ଦେବତାଙ୍କ ନାଁରେ ଅଭିଯୋଗ ହୋଇଛି। ସେ ଏବେ ନଜରବନ୍ଦୀରେ । ଏମିତି ଘଟଣା ଦେଖିବାକୁ ମିଳିଛି ହିମାଚଳ ପ୍ରଦେଶର କୁଲୁ ଦଶହରାରେ। କୁଲୁ ପ୍ରଶାସନ ବିଧିବଦ୍ଧ ଭାବେ ଦେବତାଙ୍କୁ ନିମନ୍ତ୍ରଣ କରିନଥିବାରୁ ସେମାନେ ଦଶହରାରେ ସାମିଲ ହେବାକୁ ଆସିଥିବାରୁ ତାଙ୍କ ବିରୋଧରେ ଅଭିଯୋଗ ଅଣାଯାଇ ନଜରବନ୍ଦୀ କରାଯାଇଛି। ଏହି ଦୁଇ ଦେବତା ହେଲେ ଶୃଙ୍ଗ ଋଷି ଓ ବାଲୁ ନାଗ। ୧୬୫୦ରୁ କୁଲୁ ଦଶହରାରେ ପ୍ରଭୁ ରଘୁନାଥଙ୍କ ରଥଯାତ୍ରା ଅନୁଷ୍ଠିତ ହୋଇଆସୁଛି। ରଥଯାତ୍ରାରେ ପ୍ରଭୁ ରଘୁନାଥଙ୍କ ଡାହାଣ ପାଖରେ ସର୍ବୋଚ୍ଚ ଦେବତା ରହିିବାର ବିଧି ରହିଛି। ଏହି ସ୍ଥାନରେ କିଛି ବର୍ଷ ଶୃଙ୍ଗ ଋଷି ରହି ୧୯୭୦ରୁ ଭାଗ ନେବା ବନ୍ଦ କରିଦେବା ପରେ ବାଲୁ ଦେବତା ସେହି ଜାଗା ନେଇଥିଲେ। ୧୧ ବର୍ଷ ପରେ ପୁଣି ଶୃଙ୍ଗ ଋଷି ରଥଯାତ୍ରାରେ ଭାଗ ନେବାପାଇଁ ଆସିବାରୁ ସର୍ବୋଚ୍ଚ ସ୍ଥାନକୁ ନେଇ ବିବାଦ ଆରମ୍ଭ ହୋଇଥିଲା । ବାଲୁ ନାଗ ଲକ୍ଷ୍ମଣଙ୍କ ଅବତାର ଓ ସେ ରଘୁନାଥ (ବଡ଼ଭାଇ ରାମ)ଙ୍କ ସହ ରହିବେ । ଅନ୍ୟପକ୍ଷରେ ଶୃଙ୍ଗ ଋଷିଙ୍କ ଭକ୍ତ ଯୁକ୍ତି ବାଢିଛନ୍ତି ଯେ ଗୁରୁ ଶିଷ୍ୟ ସମ୍ପର୍କ ସବୁ ସମ୍ପର୍କଠାରୁ ବି ବଡ଼। ଏଣୁ ସେ ରଘୁନାଥଙ୍କ ସହ ରହିବା ପାଇଁ ଯୋଗ୍ୟ। ଏହିମତେ ଦଶହରାରେ ସର୍ବୋଚ୍ଚ ସ୍ଥାନକୁ ନେଇ ଦୁଇ ଦେବତାଙ୍କ ଭକ୍ତଙ୍କ ମଧ୍ୟରେ ବିବାଦ ହାଇକୋର୍ଟରେ ବି ପହଞ୍ଚିଯାଇଛି। ଏଯାବତ ତାହା ସମାଧାନ କରାଯାଇନାହିଁ। ଏଥିପାଇଁ ୧୦ ବର୍ଷ ହେବ କୁଲୁ ପ୍ରଶାସନ ଦୁଇ ଦେବତାଙ୍କୁ ଆମନ୍ତ୍ରଣ କରୁନାହାନ୍ତି। କିନ୍ତୁ ବିନା ନିମନ୍ତ୍ରଣରେ ଏଥର ସମର୍ଥକମାନେ ଦଶହରାକୁ ପାଲିଙ୍କିରେ ସେମାନଙ୍କ ଦେବତାଙ୍କୁ ଆଣିଥିଲେ। ଏହାପରେ କୌଣସି ଅପ୍ରୀତିକର ପରିସ୍ଥିତିକୁ ଏଡାଇବା ପାଇଁ ଦଶହରାରେ ପହଞ୍ଚିବା ପରେ ପୋଲିସ ଦୁଇ ଦେବତାଙ୍କୁ ନଜରବନ୍ଦୀ କରି ରଖିଛନ୍ତିି। କଡ଼ା ନିରାପତ୍ତା ମଧ୍ୟରେ ଦେତାଙ୍କୁ ଏକ କ୍ୟାମ୍ପ୍ରେ ରଖାଯାଇଛି।
