)ରେ ରହିଥିବା ବିଭିନ୍ନ ରାଷ୍ଟ୍ରାୟତ୍ତ ଉଦ୍ୟୋଗର ଅଂଶଧନରୁ ପୁଞ୍ଜି ପ୍ରତ୍ୟାହାର କରାଯିବ। ଏ ସମ୍ପର୍କିତ ପ୍ରସ୍ତାବକୁ କେନ୍ଦ୍ର ସରକାର ବୁଧବାର ନୀତିଗତ ମଞ୍ଜୁରୀ ପ୍ରଦାନ କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବସିଥିବା ଆର୍ଥତ୍କ ବ୍ୟାପାର ସଂକ୍ରାନ୍ତ କ୍ୟାବିନେଟ କମିଟି (ସିସିଇଏ) ବୈଠକରେ ଏହି ପ୍ରସ୍ତାବକୁ ମଞ୍ଜୁରୀ ମିଳିଛି। ରାଷ୍ଟ୍ରାୟତ୍ତ ଉଦ୍ୟୋଗଗୁଡିକ ମଧ୍ୟରେ ଖଣିଜ ଏବଂ ଧାତବ ବ୍ୟବସାୟ ନିଗମ ଲିମିଟେଡ(ଏମ୍ଏମ୍ଟିସି) ୪୯.୭୮%, ଜାତୀୟ ଖଣିଜ ବିକାଶ ନିଗମ(ଏନ୍ଏମ୍ଡିସି) ୧୦.୧୦%, ମେକନ ୦.୬୮% ଏବଂ ଭାରତ ହେଭି ଇଲେକଟ୍ରିକାଲ୍ସ ଲିମିଟେଡ(ଭେଲ୍)ର ୦.୬୮% ଅଂଶଧନ ରହିଛି। ଏହାବାଦ ଓଡ଼ିଶା ସରକାରଙ୍କ ୨ଟି ଉଦ୍ୟୋଗ ଯଥା- ଶିଳ୍ପ ପ୍ରୋତ୍ସାହନ ଓ ନିବେଶ ନିଗମ ଲିମିଟେଡ(ଇପିକଲ)ର ୧୨%, ଓଡ଼ିଶା ଖଣି ନିଗମ(ଓଏମ୍ସି)ର ୨୦.୪୭% ଅଂଶଧନର ମଧ୍ୟ ପୁଞ୍ଜି ପ୍ରତ୍ୟାହାର କରାଯିବ ବୋଲି ଜଣାପଡିଛି। ଦ୍ୱିସ୍ତରୀୟ ନିଲାମି ପ୍ରକ୍ରିୟା ଦ୍ୱାରା ଚୟନ କରାଯାଇଥିବା ଷ୍ଟ୍ରାଟେଜିକ କ୍ରେତାଙ୍କୁ ପୁଞ୍ଜି ହସ୍ତାନ୍ତର କରାଯିବ। ନୀଳାଚଳ ଇସ୍ପାତ ନିଗମ ଲିମିଟେଡ ଏକ ଯୌଥ ଉଦ୍ୟୋଗ ହୋଇଥିବା ବେଳେ ଏଥିରେ ୪ ରାଷ୍ଟ୍ରାୟତ୍ତ ଉଦ୍ୟୋଗ ଏବଂ ଓଡ଼ିଶା ସରକାରଙ୍କ ୨ ସରକାରୀ ଉଦ୍ୟୋଗର ଅଂଶଧନ ରହିଛି। ଏନ୍ଆଇଏନ୍ଏଲ୍ରୁ ଏହି ପୁଞ୍ଜି ପ୍ରତ୍ୟାହାର ଦ୍ୱାରା ଏଥିରେ ନିଷ୍କ୍ରିୟ ହୋଇ ପଡି ରହିଥିବା ସମ୍ବଳ ମୁକ୍ତ ହେବ। ଏହାର ଉପଯୋଗ ସରକାରଙ୍କ ସାମାଜିକ କ୍ଷେତ୍ର ତଥା ବିକାଶ ମୂଳକ କାର୍ଯ୍ୟକ୍ରମ ଲାଗି ଅର୍ଥଯୋଗାଣ ଉଦ୍ଦେଶ୍ୟରେ କରାଯିବ ବୋଲି ସରକାରଙ୍କ ପକ୍ଷରୁ କୁହାଯାଇଛି।
