ଇସଲାମାବାଦ,୩।୧: ୨୮ ଫେବୃଆରୀ, ୨୦୨୫ରେ ହ୍ବାଇଟ ହାଉସର ଓଭାଲ ଅଫିସରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ୟୁକ୍ରେନୀୟ ରାଷ୍ଟ୍ରପତି ଭୋଲୋଡେମିର ଜେଲେନସ୍କିଙ୍କ ମଧ୍ୟରେ ବଡ଼ ବିତର୍କ ହୋଇଥିଲା। ଏହି ଘଟଣା ପରେ, ଆମେରିକୀୟ କର୍ତ୍ତୃପକ୍ଷ ୟୁକ୍ରେନକୁ ଦିଆଯାଉଥିବା ଆର୍ଥିକ ସହାୟତାରେ ସମ୍ଭାବ୍ୟ ଠକେଇ ଏବଂ ଅପବ୍ୟବହାରର ତଦନ୍ତକୁ ତୀବ୍ର କରିବାକୁ ନିଷ୍ପତ୍ତି ନେଇଥିଲେ।
ଏହି ସମୟରେ, ପାକିସ୍ତାନୀ ବିଶେଷଜ୍ଞ ଡକ୍ଟର ସାଜିଦ ତାରାର ଏକ ବଡ଼ ଦାବି କରିଛନ୍ତି। ତାଙ୍କ ଅନୁସାରେ, ଜେଲେନସ୍କି ଆମେରିକୀୟ ସହାୟତା ଟଙ୍କା ଦୁବାଇ ଏବଂ ଲଣ୍ଡନକୁ ପଠାଇଛନ୍ତି। ଡକ୍ଟର ତାରାର କହିଛନ୍ତି, ‘ଜୋ ବାଇଡେନ ୟୁକ୍ରେନକୁ ୫୦୦ବିଲିୟନ ଡଲାର ସହାୟତା ଦେଇଥିଲେ, ଏବଂ ଏହି ଟଙ୍କାର ବହୁତ ଅଂଶ ଦୁବାଇ ଏବଂ ଲଣ୍ଡନରେ ପହଞ୍ଚି ସାରିଛି। ଯଦି ଟ୍ରମ୍ପ ଏହାକୁ ବନ୍ଦ କରିବାକୁ ଚାହାଁନ୍ତି, ତେବେ ଏଥିରେ କାହାର କାହିଁକି ଅସୁବିଧା ହେବ ବୋଲି ସେ ପ୍ରଶ୍ନ କରିଛନ୍ତି।
ଡକ୍ଟର ସାଜିଦ ତାରାର ଆହୁରି ମଧ୍ୟ କହିଛନ୍ତି ଯେ ଡୋନାଲ୍ଡ ଟ୍ରମ୍ପ ତିନୋଟି କାରଣ ପାଇଁ ଜେଲେନସ୍କିଙ୍କ ଉପରେ ଚାପ ପକାଉଛନ୍ତି:
ୟୁକ୍ରେନରେ ନିର୍ବାଚନ – ଟ୍ରମ୍ପ ଦାବି କରିଛନ୍ତି ଯେ ଜେଲେନସ୍କି ହାରିବା ଭୟରେ ନିର୍ବାଚନ କରିବାକୁ ଏଡ଼ାଇ ଯାଉଛନ୍ତି।
ଯୁଦ୍ଧ ଉପରେ ନିୟନ୍ତ୍ରଣ – ଟ୍ରମ୍ପଙ୍କ ଅନୁସାରେ, ଯଦି ଆମେରିକା ଷ୍ଟାରଲିଙ୍କ ଇଣ୍ଟରନେଟ ବନ୍ଦ କରିଦିଏ, ତେବେ ଯୁଦ୍ଧ ତୁରନ୍ତ ଶେଷ ହୋଇଯିବ।
ଶାନ୍ତି ଚୁକ୍ତି – ଟ୍ରମ୍ପ ଚାହୁଁଛନ୍ତି ଯେ ଜେଲେନସ୍କି ରୁଷିଆ ସହିତ ଶାନ୍ତି ଆଲୋଚନା କରନ୍ତୁ, କିନ୍ତୁ ସେ ଏଥିପାଇଁ ପ୍ରସ୍ତୁତ ନାହାଁନ୍ତି।
ଜେଲେନସ୍କିଙ୍କୁ ହ୍ବାଇଟ ହାଉସରୁ ବାହାର କରିବାକୁ ନେଇ ବିବାଦ
ଯୁଦ୍ଧରେ ଶାନ୍ତି ପ୍ରତିଷ୍ଠା ବିଷୟରେ ଆଲୋଚନା କରିବା ପାଇଁ ଜେଲେନସ୍କି ୨୮ ଫେବୃଆରୀ, ୨୦୨୫ ଶୁକ୍ରବାର ହ୍ବାଇଟ ହାଉସରେ ପହଞ୍ଚିଥିଲେ, କିନ୍ତୁ ଯେତେବେଳେ ସେ ରୁଷିଆ ସହିତ ଶାନ୍ତି ଚୁକ୍ତି ସ୍ବାକ୍ଷର କରିବାକୁ ମନା କରିଦେଲେ, ଟ୍ରମ୍ପ କ୍ରୋଧିତ ହୋଇଗଲେ। ଟ୍ରମ୍ପ କ୍ରୋଧର ସହ ଜେଲେନସ୍କିଙ୍କୁ ହ୍ବାଇଟ ହାଉସରୁ ବାହାର କରିଦେଇ କହିଥିଲେ ଯେ ସେ ‘ଶାନ୍ତି ପାଇଁ ପ୍ରସ୍ତୁତ ହେଲେ’ ଫେରି ଆସିପାରିବେ।
ଏହା ପରେ, ଜେଲେନସ୍କି ଆମେରିକା ଏବଂ ଏହାର ଲୋକଙ୍କ ସମର୍ଥନ ପାଇଁ କୃତଜ୍ଞତା ପ୍ରକାଶ କରିଥିଲେ ଏବଂ କହିଥିଲେ ଯେ ୟୁକ୍ରେନ ଏକ ନ୍ୟାୟପୂର୍ଣ୍ଣ ଏବଂ ସ୍ଥାୟୀ ଶାନ୍ତି ପାଇଁ କାମ କରୁଛି। ତଥାପି, ଏହି ବିବାଦ ସତ୍ତ୍ୱେ, ଜର୍ମାନୀ, ଫ୍ରାନ୍ସ ଏବଂ ପୋଲାଣ୍ଡ ୟୁକ୍ରେନକୁ ସେମାନଙ୍କର ସମର୍ଥନ ପୁନଃପ୍ରକାଶ କରିଛନ୍ତି।
