ବୁଏନସ ଏରିଜ୍, ୧୩ା୮ (ଏଏଫ୍ପି)-ଆର୍ଜେଣ୍ଟିନାର ୧୯୮୬ ଫୁଟ୍ବଲ ବିଶ୍ୱକପ୍ ବିଜୟୀ ଡିଫେଣ୍ଡର ଜୋସ୍ ଲୁଇସ୍ ବ୍ରାଉନ୍ଙ୍କର ପରଲୋକ ଘଟିଛି। ତାଙ୍କୁ ୬୨ବର୍ଷ ହୋଇଥିଲା। ସେ ଅଲ୍ଝିମର୍ସ ରୋଗରେ ପୀଡ଼ିତ ଥିଲେ ବୋଲି ତାଙ୍କ କ୍ଲବ ଏଷ୍ଟଡିଏଣ୍ଟ୍ସ ଡି’ ଲା ପ୍ଲାଟା ପକ୍ଷରୁ ସୂଚନା ଦିଆଯାଇଛି। ବ୍ରାଉନ୍ ତାଙ୍କ ବନ୍ଧୁମାନଙ୍କ ନିକଟରେ ‘ଟାଟା’ ନାମରେ ପରିଚିତ ଥିଲେ। ସେ ଆର୍ଜେଣ୍ଟିନା ତରଫରୁ ୩୬ଟି ମ୍ୟାଚ ଖେଳିଛନ୍ତି। ୧୯୮୬ରେ ପଶ୍ଚିମ ଜର୍ମାନୀ ବିପକ୍ଷ ବିଶ୍ୱକପ୍ ଫାଇନାଲରେ ଆର୍ଜେଣ୍ଟିନାର ୩-୨ ବିଜୟରେ ସେ ଦଳ ପକ୍ଷରୁ ପ୍ରଥମ ଗୋଲ ସ୍କୋର କରିଥିଲେ। ଜୋସ୍ ଲୁଇସ୍ ବ୍ରାଉନ୍ଙ୍କ ବିନା ଆମେ ୧୯୮୬ ବିଶ୍ୱକପ୍ ଜିତିପାରି ନ ଥାନ୍ତୁ ବୋଲି ଆର୍ଜେଣ୍ଟିନା କିମ୍ବଦନ୍ତୀ ଡିଏଗୋ ମାରାଡୋନା ଇନ୍ଷ୍ଟାଗ୍ରାମ୍ରେ ପ୍ରକାଶ କରିଛନ୍ତି। ଜଣେ ଖେଳାଳି ଭାବେ ତାଙ୍କ କ୍ୟାରିୟର ଶେଷ ହେବାପରେ ସେ କୋଚ୍ ଭାବେ କାର୍ଯ୍ୟ କରିଛନ୍ତି। ସର୍ଗିଓ ବଟିଷ୍ଟାଙ୍କ ସହିତ ସେ ଦେଶର ୨୩ ବର୍ଷରୁ କମ୍ ଫୁଟ୍ବଲ ଦଳର କୋଚ୍ ଭାବେ କର୍ଯ୍ୟ କରିଛନ୍ତି। ଏହି ଦଳ ୨୦୦୮ ଅଲିମ୍ପିକ୍ସ ଫୁଟ୍ବଲ ଟାଇଟଲ ଜିତିଥିଲା।
