ଭୁବନେଶ୍ୱର,୫ା୧୧(ବ୍ୟୁରୋ): ନେଟ୍ଓ୍ବର୍କରେ ସମସ୍ୟା ଲାଗି ରହିବାରୁ ସୋମବାର ସାରା ଦେଶରେ ଇଣ୍ଡିଗୋ ବିମାନ ଚଳାଚଳ ବାଧାପ୍ରାପ୍ତ ହୋଇଥିଲା। କେତେକ ବିମାନ ୨ରୁ ୩ ଘଣ୍ଟା ବିଳମ୍ବରେ ଚଳାଚଳ କରିଥିବାବେଳେ ଆଉ କେତେକ ସେବାକୁ ବାତିଲ କରିଦିଆଯାଇଥିଲା। ଏଭଳି ସମସ୍ୟା ଯୋଗୁ ହଜାର ହଜାର ଯାତ୍ରୀ ନାନା ହଟହଟା ହୋଇଥିବା ଦେଖିବାକୁ ମିଳିଥିଲା।
ହସ୍ତଗତ ସୂଚନାନୁସାରେ, ଇଣ୍ଡିଗୋ ବିମାନ ଚଳାଚଳ କମ୍ପାନୀର ଚେକ୍-ଇନ୍ ସିଷ୍ଟମ୍ରେ କେତେକ ତ୍ରୁଟି ଦେଖାଦେଇଥିଲା। ଫଳରେ ଭୁବନେଶ୍ୱର, ବେଙ୍ଗାଲୁରୁ, ମୁମ୍ବାଇ, ଗୁଆହାଟୀ, ପାଟନା ଆଦି ବିମାନ ବନ୍ଦରରେ ଇଣ୍ଡିଗୋ ବିମାନଗୁଡିକ ଘଣ୍ଟା ଘଣ୍ଟା ଧରି ଅଟକି ରହିଥିଲା। ଏକାଧିକ ବିମାନକୁ ବାତିଲ୍ କରିବାକୁ ମଧ୍ୟ କମ୍ପାନୀ କର୍ତ୍ତପକ୍ଷ ବାଧ୍ୟ ହୋଇଥିଲେ। ଜରୁରୀ କାର୍ଯ୍ୟ ପାଇଁ ବାହାରିଥିବା ଯାତ୍ରୀମାନେ ବହୁ ସମୟ ଧରି ଅପେକ୍ଷା କରିବା ପରେ ଅସନ୍ତୋଷ ପ୍ରକାଶ କରିଥିଲେ। ବିଶେଷକରି ମୁମ୍ବାଇ, ବେଙ୍ଗାଲୁରୁ, ଗୁଆହାଟୀ ଏୟାରପୋର୍ଟରେ ଯାତ୍ରୀମାନେ ଅଧିକ ଭିଡ ଜମାଇଥିବା ଦେଖିବାକୁ ମିଳିଥିଲା। ବହୁ ଯାତ୍ରୀ ଟ୍ବିଟରରେ ଇଣ୍ଡିଗୋର ସେବାକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ କରିଥିଲେ। ଭୁବନେଶ୍ୱରରେ ଇଣ୍ଡିଗୋ ଉଡ଼ାଣ ନିର୍ଦ୍ଧାରିତ ସମୟଠାରୁ ୨ ଘଣ୍ଟାରୁ ଅଧିକ ଓ ମୁମ୍ବାଇ ଏୟାରପୋର୍ଟରେ ୩ ଘଣ୍ଟାରୁ ଊର୍ଦ୍ଧ୍ୱ ସମୟ ଧରି ବିଳମ୍ବ ହୋଇଥିଲା। ଅପରାହ୍ନ ୨ଟା ୪୫ରେ ସିଷ୍ଟମ୍ କାର୍ଯ୍ୟକ୍ଷମ ହେବା ନେଇ ଇଣ୍ଡିଗୋ ଟ୍ବିଟ୍ କରି ସୂଚନା ଦେଇଥିଲା। ହେଲେ ପୂରା ନେଟ୍ଓ୍ବର୍କ ସ୍ବାଭାବିକ ହୋଇ ନ ଥିବା ଓ ଆହୁରି କିଛି ସମସ୍ୟା ଥିବାରୁ ଯାତ୍ରୀମାନେ ଏୟାରପୋର୍ଟ ଯିବା ପୂର୍ବରୁ ବିମାନ ଚଳାଚଳ ସ୍ଥିତି ଯାଞ୍ଚ କରିବାକୁ ଇଣ୍ଡିଗୋ ପକ୍ଷରୁ କୁହାଯାଇଛି।
