ଛତ୍ରପୁର,୬ା୪(ଡି.ଏନ୍.ଏ.)- ଗଞ୍ଜାମ ଜିଲାରେ କ୍ଷେତ୍ରରେ କାମ କରୁଥିବା ଅଙ୍ଗନଓ୍ବାଡି କର୍ମୀ ଓ ସ୍ବାସ୍ଥ୍ୟ କର୍ମୀଙ୍କ ପାଇଁ ୩.୮୫ ଲକ୍ଷ ଟଙ୍କାର (୨୨୫୦ଟି) ଏନ୍-୯୫ ମାସ୍କ ସୋମବାର ଡିଆରଡିଏ ପିଡି ସିଦ୍ଧାର୍ଥ ଶଙ୍କର ସ୍ବାଇଁଙ୍କୁ ବିଭିନ୍ନ ଅନୁଷ୍ଠାନ ପକ୍ଷରୁ ପ୍ରଦାନ କରାଯାଇଛି। ଏଭଳି ମୋଟ ୫ହଜାର ଏନ୍-୯୫ ମାସ୍କ ସଂଗ୍ରହ କରି ସ୍ବାସ୍ଥ୍ୟ କର୍ମୀ ଓ ଅଙ୍ଗନଓ୍ବାଡି କର୍ମୀଙ୍କୁ ପ୍ରଦାନ କରାଯିବାର ଲକ୍ଷ୍ୟ ରଖାଯାଇଛି। ଛତ୍ରପୁର ସଂଗ୍ରାମ ସ୍ପୋଟର୍ସ କ୍ଲବ ପକ୍ଷରୁ ୧ ଲକ୍ଷ ଟଙ୍କା ବ୍ୟୟରେ ୬୨୫ଟି ଏନ୍-୯୫ ମାସ୍କ ପିଡିଙ୍କୁ ପ୍ରଦାନ କରାଯାଇଛି। କ୍ଲବର ସଭାପତି ତଥା ବ୍ଲକ ଅଧ୍ୟକ୍ଷ ଏମ୍. ଧନଞ୍ଜୟ ରେଡ୍ଡୀ, ଏନ୍. ଗିରିଧର ରାଓ, ଆର୍. ଯୋଗେନ୍ଦ୍ର ରାଓ, ନିରୋଧ ଚନ୍ଦ୍ର ନାୟକ, ସୁରଜିତ ସାମନ୍ତରାୟ ଉପସ୍ଥିତ ଥିଲେ। ଦଣ୍ଡନାଚ ପାଇଁ ଏହି ଅର୍ଥ ସଂଗ୍ରହ ହୋଇଥିଲା। ଏବେ ଏହା ବନ୍ଦ ହୋଇଯାଇଥିବାରୁ ଏହାକୁ ମାସ୍କ ପାଇଁ ଖର୍ଚ୍ଚ କରାଯାଇଛି। ସେହିପରି ସ୍ଥାନୀୟ ଚଣ୍ଡୀଛକ ଫ୍ରେଣ୍ଡସ ଗ୍ରୁପ ପକ୍ଷରୁ ରାଜେନ୍ଦ୍ର ସେନାପତି, ଜି. ପାପା ରାଓ, ଜନାର୍ଦ୍ଦନ ରାଓ, ପ୍ରଦୀପ ପାଣିଗ୍ରାହୀ, ସୁଦର୍ଶନ ପଟ୍ଟନାୟକ, ରମେଶ ଛାଟୋଇ, ମିଥୁନ ସାହୁ, ମହେଶ ତରାଇ ୧.୮୫ ଲକ୍ଷ ଟଙ୍କାର ୧ହଜାରଟି ଏବଂ ବ୍ରହ୍ମପୁରର ଏକ୍ସଓଟିକ୍ ସାଇନେଜ ପକ୍ଷରୁ ୧ ଲକ୍ଷ ଟଙ୍କାର ୬୨୫ଟି ଏନ୍-୯୫ ମାସ୍କ ପ୍ରଦାନ କରାଯାଇଛି।
