ନବରଙ୍ଗପୁର, ୭।୩(ବି.ପ୍ର.): ନବରଙ୍ଗପୁର ଜିଲା ନନ୍ଦାହାଣ୍ଡି ବ୍ଲକ ଦହଣା ଗ୍ରାମରେ ଗତ କିଛିଦିନ ହେବ ଆତଙ୍କ ଖେଳାଉଥିବା ଭାଲୁକୁ କାବୁ କରାଯାଇଛି। ବନବିଭାଗ ପକ୍ଷରୁ ବସାଯାଇଥିବା ଯନ୍ତାରେ ଶୁକ୍ରବାର ବିଳମ୍ବିତ ରାତିରେ ଭାଲୁଟି ପଡିଛି।
ଗତ କିଛିଦିନ ପୂର୍ବେ ୨ଟି ଭାଲୁ ଖାଦ୍ୟ ଅନ୍ବେଷଣରେ ଦହଣା ଗ୍ରାମକୁ ପଶିଆସିଥିଲା। ଗ୍ରାମରେ ସମସ୍ତଙ୍କ ବାଡିରେ ପଶି ଫଳ, ଆଖୁ ଫସଲ ନଷ୍ଟ କରିବା ସହ ଆତଙ୍କ ଖେଳାଉଥିଲେ। ଏ ନେଇ ବନବିଭାଗକୁ ଅବଗତ କରାଯିବା ପରେ ବନବିଭାଗ ପକ୍ଷରୁ ଏକ ଟିମ୍ ଗଠନ କରାଯାଇ ଉକ୍ତ ଭାଲୁର ଗତିବିଧି ଉପରେ ନଜର ରଖାଯାଉଥିଲା। ଶୁକ୍ରବାର ରାତିରେ ଭାଲୁକୁ ଧରିବା ପାଇଁ ଏକ ଯନ୍ତା ବସାଯିବା ପରେ ବନବିଭାଗ ଭାଲୁକୁ ଧରିବାରେ ସଫଳ ହୋଇଛି । ଯନ୍ତା ସହ ଭାଲୁକୁ ବନବିଭାଗ ଏକ ଅଜଣା ସ୍ଥାନରେ ରଖିଛି। ଭାଲୁର ସ୍ବାସ୍ଥ୍ୟ ପରୀକ୍ଷା ପରେ ପରବର୍ତ୍ତୀ ପଦକ୍ଷେପ ନିଆଯିବ ବୋଲି ଜଣାପଡ଼ିଛି। ତେବେ ଅନ୍ୟ ଭାଲୁର ସନ୍ଧାନ ମିଳି ନାହିଁ।
