ମୁମ୍ବାଇ: ଅନେକ ଦିନ ହେଲାଣି ବଲିଉଡ୍ ଭର୍ସାଟାଇଲ୍ ଆକ୍ଟର ଇର୍ଫାନ ଖାନ୍ଙ୍କ ଫିଲ୍ମ ‘ଅଂଗ୍ରେଜୀ ମିଡିୟମ୍’କୁ ନେଇ ଚର୍ଚ୍ଚା ଚାଲିଛି। ଫିଲ୍ମର ପ୍ରଥମ ଲୁକ୍ ରିଲିଜ୍ ହୋଇସାରିିଥିବା ବେଳେ ଗୁରୁବାର ଟ୍ରେଲର୍ ରିଲିଜ୍ ହେବ। ତେବେ ଏହା ପୂର୍ବରୁ ଇର୍ଫାନ୍ଙ୍କ ଏକ ଇମୋଶନାଲ ପୋଷ୍ଟ ସମସ୍ତଙ୍କ ଧ୍ୟାନ ଆକର୍ଷଣ କରିଛି।
ଇର୍ଫାନ୍ ନିଜ ଅଫିସିଆଲ ଟୁଇଟର ହ୍ୟାଣ୍ଡେଲ୍ରେ ଏକ ଇମୋଶନାଲ ଭିଡିଓ ଶେୟାର କରିଛନ୍ତି। ଭିଡିଓରେ ତାଙ୍କ ଫିଲ୍ମ ‘ଅଂଗ୍ରେଜୀ ମିଡିୟମ୍’ର ଫଟୋଗୁଡ଼ିକୁ ଦୃଶ୍ୟଭାବେ ବ୍ୟବହାର କରାଯାଇଥିବା ବେଳେ ଖୋଦ୍ ଇର୍ଫାନ୍ଙ୍କ ଭଏସ୍ଓଭର ଶୁଣିବାକୁ ମିଳିଛି। ଏହି ଭିଡିଓ ମାଧ୍ୟମରେ ସେ ନିଜ ଭାବନାକୁ ପରିପ୍ରକାଶ କରିଛନ୍ତି, ଯାହା ଅତ୍ୟନ୍ତ ମର୍ମସ୍ପର୍ଶୀ ହୋଇଛି। ତେବେ ଏନେଇ ଫ୍ୟାନ୍ମାନେ ଇର୍ଫାନ୍ଙ୍କୁ ନିଜ ଭଲପାଇବା ଜଣାଉଥିବା ବେଳେ ବି-ଟାଉନ୍ର ଅନେକ ବଡ଼ ବଡ଼ କଳାକାର ମଧ୍ୟ ନିଜର ପ୍ରତିକ୍ରିୟା ଦେଇଛନ୍ତି। ଭିଡିଓଟିରେ ଇର୍ଫାନ କହିଛନ୍ତି, “ହେଲୋ ଭାଇ ଭଉଣୀମାନେ, ନମସ୍କାର। ଆଜି ମୁଁ ଆପଣଙ୍କ ସହ ଅଛି ଆଉ ନାହିଁ ମଧ୍ୟ। ଏହି ଫିଲ୍ମ ‘ଅଂଗ୍ରେଜୀ ମିଡିୟମ୍’ ମୋ ପାଇଁ ବହୁତ ସ୍ବତନ୍ତ୍ର। ବିଶ୍ୱାସ କରନ୍ତୁ, ମୋର ହୃଦୟରୁ ଇଚ୍ଛା ଥିଲା ଫିଲ୍ମଟିକୁ ଯେତିକି ଶ୍ରଦ୍ଧାରେ ବନେଇଥିଲି, ସେତିକି ହିଁ ଭଲପାଇବା ସହ ଏହାର ପ୍ରମୋଶନ ମଧ୍ୟ କରିଥାନ୍ତି। କିନ୍ତୁ ମୋ ଶରୀର ଭିତରେ କିଛି ଅନାବଶ୍ୟକ ଅତିଥି ବସି ରହିଛନ୍ତି। ସେମାନଙ୍କ ସହ ଆଲୋଚନା ଚାଲିଛି। ଦେଖିବା ଏହି ଆଲୋଚନା କେଉଁ ଦିଗକୁ ଯାଉଛି। ସେ ଯାହା ବି ହେବ, ମୁଁ ଆପଣଙ୍କୁ ଜଣାଇଦେବି।” ଇର୍ଫାନ୍ ଏଭଳି ଅନେକ ଇମୋଶନାଲ୍ ଶବ୍ଦ କହି ନିଜ ଭାବନା ବ୍ୟକ୍ତ କରିଛନ୍ତି। ଏହାସହ ଗୁରୁବାର ଫିଲ୍ମର ଟ୍ରେଲର୍ ରିଲିଜ୍ ହେବ ବୋଲି ଜଣାଇବା ସହ ତାଙ୍କୁ ଅପେକ୍ଷା କରିବାକୁ ଅନୁରୋଧ କରିଛନ୍ତି। ଅନ୍ୟପଟେ ଏନେଇ ଅଭିନେତା ହ୍ରିତିକ୍ ରୋଶନ ଏକ ଟୁଇଟ୍ କରି ଇର୍ଫାନଙ୍କ ପ୍ରତି ନିଜ ଭଲପାଇବା ଜଣାଇଛନ୍ତି। ସେ ଲେଖିଛନ୍ତି, “ଇର୍ଫାନ, ଆପଣଙ୍କ ପାଇଁ ମୋର ଭଲପାଇବା ଏବଂ ପ୍ରାର୍ଥନା ସବୁବେଳେ ରହିଛି। ଫିଲ୍ମଟି ବହୁତ ଖାସ୍ ଲାଗୁଛି । ମୁଁ ଏହାକୁ ଅପେକ୍ଷା କରିଛି। ଆଉ ଯେପରି ଆପଣ କହିଲେ, ଆପଣଙ୍କୁ ମଧ୍ୟ ଅପେକ୍ଷା କରିଛି।” ସେହିଭଳି ବଲିଉଡ୍ ହିରୋ ବରୁଣ ଧାଓ୍ବନ ମଧ୍ୟ ଟୁଇଟ୍ କରି ଲେଖିଛନ୍ତି, “ପରିଶ୍ରମ ଓ ସାହସର ସହ ଫିଲ୍ମ ନିର୍ମାଣ କରାଯାଇଛି। ଇର୍ଫାନ୍ ସାର୍, ଆପଣଙ୍କୁ ଅପେକ୍ଷା କରିଛୁ।” ଅନ୍ୟପକ୍ଷରେ ଫିଲ୍ମ ‘ଅଂଗ୍ରେଜୀ ମିଡିୟମ୍’ରେ ଇର୍ଫାନଙ୍କ ବ୍ୟତୀତ କରୀନା କପୁର ଖାନ୍ ଓ ରାଧିକା ମଦାନ ମୁଖ୍ୟ ଭୂମିକାରେ ନଜରକୁ ଆସିବେ। ସେହିଭଳି ଡିମ୍ପଲ୍ କପାଡିଆ ଏବଂ ଦୀପକ ଡୋବରିୟାଲ୍ଙ୍କୁ ମଧ୍ୟ ଦେଖିବାକୁ ମିିଳିବ। ସୂଚନା ଯେ, ଇର୍ଫାନ ଏକ ବିରଳ କ୍ୟାନ୍ସରରେ ପୀଡ଼ିତ, ଯାହା ନ୍ୟୁରୋଏଣ୍ଡୋକ୍ରାଇନ୍ ଟ୍ୟୁମର ବୋଲି ଚିହ୍ନଟ ହୋଇଛି। ସେ ଲଣ୍ଡନରେ କ୍ୟାନ୍ସର ଚିକିତ୍ସା ସାରି ୨୦୧୯ ଫେବୃୟାରୀରେ ଭାରତ ଫେରିଛନ୍ତି।
