ଢେଙ୍କିକୋଟ, ୩ା୬(ଡି.ଏନ୍.ଏ.) -ଘଟଗାଁ ତହସିଲ ଅଧୀନ ପିପିଳିଆ ରାଜସ୍ବ ନିରୀକ୍ଷକଙ୍କୁ ମାଡ଼ ମାରି ଜଣେ ଗିରଫ ହୋଇଥିବାବେଳେ ଅନ୍ୟ ଜଣେ ଫେରାର ଥିବା ଜଣାପଡ଼ିଛି। ପୋଲିସ ସୂଚନା ଅନୁଯାୟୀ ଢେଙ୍କିକୋଟ ଫାଣ୍ଡି ଅନ୍ତର୍ଗତ ପିପିଳିଆ ପଞ୍ଚାୟତ ମଣ୍ଡାଟାଙ୍ଗର ଗ୍ରାମରେ ଜଣେ ବ୍ୟକ୍ତି ଜମି ଚିହ୍ନଟ ନିମନ୍ତେ ତହସିଲଦାରଙ୍କୁ ଜଣାଇଥିଲେ। ତହସିଲଦାର ସରକାରୀ ଚିଠି ପାଇବା ପରେ ଗତ ୩୧ ତାରିଖରେ ପିପିଳିଆ ରାଜସ୍ବ ବିଭାଗର ଅତିରିକ୍ତ ନିରୀକ୍ଷକ ହୃଷୀକେଶ ମାଝୀ ଏବଂ ଘଟଗାଁ ତହସିଲର ନିରୀକ୍ଷକ ସୁଶିଲ କୁମାର କର ସରକାରୀ ଖାତା ଖତିୟାନ ଓ ନକ୍ସା ଧରି ମଣ୍ଡାଟାଙ୍ଗରରେ ପହଞ୍ଚି ଜମି ଚିହ୍ନଟ ପ୍ରକ୍ରିୟା ଗ୍ରାମବାସୀଙ୍କ ଉପସ୍ଥିତିରେ ଆରମ୍ଭ କରିଥିଲେ। ମାତ୍ର କିଛି ସମୟ ପରେ ଗ୍ରାମର ଶୀତଳ ମହାନ୍ତ ଏବଂ ଅନ୍ୟ ଜଣେ ପହଞ୍ଚି ରାଜସ୍ବ ନିରୀକ୍ଷକ ହୃଷୀକେଶ ଏବଂ ସୁଶୀଲଙ୍କୁ ଗାଳି ଗୁଲଜ କରିବା ସହ ସରକାରୀ ଖାତା ଖତିଆନ ଓ ନକସାକୁ ଚିରି ଫିଙ୍ଗିଦେଇଥିଲେ। ପରେ ତାଙ୍କୁ ମାଡ଼ମାରି ଜମିରୁ ଚାଲିଯିବା ପାଇଁ ଧମକ ଦେଇଥିଲେ। ଏଥିଲାଗି ଜମି ଚିହ୍ନଟ ହୋଇପାରି ନ ଥିଲା। ଏନେଇ ଶନିବାର ଉଭୟ ରାଜସ୍ବ ନିରୀକ୍ଷକ ଘଟଗାଁ ଥାନାରେ ଲିଖିତ ଅଭିଯୋଗ କରିଥିଲେ। ଥାନା ଆଇଆଇସି ବନ୍ଦନା ପାତ୍ର ଏକ ମାମଲା (ନଂ ୫୭/୦୯) ରୁଜୁ କରି ଘଟଣାର ତଦନ୍ତ ନିମନ୍ତେ ଢେଙ୍କିକୋଟ ଫାଣ୍ଡି ଅଧିକାରୀ ସତ୍ୟନାରାୟଣ ପରିଡ଼ାଙ୍କୁ ନିର୍ଦ୍ଦେଶ ଦେଇଥିଲେ। ତଦନୁଯାୟୀ ଫାଣ୍ଡି ଅଧିକାରୀ ଶନିବାର ଅପରାହ୍ନରେ ମଣ୍ଡା ଟାଙ୍ଗର ଗ୍ରାମରେ ସଦଳବଳେ ଚଢ଼ାଉ କରି ଶୀତଳ ମହାନ୍ତକୁ ଗିରଫ କରିଛନ୍ତି। ଅନ୍ୟ ଅଭିଯୁକ୍ତ ଫେରାର୍ ଅଛନ୍ତି। ରବିବାର ଶୀତଳଙ୍କୁ କୋର୍ଟ ଚାଲାଣ କରାଯାଇଛି।
