ନୂଆଦିଲ୍ଲୀ,୩୦-୮: ଅଟୋ ସେକ୍ଟରକୁ ଗତିଶୀଳ କରିବା ଲାଗି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ୍ଙ୍କ ଦ୍ୱାରା ଗତ ସପ୍ତାହରେ ଘୋଷିତ ପ୍ରୋତ୍ସାହନ ପ୍ୟାକେଜ ପର୍ଯ୍ୟାପ୍ତ ନୁହେଁ। ଘୋଷିତ ପ୍ୟାକେଜ ଆବଶ୍ୟକତା ଦୃଷ୍ଟିରୁ ଅତ୍ୟନ୍ତ ନଗଣ୍ୟ ଏବଂ ବିଳମ୍ବରେ ଉଠାଯାଇଥିବା ପଦକ୍ଷେପ ବୋଲି ରେଟିଂ ଏଜେନ୍ସି ଫିଚ୍ ସଲ୍ୟୁଶନ୍ସ ମାକ୍ରୋ ରିସର୍ଚ୍ଚରେ କୁହାଯାଇଛି। ଗୁରୁବାର ପ୍ରକାଶିତ ଏହି ରିସର୍ଚ୍ଚ ରିପୋର୍ଟରେ କୁହାଯାଇଛି ଯେ, ସାମଗ୍ରୀ ଏବଂ ସେବା ଟିକସ(ଜିଏସ୍ଟି) ହାର ହ୍ରାସ ସହ ପୁରୁଣା ଗାଡ଼ିକୁ ରଦ୍ଦି ଭାବେ ଘୋଷଣା ନିୟମ ଭଳି ପଦକ୍ଷେପ ନେବାର ଆବଶ୍ୟକତା ରହିଛି। ସୂଚନାଥାଉ କି, ଅର୍ଥମନ୍ତ୍ରୀ ସୀତାରାମନ୍ ଗତ ୨୩ରେ ଅଟୋ ସେକ୍ଟର ଲାଗି କେତେକ ପ୍ୟାକେଜ ଘୋଷଣା କରିଛନ୍ତି। ଫିଚ୍ ପକ୍ଷରୁ କୁହାଯାଇଛି ଯେ, ୨୦୧୮-୧୯ରେ ଆସିଥିବା ମାନ୍ଦାବସ୍ଥାକୁ ଦୂରେଇବା ଲାଗି ଅଟୋ ସେକ୍ଟର ପାଇଁ ଅତ୍ୟନ୍ତ ନଗଣ୍ୟ ଘୋଷଣା କରାଯାଇଛି। ସରକାର ପ୍ରୋତ୍ସାହନ ପ୍ୟାକେଜ ଘୋଷଣା କରିବାରେ ବିଳମ୍ବ କରିଦେଲେ। କାରଣ ଅଟୋ ସେକ୍ଟରରେ ମାନ୍ଦାବସ୍ଥା ବହୁ ଦୂର ପର୍ଯ୍ୟନ୍ତ ମାଡି ଯାଇଛି। ଏବେ ଏହାକୁ ରୋକିବା ଅସମ୍ଭବ। ତେବେ ଫିଚ୍ ସଲ୍ୟୁଶନ୍ସ ପକ୍ଷରୁ କୁହାଯାଇଛି ଯେ, ନିର୍ମଳାଙ୍କ ପ୍ୟାକେଜ ଘୋଷଣାରୁ ଏହା ଦର୍ଶାଉଛି ଯେ,ସରକାର ଅଟୋ ସେକ୍ଟରରେ ହସ୍ତକ୍ଷେପ କରିବାକୁ ପ୍ରସ୍ତୁତ ଅଛନ୍ତି।
