ସିଡ୍ନୀ,୨୮।୭(ଏଏଫ୍ପି)- ଆସେସ୍ ସିରିଜ ପାଇଁ ଅଷ୍ଟ୍ରେଲିଆ ଦଳରୁ ଆଲେକ୍ସ କାରେଙ୍କୁ ବାଦ୍ ଦିଆଯାଇଛି। ତେବେ ଏହାକୁ କେତେକ ପୂର୍ବତନ କ୍ରିକେଟର ନାପସନ୍ଦ କରିଛନ୍ତି। ପୂର୍ବତନ କ୍ରିକେଟର ମାର୍କ ଓ୍ବ, ସେନ୍ ଓ୍ବାର୍ନ କାରେ ବାଦ୍ ପଡିବା ନେଇ ଆଶ୍ଚର୍ଯ୍ୟ ପ୍ରକଟ କରିଛନ୍ତି। ଅନ୍ୟପଟେ ଜୋ ବର୍ନସ ଓ କୁର୍ଟିସ ପାଟରସନ ଆସେସରୁ ବାଦ୍ ପଡିବା ନେଇ ପୂର୍ବତନ ଅଧିନାୟକ ମାର୍କ ଟେଲର ମଧ୍ୟ ଚକିତ ହୋଇଛନ୍ତି।
୫ ଟେଷ୍ଟବିଶିଷ୍ଟ ଆସେସ୍ ସିରିଜ ପାଇଁ ଅଷ୍ଟ୍ରେଲିଆ ଏକ ୧୭ଜଣିଆ ଦଳ ଘୋଷଣା କରିଛି। ଏହି ଦଳକୁ ପୂର୍ବତନ ଅଧିନାୟକ ଷ୍ଟିଭ ସ୍ମିଥ୍, ଓପନର ଡେଭିଡ ଓ୍ବାର୍ନର ଓ କାମେରନ ବ୍ୟାଙ୍କ୍ରଫ୍ଟ ପ୍ରତ୍ୟାବର୍ତ୍ତନ କରିଛନ୍ତି। ଗତବର୍ଷ ଦକ୍ଷିଣ ଆଫ୍ରିକା ବିପକ୍ଷରେ କେପ୍ଟାଉନ ଟେଷ୍ଟ ଖେଳିବା ଅବସରରେ ଏହି ୩ କ୍ରିକେଟର ବଲ୍ ଟ୍ୟାମ୍ପରିଂ କରି ଦୋଷୀ ସାବ୍ୟସ୍ତ ହେବା ପରେ ବାସନ୍ଦ ହୋଇଥିଲେ। ଗତ ଦୁଇବର୍ଷ ହେବ ଟେଷ୍ଟ ଖେଳି ନ ଥିବା ମାଥ୍ୟୁ ଓ୍ବେଡ୍ ଦଳରେ ସ୍ଥାନ ପାଇଛନ୍ତି। ଘରୋଇ କ୍ରିକେଟରେ ଦମ୍ଦାର ବ୍ୟାଟିଂ ପ୍ରଦର୍ଶନ କରି ସେ ଦଳକୁ ପ୍ରତ୍ୟାବର୍ତ୍ତନ କରିଛନ୍ତି। ଅଧିନାୟକ ଟିମ ପେନ୍ଙ୍କ ବ୍ୟାକ୍ ଉଇକେଟକିପର ଭାବେ ନୂଆ ଭୂମିକାରେ ଅବତୀର୍ଣ୍ଣ ହେବେ। ଫଳରେ ଗତ ବିଶ୍ୱକପ୍ରେ ପ୍ରଭାବୀ ପ୍ରଦର୍ଶନ କରିଥିବା କାରେଙ୍କୁ ଅଣଦେଖା କରାଯାଇଛି।
ବିଶ୍ୱକପ୍ରେ ଭଲ ପ୍ରଦର୍ଶନ କରିଥିଲେ ମଧ୍ୟ କାରେଙ୍କୁ ବାଦ୍ ଦେବା ମୋତେ ଆଶ୍ଚର୍ଯ୍ୟ କରିଛି ବୋଲି କିମ୍ବଦନ୍ତୀ ବ୍ୟାଟ୍ସମ୍ୟାନ ଷ୍ଟିଭ୍ ଟୁଇଟ୍ କରିଛନ୍ତି। ପେନ୍ଙ୍କ ପରେ ସେ ଅଷ୍ଟ୍ରେଲିଆର ଦ୍ୱିତୀୟ ଶ୍ରେଷ୍ଠ ଉଇକେଟକିପର ବ୍ୟାଟ୍ସମ୍ୟାନ। ଓ୍ବାର୍ନ ମଧ୍ୟ ଏ ନେଇ ସମାନ ମତ ପୋଷଣ କରିଛନ୍ତି। ସେହିପରି ଜୋ ବନର୍ସ ଓ ମିଡିଲ ଅର୍ଡର ବ୍ୟାଟ୍ସମ୍ୟାନ ପାଟରସନ ଦଳରେ ସ୍ଥାନ ପାଇ ନ ଥିବାରୁ ପୂର୍ବତନ ଅଧିନାୟକ ଅସନ୍ତୋଷ ଜାହିର କରିଛନ୍ତି। ଗତ ଆସେସ୍ରେ ଅଷ୍ଟ୍ରେଲିଆ ବିଜୟୀ ହୋଇଥିଲେ ମଧ୍ୟ ଇଂଲଣ୍ଡରେ ଗତ ୧୮ ବର୍ଷ ମଧ୍ୟରେ କୌଣସି ସିରିଜରେ ବିଜୟୀ ହୋଇନାହିଁ। ତେଣୁ ଦଳ ଚୟନରେ ସନ୍ତୁଳନ ରହିବା ଆବଶ୍ୟକ ବୋଲି ଟେଲର କହିଛନ୍ତି।
