ନୂଆଦିଲ୍ଲୀ,୩୧।୧୨: ପ୍ରଧାନମନ୍ତ୍ରୀ ମୋଦି ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ବାସଭବନ ଉପରେ ଡ୍ରୋନ ଆକ୍ରମଣ ରିପୋର୍ଟ ଉପରେ ଚିନ୍ତା ପ୍ରକାଶ କରିଥିଲେ। ୟୁକ୍ରେନୀୟ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଏବେ ଏଥିପାଇଁ ଭାରତକୁ ସମାଲୋଚନା କରିଛନ୍ତି। ୟୁକ୍ରେନୀୟ ଅଭିଯୋଗକୁ ପ୍ରତ୍ୟାଖ୍ୟାନ କରି କହିଛନ୍ତି,ସେ ଏପରି କୌଣସି ଆକ୍ରମଣ କରିନାହାଁନ୍ତି।
ୟୁକ୍ରେନୀୟ ରାଷ୍ଟ୍ରପତି ଭାରତ ଉପରେ ଦ୍ୱନ୍ଦ୍ୱାତ୍ମକ ମାନଦଣ୍ଡ ଥିବା ଅଭିଯୋଗ କରିଛନ୍ତି। ଜେଲେନସ୍କି କହିଛନ୍ତି, ପୁଟିନଙ୍କ ବାସଭବନ ଉପରେ ଆକ୍ରମଣକୁ ନିନ୍ଦା କରୁଥିବା ଭାରତ ସମେତ କିଛି ଦେଶ କେବେ ଆମ ପିଲାମାନଙ୍କ ଉପରେ ଆକ୍ରମଣ ବିଷୟରେ କହିନାହାଁନ୍ତି। ସତ କହିବାକୁ ଗଲେ, ଏହା ଦ୍ୱନ୍ଦ୍ୱପୂର୍ଣ୍ଣ ଏବଂ ଖରାପ ଯେ ଭାରତ, ୟୁଏଇ ଏବଂ ଅନ୍ୟ କିଛି ଦେଶ ପୁଟିନଙ୍କ ବାସଭବନ ଉପରେ ଆମର କଥିତ ଡ୍ରୋନ ଆକ୍ରମଣକୁ ନିନ୍ଦା କରିଛନ୍ତି, ଯାହା କେବେ ଘଟି ନ ଥିଲା। ଏତେ ଦିନ ଧରି ସେମାନେ (ରୁଷିଆ) ଆମ ପିଲାମାନଙ୍କୁ ଆକ୍ରମଣ କରି ଲୋକଙ୍କୁ ହତ୍ୟା କରୁଛନ୍ତି, ତଥାପି କେହି ଏହାକୁ ନିନ୍ଦା କରୁନାହାଁନ୍ତି। ସତ କହିବାକୁ ଗଲେ, ମୁଁ ଭାରତ କିମ୍ବା ୟୁଏଇରୁ ଏହା ଶୁଣିନାହିଁ।
ଡିସେମ୍ବର ୨୯ରେ ରୁଷିଆ ଦାବି କରିଥିଲା, ୟୁକ୍ରେନ ୯୧ଟି ଡ୍ରୋନ ସାହାଯ୍ୟରେ ରାଷ୍ଟ୍ରପତି ପୁଟିନଙ୍କ ବାସଭବନ ଉପରେ ଆକ୍ରମଣ କରିବାକୁ ଚେଷ୍ଟା କରିଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଇନଷ୍ଟାଗ୍ରାମରେ ଏକ ପୋଷ୍ଟରେ ଲେଖିଛନ୍ତି, ରାଷ୍ଟ୍ରପତି ପୁଟିନଙ୍କ ବାସଭବନକୁ ଟାର୍ଗେଟ କରାଯିବାର ରିପୋର୍ଟରେ ସେ ଗଭୀର ଚିନ୍ତିତ। ଶତ୍ରୁତା ଶେଷ କରିବା ଏବଂ ଶାନ୍ତି ହାସଲ କରିବା ପାଇଁ କୂଟନୈତିକ ପ୍ରୟାସ ହେଉଛି ସର୍ବଶ୍ରେଷ୍ଠ ପଥ। ଶାନ୍ତି ପଦକ୍ଷେପକୁ ଦୁର୍ବଳ କରିପାରେ ଏପରି ପଦକ୍ଷେପ ନେବାରୁ ବିରତ ରହିବାକୁ ସେ ସମସ୍ତ ପକ୍ଷଙ୍କୁ ନିବେଦନ କରିଛନ୍ତି।
ୟୁକ୍ରେନର ବୈଦେଶିକ ମନ୍ତ୍ରୀ ସିବିହା କହିଛନ୍ତି, ଭାରତ, ୟୁଏଇ ଏବଂ ପାକିସ୍ତାନ ଦ୍ୱାରା ଦିଆଯାଇଥିବା ବୟାନ ଦ୍ୱାରା କିଭ ନିରାଶ ଏବଂ ଚିନ୍ତିତ। ଇନଷ୍ଟାଗ୍ରାମରେ ଏକ ପୋଷ୍ଟରେ ସିବିହା କହିଛନ୍ତି, ପ୍ରାୟ ଗୋଟିଏ ଦିନ ବିତିଗଲାଣି ଏବଂ ରୁଷିଆ ଏପର୍ଯ୍ୟନ୍ତ ପୁଟିନଙ୍କ ବାସଭବନ ଉପରେ ହୋଇଥିବା କଥିତ ଆକ୍ରମଣର କୌଣସି ବିଶ୍ୱସନୀୟ ପ୍ରମାଣ ପ୍ରଦାନ କରିନାହିଁ, ଏବଂ ସେମାନେ ଦେବେ ନାହିଁ। କାରଣ ଏପରି କୌଣସି ପ୍ରମାଣ ନାହିଁ। ଏପରି କୌଣସି ଆକ୍ରମଣ ଘଟିନାହିଁ।
Dharitri – Odisha’s No.1 Odia Daily
