ଅନୁଗୋଳ ନାବାଳିକା ବଳାତ୍କାର ଘଟଣା: ଅଭିଯୁକ୍ତଙ୍କୁ ଗିରଫ କଲା ପୋଲିସ
7:58 amJuly 24, 2019June 4, 2020 / 21

ଅନୁଗୋଳ ଅଫିସ, ୨୪।୭-ଅନୁଗୋଳ ବସ୍‌ଷ୍ଟାଣ୍ଡ ନିକଟ ଆହାରକେନ୍ଦ୍ର ପଛପଟେ ଶନିବାର ରାତିରେ ଘଟିଥିବା ନାବାଳିକା ବଳାତ୍କାର ଘଟଣାର ଅଭିଯୁକ୍ତ ଅମଲାପଡ଼ାର ଶିବୁ ପଟ୍ଟନାୟକ(୫୫)ଙ୍କୁ ମଙ୍ଗଳବାର ପୋଲିସ ଗିରଫ କରିଛି। ନାବାଳିକାଙ୍କ ମାଇଁ କରିଥିବା ଅଭିଯୋଗ ଆଧାରରେ ନଂ. ୫୫୨/୧୯ରେ ମାମଲା ରୁଜୁ ସହ ଅଭିଯୁକ୍ତ ଶିବୁଙ୍କୁ କୋର୍ଟ ଚାଲାଣ କରାଯାଇଥିବା ଥାନାରେ ଅନୁଷ୍ଠିତ ଖବରଦାତା ସମ୍ମିଳନୀରେ ଏସ୍‌ପି ମିତ୍ରଭାନୁ ମହାପାତ୍ର ସୂଚନା ଦେଇଛନ୍ତି। ୧୫ ଦିନ ମଧ୍ୟରେ ଏହି ମାମଲାର ଚାର୍ଜଶିଟ୍‌ କୋର୍ଟରେ ଦାଖଲ ସହ ଯଥାଶୀଘ୍ର ଟ୍ରାଏଲ ପାଇଁ କୋର୍ଟଙ୍କୁ ଅନୁରୋଧ କରାଯିବ ବୋଲି ଏସ୍‌ପି ମହାପାତ୍ର ପ୍ରକାଶ କରିଛନ୍ତି। ଅଭିଯୁକ୍ତଙ୍କ ବିରୋଧରେ ଯଥେଷ୍ଟ ପ୍ରମାଣ ଥିଲେ ମଧ୍ୟ ବସ୍‌ଷ୍ଟାଣ୍ଡରେ ଲାଗିଥିବା କେତୋଟି କ୍ୟାମେରାରେ କଏଦ ହୋଇଥିବା କିଛି ଦୃଶ୍ୟ ଖୋଜାଯାଉଥିବା ଏସ୍‌ପି କହିଛନ୍ତି। ଏସ୍‌ପି କହିଥିଲେ ଯେ, ଶିବୁଙ୍କ ନାମରେ
ପୂର୍ବରୁ ବହୁ ଅଭିଯୋଗ ରହିଛି। ଶନିବାର ରାତିରେ ମାଇଁ ପାଖରେ ଶୋଇଥିବା ନାବାଳିକାଙ୍କ ମୁହଁରେ ହାତ ଦେଇ ଅଭିଯୁକ୍ତ ଉଠାଇ ନେଇଯାଇଥିଲେ। ଆହାର କେନ୍ଦ୍ର ନିକଟରେ ତାଙ୍କୁ ବଳାତ୍କାର କରି ଅନ୍ୟତ୍ର ଫିଙ୍ଗି ଦେଇଥିଲେ। ଅଭିଯୁକ୍ତଙ୍କୁ ଧରିବା ପାଇଁ ୪ଟି ଟିମ୍‌ ଗଠନ କରାଯାଇଥିଲା। ପ୍ରଥମ ଟିମ୍‌ରେ ଥିବା ସବ୍‌ଇନ୍ସପେକ୍ଟର ସୌମ୍ୟା ରାୟ ନାବାଳିକାଙ୍କ ଚିକିତ୍ସା କଥା ବୁଝିବାକୁ କଟକ ଯାଇଛନ୍ତି। ସେହିପରି ସବ୍‌ଇନ୍ସପେକ୍ଟର ବିପ୍ଳବ ସାହୁ ତଥ୍ୟ ପ୍ରମାଣ ସହ ସାଇଣ୍ଟିଫିକ୍‌ ଟିମ୍‌ର ଦାୟିତ୍ୱ ନେଇଥିଲେ। ସବ୍‌ଇନ୍ସପେକ୍ଟର ନିରୋଦ କୁମାର ଦାସ ଅଭିଯୁକ୍ତଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ଚଢ଼ାଉ କରିଥିଲେ। ସମସ୍ତ ଟିମ୍‌କୁ ଥାନା ଅଧିକାରୀ ରମେଶ ଚନ୍ଦ୍ର ବିଶୋଇ ସହଯୋଗ କରୁଥିବାବେଳେ ଘଟଣାର ସେ ତଦନ୍ତ କରୁଛନ୍ତି। ନାବାଳିକାଙ୍କ ମୁଣ୍ଡରେ ଶକ୍ତ ଆଘାତ ଲାଗିଛି। ଡାକ୍ତରଙ୍କ ଠାରୁ ଏ ନେଇ ତଥ୍ୟ ମିଳିବା ପରେ ଆବଶ୍ୟକ ପଡ଼ିଲେ ଅଭିଯୁକ୍ତଙ୍କ ବିରୋଧରେ ଲଗାଯାଇଥିବା ଦଫାରେ ସାମାନ୍ୟ ପରିବର୍ତ୍ତନ ହୋଇପାରେ ବୋଲି ପୋଲିସ ପକ୍ଷରୁ କୁହାଯାଇଛି। ଏହି ଖବରଦାତା ସମ୍ମିଳନୀରେ ଅନୁଗୋଳ ଏସ୍‌ଡିପିଓ ଅଶ୍ୱନୀ ସାହୁ, ଥାନା ଅଧିକାରୀ ରମେଶ ଚନ୍ଦ୍ର ବିଶୋଇ ଉପସ୍ଥିତ ଥିଲେ।