ଲାଠୋର,୨୯ା୪(ଡି.ଏନ୍.ଏ.): ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଅଧୀନ କରୁଆଁଝର ପଁଚେତ୍ର ସାନଗୁର୍ଜିଭଟା ଗାଁର ପାଲିପଡ଼ାର ଅଶୋକ ବର୍ଗେ(୩୦)। ଗଲା ୫ ବଛର ହେଲା ସେ କେହେନ୍ସି ଗୁଟେ ଅଜନା ରୋଗ୍ରେ ପୀଡ଼ିତ ଥିଲେ। ସେ ଟଁକା ପଏସା ଅଭାବୁ ଚିକିତ୍ସିତ ନାଇଁ ହେଇପାରି ଘରେ ପଡ଼ିରହିଥିଲେ।
ସୂଚନା ହିସାବେ ମାଏକିନା ଅଞ୍ଜନା ଆର ପୁଓ ଯୁଗେଶ୍ୱରକୁଁ ନେଇ ଅଶୋକକଁର ପରିବାର। ବାପାର ନାଁରେ ଥିବାର ଦୁଇ ଏକର ଜମିରେ ଦୁଇ ଭାଇ ଚାଷବାସ ସଂଗେ କୁଲି ମଜୁରି କରି ପରିବାର ଚଲଉଥିଲେ। ହେଲେ ଆଏଜ୍କେ ୫ ବଛର ତଲେ କେହେନ୍ସି ଗୁଟେ ଅଜନା ରୋଗ୍ରେ ପଡ଼ଲେ ଅଶୋକ। ଗୁଟାମୁଟା ଶରୀର ଦରଦ୍ ହେବାର ଲାଗି ସେ ଆର ଚାଲିବୁଲି ନାଇଁପାରଲେ। ପରିବାର ଲୋକ୍ ଯାହା ସଁଚିଥିଲେ ତାକର ଚିକିତ୍ସାରେ ଖରଚ୍ କରି ନିରାଶ ହେଲେ। ଶେଷେ ପରିବାର ଲୋକ୍ ଉପେ ଶୂଇନ୍ ହେଇ ଥାନୀୟ ଧରିତ୍ରୀ ପରତିନିଧିକୁଁ ଭେଟି ଦୁଖ୍ ବଖାନିଥିଲେ। ଥାନୀୟ ଧରିତ୍ରୀ ପରତିନିଧି ଜିଲା ଚିକିତ୍ସା ଅଧ୍କାରୀକୁଁ ଯୋଗାଯୋଗ କରି ଘଟନା ବାବ୍ଦେ କହିଥିଲେ। ଗଲା ୨୮.୪.୨୦୧୯, ରଏବାର ଧରିତ୍ରୀ ସମ୍ବଲପୁର ସଂସ୍କରଣରେ ‘ଚିକିତ୍ସା ଲାଗି ଟଁକା ବାଧକ୍, ଅଜନା ରୋଗ୍ରେ ପୀଡ଼ିତ ଅଶୋକ’ ଶୀରଷକ୍ରେ ଖବର ବାହାରିଥିଲା। ଖବର ବାହାରଲାରୁ ସଂଗେ ସଂଗେ ଜିଲା ମୁଖିଆ ଚିକିତ୍ସା ଅଧ୍କାରୀ ଡା.ସଞ୍ଜୁକ୍ତା ସାହୁ ଗୁଟେ ଡାକ୍ତରି ଦଲ୍ ରୁଗୀକଁର ଘରକେ ପଠେଇଥିଲେ। ଡାକ୍ତରି ଦଲ୍ ଦୁଇପହରର ୩ ବଜେ ରୁଗୀକଁର ଘରେ ପୁହୁଁଚି ଓ୍ବାର୍ଡ ମେମ୍ବର ଗୌରୀ ଛତ୍ରିଆ ଆର ସୁଶାନ୍ତି ନାଗକର ଉପସ୍ଥିତିରେ ଚିକିତ୍ସା ଲାଗି ଖପ୍ରାଖୋଲ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକେ ନେଇଥିଲେ। ରୁଗୀ ଅଶୋକ ବର୍ଗେକଁର ସଂଗେ ତାକର ଭାଇ ଆନନ୍ଦ ଆର ପଡ଼ିଶା ଘରର ଜାମଧର ଯାଇଥିବାର ଜନାଯାଇଛେ। ଇ ସାହାଯ୍ ଲାଗି ରୁଗୀକଁର ପରିବାର ଲୋକ୍ ଧରିତ୍ରୀ ଖବର କାଗଜକେ ଅଶେଷ୍ ଧଏନ୍ବାଦ ଦେଇଛନ୍।
