ସିଡ୍ନୀ, ୩।୩ (ପି.ଟି.)- ଆଇସିସି ମହିଳା ଟି୨୦ ବିଶ୍ୱକପ୍ର ସେମିଫାଇନାଲ ଲାଇନ୍ଅପ୍ ଚୂଡ଼ାନ୍ତ ହୋଇଯାଇଛି। ଦକ୍ଷିଣ ଆଫ୍ରିକା ଓ ଓ୍ବେଷ୍ଟଇଣ୍ଡିଜ ମଧ୍ୟରେ ମଙ୍ଗଳବାର ଖେଳାଯାଇଥିବା ଅନ୍ତିମ ଗ୍ରୁପ୍ ପର୍ଯ୍ୟାୟ ମ୍ୟାଚ୍ ବର୍ଷା ଲାଗି ବାତିଲ ହୋଇଯିବା ଫଳରେ ସେମିଫାଇନାଲ ଲାଇନ୍ଅପ୍ ସ୍ପଷ୍ଟ ହୋଇଥିଲା। ଭାରତ ଓ ଇଂଲଣ୍ଡ ମଧ୍ୟରେ ପ୍ରଥମ ସେମିଫାଇନାଲ ମ୍ୟାଚ୍ ଖେଳାଯିବ। ସେହିଭଳି ୪ଥରର ଚାମ୍ପିୟନ ଅଷ୍ଟ୍ରେଲିଆ ୨ୟ ସେମିଫାଇନାଲରେ ଦକ୍ଷିଣ ଆଫ୍ରିକାକୁ ଭେଟିବ। ଉଭୟ ସେମିଫାଇନାଲ ଗୋଟିଏ ଦିନରେ (ମାର୍ଚ୍ଚ ୫, ଗୁରୁବାର) ଅନୁଷ୍ଠିତ ହେବ। ଭାରତ ଗ୍ରୁପ୍ ପର୍ଯ୍ୟାୟରେ ୪ ମ୍ୟାଚ୍ ଖେଳି ୪ ବିଜୟ ସହ ୮ ପଏଣ୍ଟ ପାଇ ଗ୍ରୁପ୍-ଏ’ରେ ଶୀର୍ଷ ସ୍ଥାନରେ ରହିଛି।
ଯୋଗୁ ମ୍ୟାଚ୍ ବାତିଲ୍ ହେବା ଫଳରେ ଉଭୟ ଦକ୍ଷିଣ ଆଫ୍ରିକା ଓ ଓ୍ବେଷ୍ଟଇଣ୍ଡିଜ ଗୋଟିଏ ଲେଖାଏ ପଏଣ୍ଟ ବାଣ୍ଟି ନେଇଥିଲେ। ଫଳରେ ୪ ମ୍ୟାଚ୍ରୁ ମୋଟ୍ ୭ ପଏଣ୍ଟ ସହ ଦକ୍ଷିଣ ଆଫ୍ରିକା ଗ୍ରୁପ୍-ବି’ରେ ଶୀର୍ଷ ସ୍ଥାନରେ ହାସଲ କରିଛି। ସେହିଭଳି ଇଂଲଣ୍ଡ ମୋଟ ୬ ପଏଣ୍ଟ ସହ ଦ୍ୱିତୀୟ ସ୍ଥାନରେ ରହି ସେମିଫାଇନାଲରେ ଭାରତକୁ ଭେଟିବ। ଏଥିସହ ୨୦୧୮ ସେମିଫାଇନାଲର ରିପିଟ୍ ଏହି ବିଶ୍ୱକପ୍ରେ ଦେଖିବାକୁ ମିଳିଛି। ୨୦୧୮ ସଂସ୍କରଣରେ ମଧ୍ୟ ଭାରତ ଓ ଇଂଲଣ୍ଡ ମଧ୍ୟରେ ସେମିଫାଇନାଲ ଅନୁଷ୍ଠିତ ହୋଇଥିଲା। ଏଥିରେ ଭାରତକୁ ପରାସ୍ତ କରି ଇଂଲଣ୍ଡ ଫାଇନାଲକୁ ଉଠିଥିଲା। କିନ୍ତୁ ଫାଇନାଲରେ ଅଷ୍ଟ୍ରେଲିଆ ନିକଟରୁ ହାରି ଇଂଲଣ୍ଡ ରନର୍ସଅପ୍ରେ ସନ୍ତୁଷ୍ଟ ରହିଥିଲା।
