କଣ୍ଟାପଡା,୨।୧୧(ଡି.ଏନ୍.ଏ.): ଓଲଟପୁର ଥାନା ଅଞ୍ଚଳର ଏକ କଲେଜରେ ପାଠ ପଢ଼ୁଥିବା ଜଣେ ନାବାଳିକା ଛାତ୍ରୀଙ୍କୁ ଅପହରଣ କରିବା ଅଭିଯୋଗରେ ଓଲଟପୁର ପୋଲିସ ଶନିବାର ଜଣେ ଯୁବକଙ୍କୁ ଗିରଫ କରି କୋର୍ଟଚାଲାଣ କରିଛି। ଏହା ସହ ଅପହୃତା ନାବାଳିକାଙ୍କୁ ଉଦ୍ଧାର କରାଯାଇ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ଅଭିଯୁକ୍ତ ଯୁବକ ହେଲେ ବାଲିଅନ୍ତା ଥାନା ଅନ୍ତର୍ଗତ ଅଣ୍ଡିଲୋ ଗ୍ରାମର ସୋମ୍ୟରଞ୍ଜନ ଭୋଇ ଓରଫ ନିଲୁ(୨୪)। ଏ ସଂକ୍ରାନ୍ତରେ ନାବାଳିକାଙ୍କ ବାପାଙ୍କ ଅଭିଯୋଗକ୍ରମେ ପୋଲିସ ଓଲଟପୁର ଥାନା କେଶ ନଂ. ୮୯/୧୯ରେ ମାମଲା ରୁଜୁକରି ତଦନ୍ତ ଚାଲୁରଖିଛି।
ସୂଚନାନୁଯାୟୀ, ନାବାଳିକାଙ୍କ ଘର ବାଲିଅନ୍ତା ଥାନା ଅଞ୍ଚଳରେ ହୋଇଥିବାବେଳେ ସେ ଓଲଟପୁର ଥାନାସ୍ଥିତ ଏକ କଲେଜରେ ପାଠ ପଢ଼ୁଥିଲେ। ଗତମାସ ୨୯ ତାରିଖରେ ସେ କଲେଜକୁ ଆସି ଘରକୁ ନ ଫେରିବାରୁ ପରିବାର ଲୋକ ଏ ସମ୍ପର୍କରେ ଓଲଟପୁର ଥାନାରେ ଅଭିଯୋଗ କରିଥିଲେ। ପୋଲିସ ଶୁକ୍ରବାର ବାଲିଅନ୍ତା ଥାନାସ୍ଥିତ ଅଣ୍ଡିଲୋ ଗ୍ରାମରୁ ଅଭିଯୁକ୍ତଙ୍କୁ କାବୁ କରିଥିବା ବେଳେ ଅଭିଯୁକ୍ତଙ୍କ ଭିଣୋଇ ଘରୁ ନାବାଳିକାଙ୍କୁ ଉଦ୍ଧାର କରିଥିଲା।
